BUKU‐ŊAL'YUNARAWUYNHA 26

Raypirri'yun yukurra ŋulaŋuru waŋarrwala wiripuŋuwala

26:1–46 (Promises and warnings)

1 Yo, Garrayyu nherrara rom dhuwala malanha gam' nhanukalaŋuwu ŋayi yolŋu'‐yulŋuwunydja. “Yaka nhuma yurru buku‐ŋal'yun ŋula nhaltjan wiripuŋuwunydja ŋuriki goŋbuywunydja waŋarrwu, ga yaka yana djäma ŋula nhä dharpa yolŋukuŋa ga wäyinguŋa ga bäpikuŋa maḏayin'kuŋanydja. Yaka yana nhe yurru yukirriya nherrala dharpa ga guṉḏa ŋula nhä ŋunhi walala yurru yolŋu'‐yulŋuyu yukurra nhäma ga ḻakarama ŋunhiyi maḏayin' waŋarr, liŋgu waŋgany ŋarrapi yana Godtja waŋarrnydja nhumalaŋgu. 2 Nhuma yurru ganaŋ'maraŋa ŋarrakuwaynydja ŋunhi walu, liŋgu ŋunhiyinydjayi nhinanharamirri walu dhuyuna ŋarrakuwaynha. Ga bitjandhi liŋgu nhuma yurru ŋarrakunydja ŋunhi buṉbunha ganaŋ'maramayi, yaka wakalkuŋanydja, liŋgu ŋunhiyinydjayi wäŋa ganaŋ'maranharana ŋarrakuwaynha wal'ŋu yana buku‐ŋal'yunarawu, liŋgu ŋarrapi waŋarrnydja wal'ŋu Garray nhumalaŋgu.” Ga bitjarra ŋayi Garray waŋananydja. 3-10 “Ŋuli nhuma yurru marrtji yukurra ŋarrakalaynydja yana wal'ŋu romgurru, ga märrama dhäruk ŋarranhaynydja, ŋarranydja yurru ŋunhi djäkana marrtji nhumalaŋgu, djuy'yunna ŋarra yurru waltjaṉnha nhumalaŋgu, märr yurru nhumalaŋgu wäŋanydja ŋunhiyi ḻatju' muka, gurarrthirri muka yurru ŋathanydja ga borumdja ga mulmunydja ga ŋula nhänydja, guḻku'na yurru wal'ŋu gurarrthirri yukurra, ga nhuma yukurra yurru nhina ŋunhiliyi wäŋaŋura walŋana, marimiriwnha yana ga barrarimiriwnha yurru. Yo, ŋamathamana nhuma yurru nhina yukurra, ŋayaŋu‐ŋamathirrina yanana, yakana yurru nhumalanha ŋula yolthu barrari‐wukumanydja. Ŋuli yurru miriŋunydja marrtji nhumalaŋgu, nhumanydja yurru yana ŋupanna barrari‐wukumana walalanha, baḏuwaḏuyunna warrpam'nha; nhumapina yurru djuḻkmaramanydja. Yo, djämana yana ŋarra yurru‐wala yulŋunydja, guŋga'yunna yurru ŋunhi dhäruk‐märranharamirrinhanydja yolŋu'yulŋunha, ga djäma ŋarra yurru yukurra bukmak yana ŋunhiyi ŋunhi nhaltjarra ŋarra dhawu'mirriyaŋala ŋäthili.

11-12 “Yo, ŋunhi nhuma yurru yukurra nhina ŋarrakalaynydja romŋura, ga märrama dhäruktja ŋarranha, bala ŋarranydja yurru yukurra nhinayi nhumalaŋgala ṉapuŋga yana; marrtji'‐marrtjinydja ŋarra yurru yukurra ŋuliyi nhumalaŋgala galki, yakana ŋarra yurru gonha'yun ga ḏiltjinydja wekama nhumalaŋgu. Ŋarranydja yurru nhumalaŋgu Garray Waŋarrnha, ga nhumanydja yurru ŋarraku yolŋuna walala. 13 Ŋäthilinydja nhuma yukurrana nhinana ŋunhalanydja [a]Yetjiptja dhuwurr‐garrpiṉara muka, yurru ŋarranydja nhumalanha dhawaṯmaraŋala warray, märr nhuma yurru nhina ŋayaŋu‐ŋamathirrina, ga marrtji yänana ŋula nhämiriwnha. Yo, ḏälkuŋa ŋarraku romdja, bala nhuma yurru nhina yukurra walŋana yana, ŋayaŋu‐ŋamathirrina yanana.

