1 ባንታ ጩጋን ጩጋን ካዎተꬃ አይስያ እስራኤለ ሶ አሳ ሀላቃት፥ ሻላቃትነ ማቶ ሀላቃት ሀይሳፈ ካልድ ፃፈትዳይሳታ። እስ እስ ጩጋን 24,000 አሳት ደኦሶና። እስ እስ ጩጋይ ላይꬃን እስ አጌና ማራን ማራን ካዎተꬃ ኦሶ ኦꬃናዉ ከዬስ።

2 ኮይሮ አጌናን ከያ ጩጋ ካለይ ዛብድኤላ ናኣ ያሾብኣማ፤ እያ ጩጋን 24,000 አስ ደኤስ። 3 ያሾብኣም ፓረሳ ኮቸ፤ እ ኮይሮ አጌናስ ቶራ ሞጮናታ።

4 ናምአንꬆ አጌናን ከይያ ጩጋ ካለይ አሆሀ አድያ ዶዳያ፤ እያ ጩጋን 24,000 አስ ደኤስ። ሄ ጩጋ ካለꬅያ ናምአንꬆ ሀላቃይ ምክሎታ።

5 ሄꬓንꬆ አጌናን ከይያ ጩጋ ካለይ ካህንያ ዮዳሄ ናኣ ባናያ፤ እያ ጩጋን 24,000 አስ ደኤስ። 6 ባናይ ሀስታሙ ኤረትዳ አሳታ ግዶን ምኖ አስ፤ ቃስ ሀስታማታ ሀላቃ። እያ በሳን እያ ናአይ አምዛባድ ሀላቃ ግድስ።

7 ኦይዳንꬆ አጌናን ከይያ ጩጋ ካለይ እዮኣባ እሻ አሳሄላ፤ እያ ጩጋን 24,000 አስ ደኤስ። እያ በሳን እያ ናአይ ዛባድ ሀላቃ ግድስ።

