1 ሂዛ፥ ሂንቴ ኪሪስቶሳራ ሃይቆፔ ዴንዲዳይሳዳ፥ ፆሳፌ ኡሻቻ ባጋን ኡቲዳ ኪሪስቶሲ ዴዒያ ቤሳን፥ ሳሎን ዴዒያባታ ኮዪቴ። ማዝ 110፡1 2 ሳሎን ዴዔይሳታ ቦላ ሂንቴ ቆፋ ዎꬂቴፔ ኣቲን ሳዓን ዴዒያባታ ቦላ ዎꬆፊቴ። 3 ሂንቴ ሃይቆን ሻኬቲዳ ሜላ ሃ ኣላሚያፔ ሻኬቲዴታ። ሂንቴ ዴዖይ ኪሪስቶሳራ ኢሲፌ ፆሳን ጌሚስ። 4 ሂንቴው ዴዖ ጊዲዳ ኪሪስቶሲ ቆንጪያ ዎዴ ሄ ዎዴ ሂንቴካ ኢያራ ቦንቾን ቆንጫና።

5 ሄሳ ጊሾ፥ ሂንቴናን ዴዒያ ኣላሜ ኣሞታ ዎꬊቴ። ሄሳቲካ ላይማቴꬂ፥ ቱናቴꬂ፥ ላይማታናው ኣሞቴꬂ፥ ኤቃ ጎይኖ ሜላ ጊዲዳ ኡዜቴꬂ። 6 ሃይሳታ ጋሶን ፆሳ ሃንቆይ ኪቴቶና ኣሳ ቦላ ያና። 7 ሂንቴካ ካሴ ሄ ኢታ ኦጊያን ቢያ ኣሳ ጊዶን ዴዒሼ ሃይሳታ ኦꬂዴታ።

8 ሃዒ ሂንቴ ሄሳታ ኦꬆፊቴ። ቃሲ ሃንቆ፥ ኢፆ፥ ካቺ፥ ዚጊርሲኔ ቦርሶ ኦዳ ሂንቴፌ ዲጊት። 9 ጬጋ ኣሳቴꬃ ኢያ ኦሱዋራ ሂንቴፌ ቃሪዳ ጊሾ ኢሶይ ኢሱዋስ ዎርዶቶፒቴ። ኤፌ 4፡22 10 ፆሳ ሜꬎ ዳኒያ፥ ኤራቴꬃን ላሜቲዳ ኦራꬃ ኣሳቴꬃ ማዒቴ። ሜꬌ 1፡26፤ ኤፌ 4፡24 11 ሃ ኦራꬃ ሜꬌቴꬃን፥ ጊሪኬ ኣሲ ዎይኮ ኣይሁዴ ኣሲ፥ ቃፃሬቲዳይ ዎይኮ ቃፃሬቶናይ፥ ባርባሬ ኣሲ *ባርባሬ ኣሲ፡ ጉሳይ ታማሪቦና ዎይኮ ኤሮና ዎይኮ ዬሌቲዳ ሜላ ሲዒ ጊዲ ዴዒያ ኣሲ ጉሱ። ዎይኮ ኢስኩቴ ኣሲ †ኢስኩቴ ኣሲ፡ ጉሳይ ዎዛና ሚኖ ኣሲ ዎይኮ ዎዛና ኢታ ኣሲ ጉሱ። ኣይሌይ ዎይኮ ዎማኖይ ባዋ። ኪሪስቶሲ ኡባ፤ ኢ ኡባን ዴዔስ።

12 ሄሳ ጊሾ፥ ፆሳን ዶሬቲዳ ኣሳዳ ጌሻታኔ ዶሴቲዳይሳታ ጊዲዲ፥ ማሮቴꬃ፥ ኬሃቴꬃ፥ ኣሽኬቴꬃኔ ዳንዳዓ ማዒቴ። ኤፌ 4፡2 13 ኢሶይ ኢሱዋ ዳንዳዒቴ። ኦኒካ ባ ላጊያን ቆሄቲዳባይ ዴዒኮ ኢያው ኣቶ ጎ። ጎዳይ ሂንቴው ኣቶ ጊዳይሳዳ ሂንቴካ ዎሊስ ኣቶ ጊቴ። ኤፌ 4፡32 14 ሄ ኡባ ቦላ ኡባባ ኢሲፌ ሺሺዲ ቃቺያ ሲቆ ማዒቴ። 15 ፆሳይ ሂንቴና ኢሲ ኣሲ ኦꬂዲ ፄጊዳይ፥ ሳሮቴꬃስ ጊዲያ ጊሾ ኪሪስቶሳ ሳሮቴꬃይ ሂንቴ ዎዛና ሃሮ።

16 ኪሪስቶሳ ቃላይ ሂንቴ ዎዛናን ኩሚዲ ዴዖ። ጪንጫቴꬃ ኡባን ኢሶይ ኢሱዋ ታማርሲቴኔ ዞሪቴ። ማዝሙሬን፥ ሳባኒኔ ኣያና ዬꬃን ፆሳ ዎዛናፔ ጋላቲሼ ዬፂቴ። ኤፌ 5፡19-20 17 ፆሳ ኣዋ ዬሱሳ ባጋራ ጋላቲሼ ሂንቴ ኦዴቲያባ ዎይኮ ኦꬂያባ ኡባ ጎዳ ዬሱሳ ሱንꬃን ኦꬂቴ።

18 ማቼቶ፥ ኣማኒያ ኣሳስ ቤሲያባ ጊዲያ ጊሾ ሂንቴ ኣዚናታስ ሃሬቲቴ። ኤፌ 5፡22፤ 1ጴፂ 3፡1

19 ኣዚናቶ፥ ሂንቴ ማቼታ ሲቂቴ፤ ኤንታው ኢቶፒቴ። ኤፌ 5፡25፤ 1ጴፂ 3፡7

20 ናይቶ፥ ሂንቴና ዬሊዳይሳታስ ኡባባን ኪቴቲቴ፤ ሄሲ ጎዳ ኡፋይሲያባ። ኤፌ 6፡1

21 ኣዋቶ፥ ሂንቴ ናይቲ ኡፋይሲ ቃንፆና ሜላ ኤንታ ጫሜꬆፊቴ።ኤፌ 6፡4

22 ኣይሌቶ፥ ሳዓን ሂንቴው ጎዳ ጊዲዳይሳታስ ኡባባን ኪቴቲቴ። ጎዳ ቦንቺሼ ሱሬ ዎዛናፔ ኪቴቲዲ ኤንታ ኡፋይሲቴፔ ኣቲን ኣሲ ቤዖ ጊዲ ኦꬆፊቴ።ኤፌ 6፡5-8 23 ሂንቴ ኦꬂያ ኦሶ ኡባ ኣሳስ ጊዶናሺን ጎዳስ ኦꬂያ ሜላ ዎዛናፔ ኦꬂቴ። 24 ጎዳፔ ላታ ዎይቶ ኦꬂዲ ሂንቴ ኤኬይሳ ኤሪቴ፤ ሂንቴ ጎዳ ኪሪስቶሳ ሃጋዜታ። 25 ፆሳይ ኣሳ ሶምዖ ቤዒዲ ፒርዶና ጊሾ ኦኒካ ኢታ ኦሶ ኦꬂኮ ባ ኢታ ኦሱዋ ጊሾ ዛሮ ኤካና። ኤፌ 6፡5-8