SAN MATEO 4

Aña guasu umɨngueta Jesús uyavɨca vaerã tẽi chupe

(Mr 1.12-13; Lc 4.1-13)

1 Jayave Espíritu Santo güɨraa Jesús ñnaa pe. Jare joco pe aña guasu umɨngueta uyavɨca vaerã tẽi chupe. 2 Jare Jesús jou'ã mbae ave cuarenta ara. Jáeramo cuarenta ara uasa ma yave, iyembaɨ. 3 Jayave aña guasu umɨngueta uyavɨca vaerã tẽi chupe.

—Nde co jae Tumpa Taɨ yave, ere cua ita reta pe uyeyapo vaerã mbɨyaperã —jei.

4 Ẽrei Jesús jei chupe:

—Tumpa iñee pe uyecuatía oĩ cuarãi:

‘Icavi co ɨvɨ pegua reta jou vaerã mbɨyape güɨnoi vaerã tecove.

Ẽrei icavi ete co uyapɨsaca vaerã Tumpa iñee re jare uyapo vaerã jei vae güɨnoi vaerã tecove opa mbae vae.’

Jucuarãi uyecuatía oĩ —jei.

5 Jayave aña guasu güɨraa Jesús Jerusalén pe jare umbuyupi Tumpa jo iyapɨte re. 6 Jayave jei chupe:

—Nde co jae Tumpa Taɨ yave, ea cua güi. Echa'ã Tumpa iñee pe uyecuatía oĩ cuarãi:

‘Tumpa oyocuita ángel reta uyandareco vaerã nderé.

Ipo pe ndepɨsɨ ndeocota reta,

agüɨye vaerã ndepɨ uyererocua ita re.’

Jucuarãi uyecuatía oĩ —jei.

7 Jayave Jesús jei chupe:

—Tumpa iñee pe uyecuatía oĩ cuarãi: ‘Che co jae ndeYa Tumpa. Agüɨye mbae iyapo ndicuaa vaerã tuicha ra chepɨaguasu.’ Jucuarãi uyecuatía oĩ —jei.

8 Jayave aña guasu güɨraa Jesús penti ɨvɨtu guasu ɨvate vae re jare uechaca chupe opaete mburuvicha guasu reta iporoyocuia ɨvɨ pe ñugüɨnoi vae reta opaete ipõra vae reve. 9 Jayave aña guasu jei chupe:

—Tamee ndeve opaete cua, ndiyeatɨca yave chembɨadora vaerã.

10 Jayave Jesús jei chupe:

—Esɨrɨ chegüi, Satanás. Echa'ã Tumpa iñee pe uyecuatía oĩ cuarãi: ‘Che co jae ndeYa Tumpa. Chembɨadora. Jaeño cheve iyeyocui.’ Jucuarãi uyecuatía oĩ —jei.

11 Jayave aña guasu usɨrɨ Jesús güi, jare jupivoi yugüeru ángel reta omborɨ Jesús.

Jesús umbɨpɨ iparavɨquɨ

(Mr 1.14-15; Lc 4.14-15)

12 Jare Jesús uicuaa ma yave Juan uyemɨingueca ma co peresorɨru pe, oo Galilea pe. 13 Oo Nazaret güi uvãe tenta guasu Capernaum pe jare joco pe ico, (Capernaum oĩ ɨ guasu jembeɨ pe Zabulón jare Neftalí iɨvɨ pe) 14 uyeyapo vaerã Tumpa iñee aracae umɨmbeu vae Isaías jei vae. Echa'ã jae jei cuarãi:

15 “Zabulón iɨvɨ jare Neftalí iɨvɨ, ɨ guasu jembeɨ pe, Jordán jovaicho pe,

Galilea judío mbae vae reta pegua.

16 Pɨ̃tumimbi pe yugüɨreco vae reta uecha ma tembipe tuicha vae.

Mano iguarasɨ̃a pe yugüɨreco vae reta pe uyecuaa tembipe.”

Jucuarãi jei.

17 Jayave Jesús umbɨpɨ umɨmbeu Tumpa iñee. Jae jei:

—Peeya piyemɨngueta icavi mbae vae pepɨa pe oĩ vae. Echa'ã outa ma uvãe mboroyocuia ara pegua —jei.

Jesús ueni irundɨ cuimbae pira uipɨsɨ vae reta

(Mr 1.16-20; Lc 5.1-11)

18 Jare uguata rambueve Galilea pe ɨ guasu jembeɨ rupi, Jesús uecha Simón - jae co Pedro jee vae - jare Simón tɨvɨ Andrés jee vae. Jae reta omombo ñugüɨnoi pɨsa ɨ guasu pe, pira uipɨsɨ vaerã. Echa'ã jae reta pira uipɨsɨ vae reta co. 19 Jare Jesús jei chupe reta:

—Peyu cherupíe, jare che chembaepuere pe pemboeta ĩru vae reta güɨrovia vaerã cheré.

20 Jayave jae reta ueya voi ipɨsa, jare yugüɨraa jae jupíe.

21 Jesús oo catu ye joco güi, jare uecha Zebedeo taɨ reta. Penti jee Jacobo jare tɨvɨ jee Juan. Uyapɨcatu ñugüɨnoi pɨsa reta chalana pe tu ndive. Jayave Jesús ueni. 22 Jayave jae reta ueya voi chalana jare tu, jare yugüɨraa jae jupíe.

Jesús omboe jeta vae

(Lc 6.17-19)

23 Jare Jesús oo opaete Galilea rupi, jare oporomboe judío reta itupaopao rupi. Umɨmbeu ñee icavi vae Tumpa iporoyocuia pegua, jare umbɨgüera imbaerasɨ vae reta ipotave mbaerasɨ güi. 24 Jare opaete ɨvɨ Siria pegua reta uyandu Jesús uyapo vae regua. Jare ĩru vae reta güeru jae oĩ vae pe imbaerasɨ vae reta. Amocue vae uiporara ete jasɨ vae, jare aña oya amocue vae re, jare amocue vae imbɨquere, jare amocue vae ipuere mbae omɨ vae. Jayave Jesús umbɨgüera reta. 25 Jare yugüɨraa Jesús jaɨcue jeta vae Galilea güi, jare ɨvɨ Decápolis jee vae güi, jare Jerusalén güi, jare Judea güi, jare ɨãca Jordán jovaicho güi.

<- SAN MATEO 3 SAN MATEO 5 ->