8 እቻሻንꬆ አጌናን ከይያ ጩጋ ካለይ ይስሃራ ያራፐ ሻምሁታ፤ እያ ጩጋን 24,000 አስ ደኤስ።

9 ኡሱፑንꬆ አጌናን ከይያ ጩጋ ካለይ ተቁሄ አድያ እስካ ናኣ እራ፤ እያ ጩጋን 24,000 አስ ደኤስ።

10 ላፑንꬃ አጌናን ከይያ ጩጋ ካለይ ኤፍሬማ ኮቸ ግድዳ ፕሎና አድያ ሰለሳ፤ እያ ጩጋን 24,000 አስ ደኤስ።

11 ሆስፑንꬃ አጌናን ከይያ ጩጋ ካለይ ሁሻ አድያ ስባካያ፤ እያ ጩጋን 24,000 አስ ደኤስ። ስባካይ ይሁዳ ኮቸነ ዛራ ያራ።

12 ኡዱፉንꬆ አጌናን ከይያ ጩጋ ካለይ ብንያመ ኮቸ ግድዳ አናቶተ አድያ አብኤዘራ፤ እያ ጩጋን 24,000 አስ ደኤስ።

13 ታማንꬆ አጌናን ከይያ ጩጋ ካለይ ናፆፋ አድያ ዛራ ያራ ግድዳ ማህራ፤ እያ ጩጋን 24,000 አስ ደኤስ።

14 ታማነ እስንꬆ አጌናን ከይያ ጩጋ ካለይ ኤፍሬማ ኮቸ ግድዳ ፕርአቶና አድያ ባናያ፤ እያ ጩጋን 24,000 አስ ደኤስ።

15 ታማነ ናምአንꬆ አጌናን ከይያ ጩጋ ካለይ ጎቶንያላ ያራፐ ግድዳ ናፆፋ ሄልዳያ፤ እያ ጩጋን 24,000 አስ ደኤስ።

16 እስራኤለ ኮቻታ አይሳናዉ ሹመትዳይሳት ሀይሳፈ ካልድ ፃፈትዳይሳታ።

ሮቤላ ኮቻ አይሰይ ዝክራ ናኣ አላዛራ።

ስሞና ኮቻ አይሰይ ማእካ ናኣ ሳፋፃ።

17 ሌወ ኮቻ አይሰይ ቃሙኤላ ናኣ ሀሳባያ።

አሮና ኮቻ አይሰይ ሳዶቃ።

18 ይሁዳ ኮቻ አይሰይ ዳዊታ እሻ ኤልሁ።

ይሳኮራ ኮቻ አይሰይ ምካኤላ ናኣ ኦምራ።

19 ዛብሎና ኮቻ አይሰይ አብድዩ ናኣ ያሽማያ።

ንፍታለመ ኮቻ አይሰይ አዝርኤላ ናኣ ያርሞታ።

20 ኤፍሬማ ኮቻ አይሰይ አዛዛ ናኣ ሆሰአ።

ምናሰ ኮቻፈ ባጋ አይሰይ ፓዳያ ናኣ እዩኤላ።

21 ጋላዳን ደእያ ምናሰ ኮቻፈ ባጋ አይሰይ ዛካርያሳ ናኣ እዶ።

ብንያመ ኮቻ አይሰይ አበኔራ ናኣ የእስኤላ።

22 ዳነ ኮቻ አይሰይ ይሮሃማ ናኣ አዛርኤላ።

ሀይሳቲ እስራኤለ ኮቻ አይሰይሳታ።

23 ጎዳይ እስራኤለ አሳ ሳሎ ፆልንቶዳ ዳርሳና ግዳ ግሾ ዳዊቲ ላታሙ ላይꬅነ እያፐ ጋርሳራ ደኤይሳታ ታይቦን ገልስቤና። 24 ፃሩያ ናአይ እዮኣብ አሳ ታይቦ ዶምድ ዉርሶና አግስ። አሳ ታይብዳ ግሾ ጎዳይ እስራኤለ አሳ ቦላ ሀንቀትዳ ግሾ ኤንታ ታይቦይ ካዋ ዳዊታ ታርከ ማዝጋበን ፃፈትቤና።

25 ካዎ ቡቁራ ምንጅያ በሳ አዋተꬃን አይስያ አሳ ሱንꬃይ ሀይሳፈ ካልድ ፃፈትዳይሳታ። አድኤላ ናኣ አዝሞት ካዎ ኬꬃ ቡቁራ አዋተꬃን አይሴስ።

ኦዝያና ናአይ ዮናታን ጋፃረን፥ ካታማንነ ጉታን ደእያ ካዎ ኬꬃ ሚሸታ አዋተꬃን አይሴስ። 26 ካሉባ ናአይ እዝር ጎሻንቾታ አዋተꬃን አይሴስ። 27 ራማ አደይ ሳመእ ዎይነ ጋደታ አዋተꬃን አይሴስ። ሳፋማ አደይ ዛብድ ዎይነ ኡሻ ምንጅያ ኬꬃ አዋተꬃን አይሴስ።

28 ጋዳራ አደይ ባአል-ሀናን ዙማ ቦላ ደእያ ዛይተ ሻማሁዋነ ቦባ አዋተꬃን አይሴስ። ዛይተ ዎꬅያ ኬꬃ አዋተꬃን አይሰይ እዮኣሳ። 29 ሳሮና ደንባን ሄመትያ መህያ አዋተꬃን አይሰይ ሳሮና አድያ ሳፅራ። ዛንጋራን ሄመትያ መህያ አዋተꬃን አይሰይ አድላያ ናኣ ሻፋፃ። 30 ግማለታ አዋተꬃን አይሰይ እስማኤላ አድያ ኡብሳ። ሀረታ አዋተꬃን አይሰይ መሮኖታ አድያ የህዳያ። 31 ዶርሳታነ ዴሻታ አዋተꬃን አይሰይ አጋራ አደይ ያዝዛ። ሀይሳቲ ኡባይ ዳዊታ ሻሉዋ ቦላ አዋተይሳታ።

32 ዳዊታ አዋ እሻይ፥ ፃፈይ ዮናታን አኬካነ ካዋ ዞርያ አስ። ሀክሞና ናአይ ይኤል ካዋ ናይታ ታማርሴስ። 33 አክፆፈል ካዋ ዞረይሳ። አርካ አደይ ኩስ ካዋ ላገ። 34 አክፆፈል ሀይቅን፥ እያ በሳን ባናያ ናአይ ዮዳሄይነ አብያታር ካዋ ዞርያ አስ ግድዶሶና፤ እዮኣብ ካዋ ቶራ ሞጮና።

<- 1 ታርከ ማፃፋ 261 ታርከ ማፃፋ 28 ->