1 ሳማረ ካዋ አካባ ጋꬎ ማታን ናቡተስ እዝራኤለን ዎይነ ጋደይ ደኤስ። 2 አካብ ናቡተኮ፥ “ታ ጋꬉዋ ማታን ደእያ ግሾ፥ ታ አታክልተ ቶክያ በሲ ኦꬃናዉ ነ ዎይነ ጋድያ ታዉ እማ። እያ ግሾ ነዉ ታ ሀራ ሎኦ ዎይነ ጋደ እማና፤ ዎይኮ ነ ዶስኮ እያ ጋትያ ታ ነዉ ቃንፃና” ያግስ።

3 ናቡተይ ዛሪድ፥ “ታኒ ታ አዋታፐ ላትዳ ጋደ ነዉ እሚስያባፐ ጎዳይ ታና አሾ” ያግስ።

4 እዝራኤለ አደይ ናቡተይ፥ “ታኒ ታ አዋታፐ ላትዳ ጋደ ነዉ እምከ” ግዳ ግሾ፥ አካብ ይሎትሸነ አዛንሸ ባ ሶ ብድ፥ ጎዳኮ ስም ዝንእድ፥ ካꬅካ ሞና እፅስ።

5 እያ ማችያ ኤልዛቤላ እያኮ ገላዳ፥ “ነና ሀይሳዳ ይሎይዳይ አይቤ? አይስ ካꬅ ሞና እፃይ?” ያጋዳ ኦይቻሱ።

6 አካብ፥ “እዝራኤለ አደይ ናቡተይ፥ ‘ነ ዎይነ ጋድያ ታዉ ባይዛ ዎይኮ ነ ዶስኮ እያ ግሾ ታ ነዉ ሀራ ዎይነ ጋደ እማና’ ያግን፥ እ፥ ‘ታ ዎይነ ጋድያ ነዉ እምከ’ ያግን፥ ታ ሄሳ ግሾ ይሎትስ” ያግስ።

7 ኤልዛቤላ፥ “ነ እስራኤለ ቦላ ካዎ ግዳ ኡታዳ ሀይሳዳ ሀናይ? ደንዳዳ ማ! ዎዛናፐ ኡፋይታ! እዝራኤለ አድያ ናቡተ ዎይነ ጋድያ ታኒ ነዉ እምሳና” ያጋሱ።

8 ሄሳ ግሾ፥ እያ አካባ ሱንꬃን ዳብዳበ ፃፋዳ፥ እያ ቦላ ማታመ ዎꬃሱ። ናቡተራ እስፈ ካታማን ደእያ ጭማታስነ ግታ አሳታስ ኪታሱ። 9 ዳብዳበ ሀይሳዳ ያጋዳ ፃፋሱ፤ “እስ ጋላስ ፆማ አዋጅተ፤ አሳ እስፈ ሺሽተ፤ ናቡተ ቦንቾ በሳን ኡትስተ። 10 ናቡተይ፥ ‘ፆሳነ ካዋ ጫይስ’ ያግድ ማርካትያ ናምኡ ማርካታ ሺሽድ፥ ማርካታናዳ ኦꬅተ። ሄሳፈ ጉየ፥ ካታማፐ ጋፃ ከስድ፥ ሹቻን ጫድድ ዎꬍተ” ያጋዳ ፃፋሱ።

11 ሄሳ ግሾ፥ ናቡተራ እስፈ ካታማን ደእያ ጭማትነ ግታ አሳት ኤልዛቤላ ኤንታዉ ፃፍዳ ዳብዳብያን ግዳይሳዳ ኦꬅዶሶና። 12 ኤንቲ ፆማ አዋጅድ፥ ናቡተ አሳ ግዶን ቦንቾ በሳን ኡትስዶሶና። 13 ናምኡ ዎርዶ ማርካት ይድ፥ እያኮ ስም ኡትድ፥ አሳ ስንꬃን፥ “ናቡተይ ፆሳነ ካዋ ጫይስ” ያግድ ዎርዶ ማርካትዶሶና። ናቡተ ካታማፐ ጋፃ ከስድ፥ ሹቻን ጫድድ ዎꬍዶሶና።

