15
ዉርሴꬃ ቦሻታ
1 ታኒ ሳሎን ሃራ ጊታኔ ማላሊሲያ ማላታ ቤዓስ። ፆሳ ዉርሴꬃ ሃንቁዋ ቆንጪሲያ ላፑን ቦሻታ ኦይኪዳ ላፑን ኪታንቾቲ ዴዖሶና።
2 ቃሲ ታማራ ዋላኬቲዳ ቡርጩኮ ኣባ ዳኔይሳ ቤዓስ። ሄ ኣባ ጋፃን ዶዓ፥ ኢያ ሚሲሊያኔ ኢያ ሱንꬃ ታይቡዋ ፆኒዳይሳታ ቤዓስ። ፆሳይ ኤንታው ኢሚዳ ዲꬃ ኦይኪዲ ኤቂዶሶና። 3 ኤንቲ ፆሳ ኣይሊያ ሙሴ ማዝሙሪያኔ ዶርሳ ማዝሙሪያ ሃይሳዳ ያጊድ ዬፆሶና።
«ጎዳው፥ ኡባፌ ዎልቃማ ፆሳው፥
ኔ ኦሶይ ጊታኔ ማላሊሲያባ።
ዴሬ ኡባ ካዋው፥
ኔ ኦጌይ ፂሎኔ ቱማ። [a]
4 ጌሺ ኔ ፃላላ ጊዲያ ጊሾ
ጎዳው፥ ኔው ያዮናይኔ
ኔ ሱንꬃ ቦንቾናይ ኦኔ?
ኔ ፂሎ ኦሶይ ኣሳ ኡባስ ቆንጬ ጊዲያ ጊሾ
ካዎቴꬂ ኡባይ ኔ ሲንꬄ ዪዲ ጎይናና»
ያጊዲ ዬፆሶና። [b]
5 ሄሳፌ ጉዬ፥ ሳሎን ዶዬቲዲ ዴዒያ ፆሳ ኬꬃ፥ ኢካ ማርካቴꬃ ዱንካኒያ ቤዓስ። [c] 6 ላፑን ቦሻታ ኦይኪዳ ላፑን ኪታንቾቲ ፆሳ ኬꬃፌ ኬዪዶሶና። ኤንቲ ጌሺኔ ጶሊያ ሊኖ ማዖ ማዒዶሶና፤ ባንታ ቲራን ዎርቃ ዳንጮ ዳንጪዶሶና። 7 ኦይዱ ሜꬌቴꬃታፔ ኢሶይ፥ ሜሪናው ዴዒያ ፆሳ ሃንቆይ ኩሚዳ ላፑን ዎርቃ ፁዓታ ላፑን ኪታንቾታስ ኢሚስ። 8 ፆሳ ቦንቹዋፌኔ ኢያ ዎልቃፌ ዴንዶይሳን ፆሳ ኬꬃይ ጩያን ኩሚስ። ላፑን ኪታንቾቲ ኦይኪዳ ላፑን ቦሻቲ ፖሌታና ጋካናው ፆሳ ኬꬃ ኦኒካ ጌላናው ዳንዳዒቤና። [d]
<- ዮሃኒሳ ቆንጬꬃ 14ዮሃኒሳ ቆንጬꬃ 16 ->