14-16 “Ga ŋuli nhuma yurru bilyundja, ḏiltjinydja wekama ŋarraku, yakanydja dhäruk märrama, bala ŋuyulkthirrinydja yurru ŋarrakalaŋuwu romgu, ga märr‐ŋal'yun wiripuŋuwunydja waŋarrwu, bala nhumanydja yurru ŋayaŋu‐yätjthinyaramirrina märrama ŋuriŋiyinydjayi romdhunydja. Yo, ŋula nhäna yurru maḻŋ'thun nhumalaŋgu, barrarimirrina rom. Nhuma yurru rirrikthunna, bala murrmurryunna, ga wiripu‐guḻkuny'tja yurru bambaythirrina marrtji, ga yalŋgi'yirrina rerriyuna. Ga djämanydja nhe yurru ŋula nhä ŋatha maŋutji dholkumanydja, yurru yakana nhuma yurru ḻukanydja ŋuliŋuruyi ŋathanydja, liŋgu ŋula yolnha miriŋuna yurru marrtji, bala walalana yurru ŋunhiyi gulkthundja, ga nhumanydja yurru djaṉŋarrmirrina nhina yukurra.

17 “Yo, ŋuli nhuma yurru gonha'yundja ŋarranha, ŋapanydja wekama ŋarraku, bala ŋarranydja yurru ŋapayi wekama nhumalaŋgunydja, bala nhumalaŋgu yurru miriŋuna marrtji, bumana nhumalanha yurru marrtji, bala ŋayina yurru buŋgawakunharamirri ŋanyapinyay ŋayi nhumalaŋgunydja, yana nhuma yurru waṉḏirrina yukurra yulŋunydja, barrarirrina yurru ŋula nhäkunydja. 18 Yo, balakurruyinydja ŋarra yurru nhumalanha yana marŋgikuma, märr nhuma yurru roŋiyirri ŋarrakala. Ŋuli nhuma yurru yakanydja bilyun yätjŋuru lili ŋarrakala, mukthundja yana märr‐yuḻkthundja ga ŋuyulkthirrinydja yurru ŋarraku, ŋarranydja yurru biyapulnha wal'ŋu ŋonuŋnha ŋula nhä gurrunhan nhumalaŋgu.

19 “Yo, nhumanydja ŋuli ŋunhi guyaŋinyamirri yanapi nhuma ganydjarr‐ḏilkurru, yurru ŋarranydja yurru ŋunhiyinha bakmarama warray, bala yurru nhe galkirrina yana ganydjarrmiriwyirrina yulŋunydja. 20 Yo, djämanydja nhuma yurru djäma warray, wirrki warray dhika, yurru yakana ŋayi yurru ŋatha ŋuthandja, ga dharpanydja yurru yakana borummirriyirri. 21-26 Ŋuli nhuma yurru mukthundja yana mäkiri'‐yarryundja ga ŋuyulkthirrinydja ŋarrakalaŋuwu romgu, yindina yurru marinydja marrtji nhumalaŋgu, ga wakinŋuna yurru wäyin maḏakarritjmirrina marrtji ga buma nhumalaŋgu yumurrku'nhana, ga guḻku'na yurru marrtji murrmurryun rerriyuna. Ga wiripunydja yurru miriŋuna marrtji, bala bumana marrtji, bak‐bakmaramana yurru marrtji nhumalaŋgu wäŋanydja, ga bukmak yurru nhuma djaṉŋarrnha yukurra nhina, liŋgu ŋathamiriwnha ŋunhiyi yukurra yurru wäŋa dhärra.