14 ጭማት ኤልዛቤልኮ፥ “ናቡተይ ሹቻን ጫደትድ ሀይቅስ” ያግድ ኪትዶሶና።

15 ናቡተይ ሹቻን ጫደትድ ሀይቅዳይሳ ኤልዛቤላ ስእዳ ዎደ፥ “እዝራኤለ አድያ ናቡተይ ነዉ ሚሸን ባይዛናዉ እፅዳ ዎይነ ጋድያ ባዳ ኤካ። እ ሀእ ሀይቅስ” ያጋሱ። 16 እዝራኤለ አደይ ናቡተይ ሀይቅዳይሳ አካብ ስእድ፥ ናቡተ ዎይነ ጋድያ ባዉ ኤካናዉ ደንድድ ብስ።

17 ሄሳፈ ጉየ፥ ተስባ አድያ ኤልያሳኮ ጎዳ ቃላይ ይድ፥ 18 “ሳማረን ካዎትዳ እስራኤለ ካዋ አካባራ ጋሄታናዉ ባ። ሄኮ፥ እ ናቡተ ዎይነ ጋድያ ኤካናዉ ብድ፥ ያን ደኤስ። 19 ጎዳይ ሀይሳዳ ያጌስ ጋዳ እያዉ ኦዳ፤ ‘አድያ ዎꬋዳ እያ ጋድያ ነዉ ኤካዳሳ ግድኪ?’ ያጋ። ቃስ ጎዳይ፥ ‘ናቡተ ሱꬃ ካናት ላጭዳ በሳን ነ ሱꬃካ ካናት ላጫና’ ” ያግስ።

20 አካብ ኤልያሳ በእዳ ዎደ፥ “ታ ሞርክያዉ፥ ታና ደማዲ?” ያግስ።

ኤልያስ፥ “ኤ፥ ነና ደማስ። ኔኒ ጎዳ ስንꬃን ኢታባ ኦꬃናዉ ነና ናጋራስ ባይዛዳሳ። 21 ጎዳይ ኔኮ ሀይሳዳ ያጌስ፤ ‘ሄኮ፥ ታኒ ነ ቦላ ኢታባ ኤሀና። ታኒ ነ ኮቻታ ꬋይሳና፤ ታኒ እስራኤለ ቢታን አካባ ሶ አሳፐ አይለ ግድን ዎማኖ ግድን፥ እስ አደይ አቶና ꬋይሳና። 22 ኔኒ እስራኤለ አሳ ናጋራ ኦስሳዳ ታና ሀንቀꬅዳ ግሾ፥ ታ ነ ሶ አሳ ናባፃ ናኣ እዮርባማ ሶ አሳዳነ አክያ ናኣ ባኦሳ ሶ አሳዳ ኦꬃና።’ 23 ቃስ ጎዳይ ኤልዛቤልባ ኦድሸ፥ ‘እዝራኤለ ካታማ ግምበ ድርሳ ላንቀን ካናት ኤልዛቤሎ ማና’ ያጌስ። 24 አካባ ኮቸ ግድድ ካታማን ሀይቅያ ኦናካ ካን ማና፤ ጋፃርያን ሀይቅያ ኦናካ ሳሎ ካፎት ማና” ያግስ።

25 ባ ማችያ ኤልዛቤላ ደንꬅን፥ ጎዳ ስንꬃን ኢታባ ኦꬃናዉ ባና ናጋራስ ባይዝዳ አካባ መላ አስ ባዋ። 26 አካብ፥ ጎዳይ እስራኤለ አሳ ስንꬃፈ ጎድድ ከስዳ አሞረታ ኤቃ ጎይንድ ዳሮ እፀትዳባ ሀንስ።

27 አካብ ሄሳ ስእዳ ዎደ ባ ማኡዋ ዳክድ፥ ካዮ ማኦ ማእድ ፆምስ። ካዮ ማኦ ማእድ ꬍስኬስ፤ አዛንሸ ሄመቴስ።

28 ሄሳፈ ጉየ ጎዳ ቃላይ ተስባ አድያ ኤልያሳኮ ይድ፥ 29 “አካብ ባና ታ ስንꬃን ዋትድ ካዉሽዳኮ በአዲ? እ ታ ስንꬃን ባና ካዉሽዳ ግሾ፥ ታኒ ꬋዩዋ እያ ዎደ ኤህከ። ሽን ታኒ እያ ናኣ ዎደን እያ ሶ አሳ ቦላ ሀ ꬋዩዋ ኤሀና” ያግስ።

<- 1 ካዎታ ማፃፋ 201 ካዎታ ማፃፋ 22 ->