SAN MATEO 8

Jesús umbɨgüera cuimbae ipire ocui vae

(Mr 1.40-45; Lc 5.12-16)

1 Jare Jesús ugüeyɨ ma ɨvɨtu guasu güi yave, jeta yugüɨraa jaɨcue. 2 Jayave ou Jesús oĩ vae pe penti cuimbae ipire ocui vae. Uyeatɨca Jesús jovai.

—CheYa, ndipota yave, ndepuere chembɨgüera —jei chupe.

3 Jayave Jesús oñono ipo jese.

—Aipota. Ecuera —jei chupe.

Jare jupivoiño cuimbae ucuera imbaerasɨ güi. Ocui'ã ma ipire. 4 Jayave Jesús jei chupe:

—Agüɨye emɨmbeu quía pe. Ecua iyeechaca sacerdote pe, jare emee ofrenda Moisés peocui rami, tenta guasu pegua reta uicuaa vaerã ndecuera ma co —jei.

Jesús umbɨgüera sundaro reta juvicha jembiocui

(Lc 7.1-10)

5 Jare Jesús oo uvãe yave Capernaum pe, ou jae oĩ vae pe penti sundaro reta juvicha uyerure vaerã chupe mbae re. 6 Jae jei Jesús pe:

—CheYa, cherembiocui imbaerasɨ oĩ cherenta pe. Ipuere'ã omɨ. Jasɨ ete oĩ chupe —jei.

7 Jayave Jesús jei chupe:

—Taa tambɨgüera.

8 Ẽrei sundaro reta juvicha jei chupe:

—CheYa, agüɨye ecua cherenta pe. Echa'ã mbae'ã co che. Ndepuere ndere cua güiño cherembiocui ucuera vaerã jare ucuerata co —jei—. 9 Echa'ã ime mburuvicha mbaepuere güɨnoi cheré vae reta. Jae ramiño vi che anoi mbaepuere sundaro reta re. Che jae penti sundaro pe: ‘Ecua’, jare jae oo. Jae ramiño vi che jae ĩru sundaro pe: ‘Eyu’, jare jae ou. Jae ramiño vi che jae cherembiocui pe: ‘Iyapo cua’, jare jae uyapo —jei.

10 Jare Jesús cua uyandu yave, ipɨacañɨ sundaro reta juvicha re, jare jei yugüɨraa jaɨcue vae reta pe:

—Añete che jae peve, avãe'ã cua nunga mburugüɨrovia tuicha vae Israel pegua reta ipɨte pe. 11 Jare che jae peve, jeta vae yugüeruta guarasɨ oẽ vae cotɨ güi jare guarasɨ uique vae cotɨ güi jare uguapɨta reta Abraham jare Isaac jare Jacob ndive mboroyocuia ara pegua pe —jei—. 12 Ẽrei mboroyocuia pe yugüɨrecota tẽi vae reta uyemombocata oca pe pɨ̃tumimbi oĩ vae pe. Joco pe uyaota reta jare jãi umbɨquɨrɨrɨuta —jei.

13 Jayave Jesús jei sundaro reta juvicha pe:

—Ndepuere ndeo. Ayapo ma ndipota ayapo vaerã vae nderovia cheré ramo —jei.

Jare jocua ora pe etei sundaro reta juvicha jembiocui ucuera.

Jesús umbɨgüera Pedro jaicho

(Mr 1.29-31; Lc 4.38-39)

14 Jare Jesús uique Pedro jenta pe yave, uecha Pedro jaicho jacu oĩ jupa pe. 15 Jayave Jesús uipɨsɨ ipo pe jare jacu upɨta voi chugüi. Jayave cuña upũa jare umee mbae jou reta vaerã.

Jesús umbɨgüera jeta imbaerasɨ vae reta

(Mr 1.32-34; Lc 4.40-41)

16 Jare guarasɨ uique ma yave, tenta guasu pegua reta güeru Jesús pe jeta aña oya jese vae reta. Jayave Jesús oyocui aña reta usɨrɨ vaerã opaete oya jese vae reta güi, jare umbɨgüera opaete imbaerasɨ vae reta. 17 Jucuarãi uyapo Jesús uyeyapo vaerã Tumpa iñee aracae umɨmbeu vae Isaías jei vae. Echa'ã jae jei cuarãi: “Jae etei güɨraa yandegüi yanembaerasɨ reta.”