27 “Yo, bitjandhiyina yurru nhumalaŋgu maḻŋ'thundja, märr yurru nhuma bilyun roŋiyirriyi ŋarrakala, liŋgu nhumanydja dhuwala ŋarrakuway yana wal'ŋu. Ga ŋunhi nhuma yurru yaka bilyun ga roŋiyirri ŋarrakala, mukthun yurru nhuma yukurra yana märr‐ŋal'yun wiripuŋuwu waŋarrwu, ga yaka dhärukku malthun ŋarraku, 28 bala ŋarranydja yurru mirithirrina yana ŋaramurryirri nhumalaŋgu, wirrkina yana ŋarra yurru dhä‐ḏir'yundja nhumalanha.” Ga bitjarra ŋayi Garray waŋananydja. 29 “Yo, nhuma yurru mirithirrina yana djaṉŋarrthirrinydja, ga yana liŋgu‐u‐u ga wiripu‐guḻku'yunydja nhuma yurru ḻuka nhumalaŋguway yumurrku'nhana djamarrkuḻi'nha. 30 Ŋarra yurru ḏaw'‐ḏawyunna marrtji ŋunhiyinydjayi wäŋa ŋunhi wanhaŋumi nhuma yukurra buku‐ŋal'yun wiripuŋuwu waŋarrwu. Ŋunhiyi yurru nhumalaŋgu be waŋarrnydja burruḻ'yunna marrtji muṉguythirrina, ga nhumanydja yurru dhambayyi yana galkirri burruḻ'yun, rakunydhirrina marrtji ŋurikalayi nhumalaŋgalaŋuwala waŋarrwalana manapan. 31 Ŋarra yurru baḏuwaḏuyunna nhumalaŋgu ŋunhiyinha wäŋanhanydja, warrpam'nha yana baḏuwaḏuyun, ga ŋunhi nhuma yurru mundhurr‐wekama ŋarraku, ŋarra yurru ŋunhiyinydja yakana märrama nhumalaŋguŋu. 32 Ga ŋunhi ŋayi yurru miriŋunydja marrtji ŋunhimalayi nhumalaŋgala wäŋalili, bala nhämana, ga waŋa ŋayi yurru bitjanna, ‘Dhuwalanydja yätjnha wäŋa mirithirrina, warrpam'thunarana buḻwaŋ'maranhara, baḏuwaḏuyunara,’ bitjanna yurru.

33-39 “Yo, miriŋunydja yurru ŋunhiyi marrtjina lili, bumanydja marrtji walala yurru nhumalanha, barrkuwatjkumana yana wiripuŋulilina wäŋalili malaŋulili, ga dhuwalayinydja wäŋa yurru nhumalaŋgu yolŋumiriwnha yukurra djingaryun. Bala nhuma yurru mirithirrina barrarirrinydja, waṉḏirrina nhuma yukurra yurru gupa‐ḏawa'mirrina, bala galkirrina gänana yana, ŋunhi yakana nhumalaŋgala ŋayi yurru ŋunhi miriŋu galkithirri. Yakana nhuma yurru buku‐ruŋinyamarama ŋupandja bumanydja bala ŋunhiyi miriŋunhanydja, yana nhuma yurru nhina yukurra ŋunhilina miriŋuwalana goŋŋura, ŋunhana‐wala wuyupthunna barrkuna. Bala nhuma yurru raku'‐rakunydhirrinydja ŋunhilinayi barrkuna, mulkuruŋurana wäŋaŋura; märr‐ḻurrkun'nha yana yurru nhuma nhinanydja yukurra, ga walalanydja yurru ŋunhiyinydja walala yalŋgi'mirrina yanana, liŋgu ŋuriŋi walalaŋgala yätjthu romdhu.

