3 ኑ ኦዲያ ዎንጌላይ ጌሚዳባ ጊዲኮካ፥ ጌሚዳይ ꬋዮ ኦጌን ዴዒያ ኣሳሳ። 4 ሃ ኣላሚያ ሃሪያ ፆሳይ ኣማኖና ኣሳ ዎዛና ጎዚስ። ኤንቲ ፆሳ ማላን ቆንጪዳ ኪሪስቶሳ ቦንቾ ዎንጌላ ፖዑዋ ቤዖና ሜላ ዲጊስ። 5 ኑኒ፥ ዬሱስ ኪሪስቶሲ ጎዳ ጊዴይሳኔ ኑ ኢያ ጊሾ ሂንቴ ኦሳንቾ ጊዴይሳ ኦዶሲፔ ኣቲን ኑባ ኦዶኮ። 6 «ꬉማን ፖዖይ ፖዖ» ጊዳ ፆሳይ፥ ኪሪስቶሳ ሶምዑዋን ፖዒያ ፆሳ ቦንቹዋ ኤራ ፖዑዋ ኢማናው ባ ፖዑዋ ኑ ዎዛናን ፖዒሲስ። [a]
7 ሺን ኡባፌ ኣꬊያ ዎልቃይ ኑባ ጊዶናሺን ፆሳባ ጊዴይሳ ቤሳናው ሃ ቦንቾ ሻሎይ ሜቃ ሚሼ [b] ጊዲዳ ኑ ኣሳቴꬃን ዴዔስ።
8 ኑ ኡባ ባጋራካ ዋዬቲዳ፥ ሺን ሜቄሬቲቦኮ። ኑስ ሃዲርሲ ጊዲስ፥ ሺን ኡፋይሲ ቃንፂቦኮ። 9 ኑ፥ ሞርኬታን ጎዴቲዳ፥ ሺን ላጌ ꬋዪቦኮ። ኑ ሞርኬታን ሾጬቲዲ ኩንዲዳ፥ ሺን ꬋዪቦኮ። 10 ዬሱሳ ዴዖይ ኑ ኣሳቴꬃን ቆንጫና ሜላ ኢያ ሃይቁዋ ኡባ ዎዴ ኑ ኣሳቴꬃን ቶኪዲ ዩዮስ። 11 ዬሱሳ ዴዖይ ሃይቂያ ኑ ኣሳቴꬃን ቆንጫና ሜላ ፓፃ ዴዒያ ኑኒ ኢያ ጊሾ ኡባ ዎዴ ሃይቆስ ኣꬊዲ ኢሜቶስ። 12 ሂዛ፥ ሃይቆይ ኑናን ኦꬂያ ዎዴ ዴዖይ ሂንቴናን ኦꬄስ።
13 ጌሻ ማፃፋን፥ «ታ ኣማናስ፤ ሄሳ ጊሾ ሃሳያስ»[c] ያጌቲስ። ሄሳ ሜላ ኣማኖይ ኑስ ዴዒያ ጊሾ ሃሳዮስ። 14 ጎዳ ዬሱሳ ሃይቆፔ ዴንꬂዳ ፆሳይ፥ ኑናካ ዬሱሳራ ሃይቆፔ ዴንꬃናይሳኔ ሂንቴራ ኢሲፌ ባ ሲንꬄ ሺሻናይሳ ኤሮስ። 15 ሄሲ ኡባይ ሃኒዳይ ሂንቴ ጊሾሳ። ፆሳ ኣꬎ ኬሃቴꬃይ ዳሮ ኣሳ ጋኪያ ዎዴ ኣሳይ ፆሳ ቦንቹዋስ ዳሮ ጋላታ ኢማና።