5 Bala yana Djatjuwayunydja gulk‐gulkthurrunana wäŋanydja malanha bitjarra yana liŋgu ŋunhi Garrayyu ŋayipi ḻakaraŋala Mawtjitjkala bitjanarawu ŋäthili.

6 Ga waŋgany ḏarramu [a]Gayliptja yäku marrtjina withiyara ŋanya [b]Djatjuwanha, bala waŋana bitjarrana, “Way, birrka'yunga nhe yukurra ŋurukuynydja ŋunhi? . . . ŋunhi nhaltjarra Godthu ŋitjalanha ḻakaraŋala [c]Mawtjitjkala ŋäthili? 7 Ŋarranydja ŋunhi ŋulinyaramirriyu märr‐yuṯaŋga ḏarramu, 40‐ŋga ŋarraku dhuŋgarranydja, ŋunhi ŋayi ŋarranha Mawtjitjthu djuy'yurruna milthunarawu yana dhiyaku wäŋawu, ga balanydja ŋarra roŋiyinanydja gäŋala yuwalknha dhika dhäwuny'tja. Ŋilimurru bini ŋunhi marrtjinyana‐wala yana, ga märranha dhuwala wäŋa nhanukalana Garraywalana ganydjarryu. 8 Ŋuriŋinydja wiripu‐guḻku'yunydja wiripu warray dhäruk gäŋala, beyaṉu‐wekaŋala dhuwala yolŋunha warray walalanha, ga ŋarrapina malthurruna ŋarrakalaŋuwunydja Garraywu. Ŋarra ŋanya dhäruktja märraŋala yana warrpam'. 9 Bala Mawtjitjtja ŋunhi waŋana bitjarra warray ŋarrakala gam'. ‘Ŋunhiyinydjayi wäŋa ŋunhi nhe yukurrana marrtjina ŋuliwitjarrayi, muŋdhu'‐muŋdhurruna yukurrana, ŋunhiyinydja yurru djingaryun nhuŋuwaynha wäŋa, ga yumurrku'wuna nhokalayŋuwu, bili nhe yukurrana dhärrana nhanukalay yana yuwalkkuŋala wal'ŋu.’

10-11 “Yo, ŋunha wiripu‐guḻkuny'tja biliŋga murrmurryurruna, yurru ŋarranha ŋayi Garrayyu yukurrana gäŋalanydja walŋanha yana. Ga dhuwala ŋarra djawuḻpa'na, 85‐nha dhuŋgarranydja ŋarraku, yurru mukthun yana ŋarra dhuwala wuṉḏaŋarr yulŋunydja, yuṯa yana ŋarra mukthun yukurra nhina, balanyara yana liŋgu bitjarra ŋunhala ŋunhi ŋarranha ŋäthili Mawtjitjthu djuy'yurruna mel'ŋunha. Ŋarra yurru ŋupan yana buma dhuwala miriŋunhanydja, gukumana yurru Godkalana ganydjarryu. 12 Ma'! Wekaŋana nhe yurru ŋarraku wäŋa ŋunhanydja bala ya' buku'‐wukunydja, ŋunhi ŋäthili ŋarra djalkiri muŋdhu'‐muŋdhunara marrtjinyara yukurranhara. Liŋgu ŋunhiliŋumi wäŋaŋura yolŋu walala yukurra nhina djaka'‐weyinmirrina ga bathalamirrina rumbal. Godthu yurru guŋga'yundja ŋarranha, ga ŋarranydja yurru ŋupanna walalanha ŋulaŋuruyi ŋunhayi rom‐yätjmirrinhanydja walalanha.” Ga bitjarra ŋayi Gaylip waŋananydja yukurrana Djatjuwawala.

13 Ga Djatjuwanydja waŋana bitjarra buku‐ruŋiyinmaraŋala Gaylipkala, “Yuwalknha! Ŋunhayi bukunydja wäŋa [d]Yiprunbuynydja yurru nhuŋuna wäŋa. Godthunydja nhuna yurru guŋga'yunna yana.” 14 Ga dhiyaŋunydja‐wala ŋunha Yiprunbuynydja wäŋa mukthun yana Gaylipkalaŋuwu mala‐wunharawuywu, liŋgu ŋayi Gayliptja yukurrana malthurruna nhanŋuway Garraywu yana yuwalkkuŋala wal'ŋu.

15 Ga wäŋanydja ŋunhiyi [e]Yitjuralwuynydja ŋaraka liŋguna wapurarryinana, ga bukmak ŋunhi yana bäpurruny'tja malanha nhinana yukurra wapurarrŋurana liŋguna, marimiriwnha yanana yukurrana nhinana.

<- DJATJUWAWALAŊUWUY DHÄWU' 13DJATJUWAWALAŊUWUY DHÄWU' 15 ->