8 ይሁዳ ካዎይ አስ ካዎትዳ ላታማነ ኡሱፑንꬆ ላይꬃን፥ ባኦሳ ናአይ ኤል እስራኤለን ካዎትስ። ትርሳ ካታማን ኡትድ ናምኡ ላይꬅ ካዎትስ። 9 ካዋ ቶራ ሞጮናታፐ እሱዋ ግድድ፥ እያ ፓራ ጋረታፐ ባጋ ኪትያ ዝምር ካዋ ቦላ ማቀትስ። ካዎይ ኤል ሄ ዎደ ትርሳን ደእያ ካዎ ጋꬎ አዋተꬃን አይስያ አርፃ ሶን ማꬆትድ ኡትስ። 10 ይሁዳ ካዎይ አስ ካዎትዳ ላታማነ ላፑንꬃ ላይꬃን ዝምር፥ አርፃ ሶ ገልድ ካዋ ዎꬍድ እያ በሳን ባዉ ካዎትስ።

11 ዝምራ ካዎትዳ መላ ባኦሳ ሶ አሳ ኡባ ዎꬍስ። ባኦስ ዳቦ ግድን ላገ ግድን እስ አደካ ፓፃ አሽቤና። 12 ናብያ እዩ ባጋራ ጎዳይ ባኦሳ ቦላ ኦድዳ ቃላዳ ዝምር ባኦሳ ሶ አሳ ኡባ ዎꬍድ ꬋይስስ። 13 ሄስ ሀንዳይ ባኦስነ እያ ናአይ ኤል ባንታ ኤቃ ጎይንድ ኦꬅዳ ናጋራ ጋሶንነ እስራኤለ አሳ ኦስስዳ ናጋራ ጋሶን፥ ጎዳ እስራኤለ ፆሳ ሀንቀꬅዳ ግሾሳ።

14 ኤል ሀንዳ ሀራባይነ እ ኦꬅዳባይ እስራኤለ ካዎታ ታርከ ማፃፋን ፃፈትስ።

15 ይሁዳ ካዎይ አስ ካዎትዳ ላታማነ ላፑንꬃ ላይꬃን ዝምር ትርሳን ላፑን ጋላሳ ፃላላ ካዎትስ። ሄ ዎደ እስራኤለ ኦላንቾት ግባቶና ጌተትያ ፍልስፄመ ካታማ ዩሹዋ ተቅዶሶና። 16 እስራኤለ አሳይ ዝምሪ ካዋ ቦላ ማቀትድ እያ ዎꬍዳይሳ ስእዳ ዎደ ቶራ ሞጮና ኦምራ ሄ ጋላስ ሄ በሳን እስራኤለ ካዎ ኦꬅድ ካዎꬅዶሶና። 17 ኦምርነ እስራኤለ አሳይ ግባቶናፐ ከይድ ትርሳ ካታማ ተቅዶሶና። 18 ካታማይ ኦይከትዳይሳ በእዳ ዎደ ዝምር ካዎ ጋꬎ ግዶን ደእያ ግምብያ ገልድ ካዎ ጋꬎ ታማን ኦይꬅስ፤ እካ ሀይቅስ። 19 ሄስ ሀንዳይ እዮርባም ኦꬅዳ ናጋራነ እስራኤለ አሳ ኦስስዳ ናጋራ ካልድ ዝምር ጎዳ ስንꬃን ኢታባ ኦꬅዳ ግሾሳ።

20 ዝምር ሀንዳ ሀራባይነ እ ማቅዳ ማቆይ እስራኤለ ካዎታ ታርከ ማፃፋን ፃፈትስ።

21 ሄ ዎደ እስራኤለ አሳይ ናምኡ ከይድ ሻከትስ። አሳፐ ባጋይ ግናታ ናኣ ትብና ካዎꬃናዉ ኮይን፥ ባጋይ ቃስ ኦምራ ካዎꬃናዉ ኮይስ። 22 ሽን ኦምራ ማድያ አሳይ ግናታ ናኣ ትብና ማድያ አሳፐ ምንዳ ግሾ ትብን ሀይቅን ኦምር ካዎትስ።