Jesús jupíe uipota yugüɨraa vae reta

(Lc 9.57-62)

18 Jare jeta yugüeru Jesús oĩ vae pe. Jare Jesús uecha yave, jei jemimboe reta pe yugüɨraa vaerã ɨ guasu jovaicho pe. 19 Jare penti mboroyocui re oporomboe vae ou Jesús oĩ vae pe jare jei chupe:

—Oporomboe vae, taa nderupíe opaete que rupi ndeo vae rupi.

20 Jayave Jesús jei chupe:

—Aguara reta güɨnoi icua reta, jare güɨra reta güɨnoi jaitɨ reta. Ẽrei che cuimbaerã ayeyapo vae mbaetɨ cherenta —jei.

21 Jare ĩru jemimboe jei Jesús pe:

—CheYa, emaeño rani cheré aa vaerã aico cheru re umano regua.

22 Ẽrei Jesús jei chupe:

—Eyu cherupíe. Tecove opa mbae vae güɨnoi mbae vae reta toñotɨ umano vae reta —jei.

Jesús umɨquĩi ɨvɨtu jare ɨ guasu

(Mr 4.35-41; Lc 8.22-25)

23 Jayave Jesús uyupi chalana pe jare jemimboe reta vi uyupi pɨpe. 24 Jare ou ɨvɨtu tanta uyepeyu, jare ɨ uyembɨaparoaroa uique chalana pe, jare umɨtɨnee seri ma. Ẽrei Jesús oque oĩ. 25 Jayave Jesús jemimboe reta yugüɨraa omomba. Jei reta chupe:

—OreYa, orerepɨ. Ñamanota ma.

26 Jayave Jesús jei chupe reta:

—¿Maera pa pequɨye? Michi ete co pepurugüɨrovia —jei.

Jayave upũa jare uñeengata ɨvɨtu jare ɨ guasu pe. Jare opaete voi quĩi ngatu upɨta. 27 Jare Jesús jemimboe reta ipɨacañɨ jare jei:

—¿Mbae nunga cuimbae pa cua? Ɨvɨtu jare ɨ guasu uyapo jae oyocui vae.

Mocui cuimbae aña oya jese vae reta

(Mr 5.1-20; Lc 8.26-39)

28 Jayave yugüɨraa uvãe ɨ guasu jovaicho pe, gadareno reta iɨvɨ pe. Jare yugüeru teõgüerɨrurenda güi oovãiti Jesús mocui cuimbae aña oya jese vae reta. Pochɨ reta. Jáeramo mbaetɨ quía ipuere uguata jocua tape rupi. 29 Jare jae reta iñeeãta reve jei:

—¿Maera pa ndeyu oremambeco, Jesús? Nde co jae Tumpa Taɨ. ¿Ndeyu pa ndiporaraca oreve añave? Taɨcue rupi ramo co ndiporaracata tẽi oreve —jei reta.

30 Jare mbɨrɨ catu jeta cuchi reta ucaru ñugüɨnoi. 31 Jare aña reta uyerure Jesús pe:

—Cua cuimbae reta güi orembɨsɨrɨ yave, emaeño oreré ndoo vaerã ndoya cuchi reta re.

32 Jayave Jesús jei chupe reta:

—Pecua.

Jare yugüɨraa ma yave cuimbae reta güi, aña reta yugüɨraa oya cuchi reta re. Jayave opaete cuchi reta tanta osi ɨvɨa rupi oa ɨ guasu pe, jare joco pe opa ipɨtupa reta.

33 Jayave cuchi iyandarecoa reta opa osi, jare yugüɨraa tenta guasu pe, jare umɨmbeu joco pegua reta pe opaete uyeyapo vae regua. Umɨmbeu vi chupe reta mbae aña oyase jese vae reta pe uyeyapo vae. 34 Jayave opaete joco pegua reta yugüeru oovãiti Jesús. Jare uecha yave, umɨñera oo ye vaerã jae reta iɨvɨ güi.

<- SAN MATEO 7 SAN MATEO 9 ->