DJAWUPKALAŊUWUY DHÄWU 3

1-3 Bala yana ŋayi ŋuliŋurunydja Djawup waŋana bitjarra, “Nhäkuŋga ŋarra dhawal‐wuyaŋinanydja? Yakana ŋarranydja ḏukṯuk ŋarra yurru nhina yukurra weyin dhiyala wäŋaŋura. Ŋarranydja ḏukṯuk rakunydhinyarawu, märr ŋarra yurru dhawar'yunna dhipuŋuru rom‐mäypaŋuru wäŋaŋuru,” bitjarra.

4—37:24

Ŋuliŋurunydja dhurrwaraŋuru, bala yana walalanydja ŋunhi ḻundu'mirriŋunydja walala waŋana yukurrana Djawupkala, yurru weyinnha walala yukurrana waŋanhamina, dhä‐ḏälthinyaminanydja bitjarra, “Ma' nhe bilyurra biyakana yätjŋurunydja dhipuŋuru nhokalay romŋuru. Ŋunhi bini nhe yaka warray ŋula yätj djäma, ŋayi bini Godthunydja yaka muka nhuna rirrikmaranha, ga ŋula nhä nhuŋu mari bini maḻŋ'thunna yätj malanha yaka muka.”

Yurru ŋayi Djawuptja waŋana bitjarra gam', “Yaka warray ŋarra ŋula rom yätj djäma. Godtja marŋgina ŋarraku, ŋunhi ŋarranydja ŋuli bitjan liŋgu malthun nhanŋuwaynha dhärukku, ga yuwalkkuma yana ŋarra ŋuli märr‐ŋal'yundja nhanŋu.” Yurru walalanydja ḻundu'mirriŋunydja walala nhanbala mukthun warray yana waŋa marrtji ŋanya. “Ma' bilyurrana biyakana nhokalay yätjŋuru dhuwurrŋuru, yurruna Godthunydja yurru guŋga'yun walŋakumanydja nhuna.”

Bala yana ŋayi Djawuptja waŋana bitjarrana, “Yol balaŋu yolŋu djingaryun yurru ŋunhalanydja, ŋayi yurru waŋa ḻakarama ŋarranha Godkalanydja. Ŋarranydja marŋgina Godku ŋunhi ŋayi walŋa yana, ga ŋarranha ŋayi ŋuli walŋakumayi; ŋunhi yurru ŋunha bukuna mulka, ŋilinyu yurru djingaryun dhiyala munatha'ŋura. Dhuwala gay' rumbal ŋarra yurru winya'yundja rakunydhirrinydja, yurru barrwaṉ'mirriyu yana ŋarra yurru nhäma Garraynhanydja.”

Yo, gulkuruna Satandhunydja bilmaraŋala gatjarr'yurruna ŋanya Djawupnha, gulkuruna; galŋa‐yätjthina warray ŋayi yukurrana yulŋunydja, Djawup, ga yaka ŋayi marŋgithina nhäyu ŋunhi bitjarrayi maḻŋ'thurruna, yurru yakayi yana ŋuli ŋayi waŋanha rom‐nyamir'yuna Godnhanydja, dhäwulnha.

Yurru bitjanna liŋgu ŋunhiyi ḻurrkun'tja ḻundu'mirriŋu walala yukurra waŋana yana dhä‐ḏälthirrina. “Yana ŋayaŋu‐dhunupakunhamiya nhunapinyay nhe. Yaka yukirriya mukthurra marrtjiya yätjkurru romgurru,” bitjarra walala ŋuriŋi ḻundu'mirriŋuyunydja walalay, yana bini walala ŋanya yuwalk guŋga'yuna.

Garrayyunydja buku‐ruŋinyamaraŋalana dhäruk Djawupku

38:1—42:6 (The Lord answered Job)

38:1—41:34

Ga ŋuliŋurunydja Godnha ŋayipina waŋa *Djawupku bitjan, “Dhiyaŋunydja‐wala ŋarrana dhä‐wirrka'yun nhuna yukurra, bitjan nhe yawungu ŋarranha dhä‐wirrka'yun.

Ma' ḻakaraŋana ŋarraku go,

yolthu djäma wäŋa ŋunha munathany'tja? . . .

ga yolthu djäma ŋunha gapu moṉuktja? . . .

ga ŋunha garrwar gärak? . . . Nheŋga?

Yolthu djäma wäyindja binbarrmirriyaŋala?

Ga yolthu djäma djarraṯawun'tja ga ŋunha munhanydja?

Nhe marŋgi bukmakkunydja?

Wanhaŋuru waltjaṉdja ŋuli buna? . . .

ga wanhaŋuru gapu moṉuktja ŋuli marrtji yukurra?

Ga yolthu ŋuli maranhu‐wekama wäyinnha wakinŋunhanydja,

ga yumurrku'nha muṉguynha wäyinnha?”