40-45 “Ga ŋunhi nhuma yurru yukurra nhina ŋunhiliyi miriŋuwala goŋŋura bena‐wala barrkuna, bala nhumalaŋguŋu mala‐wunharanydja yurru bilyunna, ga waŋa wuyunna yurru, ḻakaranharamirrina yurru Godkala ŋurikiynha ŋunhi walala yukurrana djäma yätj. Ga bitjandhi liŋgu walala yurru wuyunna walalaŋgalaŋuwu märi'muwalaŋunydja yätjku, ŋunhi walala ŋapa‐wekaŋala ŋarraku, bala buku‐ŋal'yurruna wiripuŋuwuna waŋarrwu. Yo, ŋuliŋuruyina dhäŋuru ŋunhi nhuma wirrkina ŋayaŋu‐yätjthina yukurrana, liŋgu ŋuriŋi nhokala yätjthu, bala nhuma yurru nyilŋ'maranharamirrinydja nhumalanhay nhuma, bala yurru ŋarra yana buku‐ḻayyunna ŋuriŋiyi dhawu'yunydja ŋunhi ŋarra dhawu'‐nherrara ŋäthili [b]Yipurayimgala ga [c]Yitjakkala ga [d]Djaykupkala. Bala ŋarra yurru yana bäy‐ḻakaramana yulŋunydja nhumalaŋgu, bala biyapulyi nhuma yurru yulŋunydja ŋarrakuway yolŋu'yulŋunydja, ga ŋarranydja yurru nhumalaŋgu waŋarrnha, ga ŋunhiyi yurru manymaktja wäŋa nhumalaŋguwayyi. Yurru ŋäthilinydja nhuma yurru burakirri ŋayaŋu‐yätjthirri yana wirrki wal'ŋu, liŋgu nhuma ŋapa‐wekaŋala ŋarrakalaŋuwu romgu, ga yaka nhuma dhäruk‐märraŋala ŋarraku. Yurru yaka ŋarra yurru warrpam'thundja nhumalanha gonha'yun, yaka nhuma yurru bukmakthirrinydja murrmurryun ŋunhili miriŋuwalanydja goŋŋura, liŋgu ŋarranydja nherrara liŋgu dhawu'‐nherrara nhumalaŋgalanydja, ga ŋarranydja nhumalaŋgu waŋarr dhuwala God. Ŋäthilinydja wal'ŋu ŋunhinydja ŋarra nhumalaŋgu märi'munha dhawaṯmaraŋala märraŋala ŋulaŋuru Yetjipŋuru, ŋurikala miriŋuwala ŋarambiya'ŋuru goŋŋuru. Ga ŋunhi nhuma yurru wuyundja nhumalaŋgalaŋuwu yätjku, bala bilyun roŋiyirri ŋarrakalanydja, ga ḻakaranhamirrina yurru ŋarrakala ŋunhiyi ŋunhi nhuma djäma yätj dhuwurr, bala ŋarranydja yurru biyapul nhumalanha dhawaṯmaramana ŋuliŋuruyi miriŋuwalanydja goŋŋuru, märr yurru nhumanydja ŋarrakuwaynha yolŋu walala, ga ŋarranydja yurru nhumalaŋgu God waŋarrnha gupaḏalŋuwuna‐wala.”

46 Ga dhuwalayina ŋayi ŋunhiyi rom Godthu wekaŋala [e]Mawtjitjkalanydja ŋuriki nhanukalayŋuwunydja ŋayi yolŋu'‐yulŋuwu miṯtjiwu [f]Yitjuralpuyŋuwunydja.

Ŋurruŋunydja wekaŋa guḻk‐guḻkthunara nhanŋu Godku, liŋgu ŋunhiyinydja nhanŋuway dhulŋuŋu.

27:26–34 (The law about giving God his part of everything we have)

27:26–34

Ga dhuwalana wiripunydja rom ŋayi Garrayyu wekaŋala gam' [g]Mawtjitjkala nhanukalayŋuwu ŋayi yolŋu'‐yulŋuwu. “Ŋunhi yurru wäyin ŋurruŋu yothu dhawal‐wuyaŋirri, balanyara bitjan buliki ga ŋula nhä läm, nhumanydja yurru ŋunhiyinydja wäyin wekamana Garraywu, liŋgu nhanŋuwaynha ŋunhiyinydja ŋurruŋunydja dhawal‐wuyaŋinyara. Ga ŋunhi nhuma yurru ŋuthanmarama ŋathanydja ga ŋula nhä borum, nhuma yurru yana guḻk‐guḻkthurrayi biyaka 10‐guŋa, bala wekaŋa waŋganydja wakaṉna ŋuliŋuruyinydja Garraywuna, liŋgu nhanŋuway ŋunhiyinydja Garraywu, yaka nhuŋu. Yo, ŋula nhä nhe yurru märramanydja, nhe yurru ŋuliŋuruyi ganaŋ'maraŋa Garraywuna; guḻk‐guḻkthurranydja nhe yurru ŋäthili 10‐guŋa, ga waŋganydja ŋurruŋunydja ŋunhi guḻk‐guḻkthunara nhanŋuway Garraywuna ŋunhiyinydja, yakana yurru yolŋuyu ŋunhiyinydja, nhanŋuwayliliyama ŋayi.” Yo, dhuwalayina rom malanha ŋayi wekaŋalanydja Garrayyu Mawtjitjkala ŋunhala bukuŋuranydja.

<- BUKU‐ŊAL'YUNARAWUYNHA 25