1 Bala ŋuriŋi yolŋuyunydja walalay mukthurrunana djämana marrtjina bala, yana liŋgu‐u‐u ga bukmak yana dhawar'maraŋala. Ŋunhi walala liŋguna dhawar'maraŋalana, ḻoḻunydja ŋunhi dhärrana yukurrana yuṯana ŋanya dhika, bala walala yurrum'thurrunana waŋganylilina, bukmaknha yana ŋunhi ḏarramuwurru ga dhäykawurru ga djamarrkuḻi', ga ŋunhalana Godkalana Buṉbuŋura walala bukmaknha yukurrana djingaryurrunanydja waŋganynha mala. 2-3 Bala yana [a]Yitjurayunydja märraŋala djorra'na, bala maŋutji ḻapmaraŋalana, bala yana ŋayi marrtjina waŋanana bala, dhäruknha ḻakaraŋala Godku Romnha, ŋunhiyi liŋgu rom malanha ŋunhi ŋayi Godthu wekaŋala [b]Mawtjitjkala ŋäthili. Beŋuru liŋgu munhakumirriŋuru ga yana liŋgu‐u‐u ga milmitjpayina ŋayi marrtjina waŋananydja, dhäruktja ḻakaraŋala ŋuliŋuru djorra'ŋuru, ga yolŋunydja walala yukurrana bukmak yana djingaryurruna ŋunhili waŋganyŋura, mäkiri'‐witjurruna yukurrana gurrum' yana ŋurikiyi Godkalaŋuwu romgu.

4-5 Yo, ŋunhi ŋayi Yitjurayu djorrany'tja ḻapmaraŋala, bala yana yolŋunydja walala ḏurryurrunana bukmaknha, bala djingaryurrunana, liŋguna walala yukurrana gatjpu'yurruna Garraywunydja maḻŋ'thunarawu ŋuliwitjan dhärukkurru. 6 Ŋayi Yitjuranydja waŋana marrtjina wokthurrunana Garraywu, Godnhana yindi ḻakaraŋala, ga yolŋunydja walala ŋunhi bukmak yana goŋ‐garrwarthina, bitjarrayi liŋgu wokthurruna yukurrana Garraywu, “Yuwalknha, yuwalknha,” bitjarra. Bala yana walala buku‐nyilŋ'thurrunana munatha'lilina, buku‐ŋal'yurrunanydja yukurrana Garraywuna.

7-8 Yo, ŋayi Yitjurayunydja waŋana marrtjina ḻakaraŋala dhäruk bala ŋuliŋuruyi djorra'ŋuru, ga walala wiripu‐guḻku'yunydja ḻakaraŋala warraŋulkuŋala mayali'na bala, marŋgikuŋala wal'ŋu marrtjina ḻakaraŋala ŋuriki yolŋu'‐yulŋuwuna, märr yurru yolŋuyu walalay ŋuriŋiyi miṯtjiyu bukmakthuna dharaŋan marrtji bala ŋäma, bala yana marŋgithirrina wal'ŋu yurru. 9 Bala walala ŋunhi yolŋunydja nyä'yunminana marrtjina, liŋgu ŋuriŋi Godkala dhärukthu walalanha ŋayaŋuna ŋunhana wutthurruna, ga wirrkina dhikana walala wuyunminanydja walalaŋguway walala yätjpuynha.

Bala ŋanapurru, ŋarra Niyamayayunydja ga Yitjurayunydja ŋuriŋi ḏalkarra'mirriyu, ga ŋuriŋiyi marŋgikunharamirriyu walalay waŋana ŋunhi yolŋunha walalanha bitjarra, “Dhuwalana walu ŋunhi dharrpalnydja ŋilimurruŋgalaŋuwu Garraywunydja Godku. Yaka walala weyin nyä'yunmiya! Liŋguna ŋayi nhumalaŋgu yätjpuynydja bäy‐ḻakaraŋalana.”

10-11 Bala yana ŋuliŋurunydja ŋarra waŋana walalanha bitjarrana, “Nhiniyanydja walala ŋayaŋu‐djulŋithiya wal'ŋu. Ḻukiya ŋathanydja walala waŋganyŋura, ŋoy‐djulŋithiyana biyakana ya', ga rarr'yurrayi wiripuŋuwunydja yolŋuwu ŋunhi ŋayi dhäpark nhina yukurra. Yakana weyindja guyaŋinyamiya ga wuyunmiya, yana ŋayaŋu‐djulŋithiyana nhiniya, liŋgu Garraywalanydja ŋoy‐djulŋithinyarayu nhumalanha yurru ŋoy‐ḏälkumana.”

12 Bala yana ŋunhi yolŋunydja walala roŋi'‐ruŋiyinana marrtjina walalaŋgiyingalana wäŋalili malanyŋulili, goŋmirriyinanydja walala bena wirrkina dhika. Ŋunhalana walala ḻukana ŋathana yukurrana ga gapuna, ga biyapul walala rarr'yurruna marrtjina dhäparkmirriwanydja yolŋu'‐yulŋuwa ŋurruwuykmirriwanydja; ŋunhiyi yolŋunydja walala bukmaknha ŋoy‐djulŋithina bena dhika wiṯthurrunana, liŋgu walala marŋgithinana Godkunydja dhärukku, ŋunhi marrtjina walalaŋgu warraŋulkuŋala ḻakaraŋala, dharaŋanamirrina wal'ŋu.

<- NIYAMAYAWALAŊUWUY DHÄWU 7NIYAMAYAWALAŊUWUY DHÄWU 9 ->