42:1–6

Bala ŋayi Djawuptja waŋa buku‐ruŋiyinmarama Godkala bitjan, “Garray nhepi muka ganydjarr‐ḏumurrunydja, ga nhepi marŋgi bukmakku. Nhepina yana waŋganydhuna ŋuli djäma biyapulnydja wal'ŋu ḻatjuny'tja rom. Ŋunhinydja dhäruk ŋunhi ŋarra yawungu waŋanha be nhä warray, mayali'miriw dhäruk; yakana ŋarra biyapulnydja yurru waŋa. Liŋguna ŋarra nhäŋalana nhunapinyaynha, ga ŋäkulana, bala yana ŋarra marŋgithinana ŋunhi ŋarranydja dhuwala be nhä nhäŋiniŋ', ga goramirriyirrina ŋarra yukurra dhuwala yulŋunydja ŋuriŋiyina malaŋuyu ŋunhi ŋarra nhaltjarra waŋana.” Bitjarra ŋayi Djawup waŋananydja Garraywala.

Godthu goŋmirriyaŋalana Djawupnha

42:7–17 (God blessed Job greatly)

7 Ŋuliŋurunydja dhurrwaraŋuru ŋayi God waŋa ŋurikina walalaŋgu ḻurrkun'kuna †42:7 JobDjawupkalaŋuwu ḻundu'mirriŋuwu walalaŋgu bitjan, “Ŋarranydja dhuwala ŋaramurryirri yukurra nhumalaŋguna. Nhumalaŋgunydja dhäruk be nhäna djarrpi'na, yaka nhuma yawungu ŋunhi dhunupa dhäruk waŋanha yukurranha ŋarranha. 8 Waŋiyanydja walala ŋunhi Djawupnhana, märr ŋayi yurru ŋäŋ'thun bukumirriyama ŋarranha nhumalaŋgu, märr ŋarra yaka muka nhumalanha yurru murr'maramanydja. Ŋayinydja ŋunhi waŋana yukurrana dhunupa warray dhika wal'ŋu dhäruk yana ŋarrakalaŋuwuynydja, yurru nhumanydja waŋana be nhäna yana dhäruk nhäŋiniŋ'nha ga yätjnha.”

9 Bala yuwalkthi ŋuriŋi ḻundu'mirriŋuyunydja walalay waŋana Djawupnhanydja, bala ŋayi Djawupthunydja waŋana ŋäŋ'thurruna, bukumirriyaŋala walalaŋgu Godnha; yana ŋayi walalaŋgu bäy‐ḻakaraŋalana ŋurikinydja ŋunhi walala yukurrana ḏäl dhäruk waŋana nhanŋu. 10 Ga ŋuliŋurunydja dhurrwaraŋuru ŋunhi ŋayi Djawupthu yukurrana bukumirriyaŋala ŋuriki walalaŋgu ŋunhi walala ŋanya ŋayaŋu‐yätjkuŋala, bala Godthunydja ŋanya wekaŋala biyapulnha wal'ŋu dhaŋaŋ wäyin ga djämamirrinha, ga ŋula nhä malanha, guḻku'na guḻku'na dhikana, dhaŋaŋnha wal'ŋu, ga baḏatjŋurana ŋayi dhika baḏarraŋ'thina rumbalnydja.

11 Ga ŋuliŋurunydja yapa'mirriŋu walala ga wäwa'mirriŋuna walala ḏo'yurruna nhanbala, gäŋalanydja mundhurr girri' nhanbala, ḻatju'mirrina ŋanyana dhika nhä malanha.

12 Yo, biyapul ŋayi Djawup ḻukunydjayinayi, dhaŋaŋnha dhikana wäyindja nhanŋu, buliki ga bembi ga gamul ga duŋ'ki dhaŋaŋnha dhaŋaŋnha biyapulnha, djuḻkmaramana yukurra, yakana balanyara bitjan ŋäthili ŋayi yukurrana ŋayathaŋala. 13-15 Ga bitjarra yana liŋgu Godthu wekaŋalanydja nhanŋu ŋulinyara yana liŋgu miṯtjinydja yumurrkuny'tja 7 ḏarramuwurru ga ḻurrkun' dhäykawurru, ga ŋunhiyi dhäykawurrunydja rumbal djana'mirrina walala dhika, dhapirrkmirrina wal'ŋu biyapulnha dhika; yakana ŋula wiripu‐guḻkuny'tja dhäykawurru balanyarayi rumbal ŋunhilimi wäŋaŋura bitjan ŋunhi nhanbala Djawuppa gäthu'mirriŋu walala.

16-17 Yo, Djawup nhinananydja yukurrana weyinŋumirrina dhikana wal'ŋu yana, yana liŋgu‐u‐u ga nhäŋala ŋayi yana nhanŋuway ŋayi gutharra'mirriŋunha walalanha ga walalaŋgu djamarrkuḻi'nha, yurruna ŋayi rakunydhinanydja maŋutji‐marŋgina.

<- DJAWUPKALAŊUWUY DHÄWU 2