23 ይሁዳ ካዎይ አስ ካዎትዳ ሀስታማነ እስንꬆ ላይꬃን፥ ኦምር እስራኤለ ቦላ ካዎትድ ታማነ ናምኡ ላይꬅ ሃርስ፤ እያፐ ኡሱፑን ላይꬃ ትርሳን ሃርስ። 24 ኦምር ሳማርያ ዙማ ሳምራ ጌተትያ አድያፈ 6,000 ብራ ሳንትመን ሻምድ፥ ያን ካታማ ኬፅስ። ሄ ካታማ ሄ ዙማ ጎዳ ሱንꬃን ሳማረ ግድ ሱንꬅስ።

25 ሽን ኦምር ጎዳ ስንꬃን ኢታባ ኦꬅስ፤ እ ካሰ ደእዳ ካዎታ ኡባፈ አꬅድ ናጋራ ኦꬅስ። 26 ኦምር ናባፃ ናአይ እዮርባም ኦꬅዳ ናጋራነ እስራኤለ አሳ ኦስስዳ ናጋራ ካልስ፤ ሄ ፓꬆና ኤቃ ጋሶን ጎዳ፥ እስራኤለ ፆሳ ሀንቀꬅስ።

27 ኦምር ሀንዳ ሀራባይ፥ እ ኦꬅዳባይነ እያ ምኖተꬃይ እስራኤለ ካዎታ ታርከ ማፃፋን ፃፈትስ። 28 ኦምር ሀይቅድ ባ ማይዛታን ጋሄትድ፥ ሳማረን ሞገትስ። እያ ናአይ አካብ እያ በሳን ካዎትስ።

29 ይሁዳ ካዎይ አስ ካዎትዳ ሀስታማነ ሆስፑንꬆ ላይꬃን፥ ኦምራ ናአይ አካብ እስራኤለን ካዎትስ። ኦምራ ናአይ አካብ ሳማረን እስራኤለ ቦላ ላታማነ ናምኡ ላይꬅ ካዎትስ። 30 ኦምራ ናአይ አካብ ባፐ ስን ካዎትዳ ካዎታ ኡባፈ አꬍያ ኢታባ ጎዳ ስንꬃን ኦꬅስ። 31 ናባፃ ናአይ እዮርባም ኦꬅዳ ናጋራ ላፋባ ግድ ቆፎ ፃላላ ግዶናሽን፥ ስዶና ካዋ ኤትባላ ናእዉ ኤልዛቤሎ ባዉ ማቾ ኤክድ፥ ባኣለ ኤቃስ ኦሶነ ጎይኖ ዶምስ። 32 ሳማረን እ ኬፅስዳ ባኣለ ኤቃ ኬꬃን ያርሾ በሲ ኬፅስ። 33 ቃስ አካብ አሼራ ጌተትያ ፆሰ ምስልያ ኤስድ፥ ባፐ ስን ደእዳ ካዎታ ኡባፈ አꬅድ ጎዳ እስራኤለ ፆሳ ሀንቀꬅያ ናጋራ ኦꬅስ።

34 አካባ ካዎተꬃ ዎደ ቤተለፐ ይዳ፥ ህኤላ አደይ እያርኮ ዛሪድ ኬፅስ። ናወ ናኣ እያሱ ባጋራ ጎዳይ ኦድዳይሳዳ፥ ህኤል እያርኮ ኬፃናዉ ባስያ ዎደ አቤሮ ጌተትያ ባይራ ናአይ ሀይቅስ። ቃስ ሳንቃ አꬅያ ዎደ ሳጉባ ጌተትያ ካሎ ናአይ ሀይቅስ።

<- 1 ካዎታ ማፃፋ 151 ካዎታ ማፃፋ 17 ->