22 Bala walala [a]Yitjuralpuyŋunydja waŋana [b]Gitiyangala bitjarra, “Ŋanapurrunydja ḏukṯuk nhe yurru ŋanapurruŋgu ŋurruŋu yukurra dhärra, bitjan nhenydja yurru ŋanapurruŋgu buŋgawana wal'ŋu giŋnha, liŋgu nhe walŋakuŋala ŋanapurrunha ŋurukala [c]Midiyanbuyŋuwalanydja goŋŋuru. Ga ŋunhi yurru nhe bäyŋuthirri, rakunydhirri nhe yurru, ga nhuŋu yumurrku'na yurru nhokala dharapulŋuranydja djingaryun yukurra, ŋanapurruŋgu ŋurruŋuyirri yurru.”

23 Ga ŋayi Gitiyandja waŋana bitjarra, “Ŋarranydja yurru yaka buŋgawa nhumalaŋgu, ga ŋarraku gäthu'mirriŋu yaka nhumalaŋgu yurru buŋgawayirri; Garray dhuwala ŋayipi yurru nhumalaŋgu buŋgawanydja, ŋayipina waŋganynha.”

24 Ga biyapul ŋayi Gitiyan waŋana, “Bukmakthu nhuma dhiyaŋu walalay gäŋa lili ŋarrakala ŋula nhä mel‐winya'mirrinydja girri', ŋunhi nhuma Midiyanbuyŋuwala djaw'‐djawyurruna.”

25-26 “Ŋanapurru yurru wekamana‐wala yana nhokala,” bitjarra walala ŋunhi yolŋu'‐yulŋunydja miṯtjinydja waŋana. Bala walala bukmaknha yurrum'thurrunanydja marrtjina, gäŋalana lili Gitiyangalana ŋunhi girri'na malanha, maŋutji‐winya'mirrinydja girri'. 27 Ga ŋuriŋiyi girri'yu ŋayi mel‐manaparana batharana, nyarra'yunmaraŋalana, bala djäma ŋula nhäna ŋuriŋi garwarrwarr'mirriyunydja girri'yu, märr yurru ŋayi dhaṯthunmirrina yukurra yurru ŋuriŋi dhapirrkmirriyuna dhikana wal'ŋu girri'yu. Yurru bukmaktja ŋunhi yolŋu'‐yulŋu Yitjuralpuyŋu marrtjina ŋunhimalana waŋganylilina, bala walalanydja buku‐ŋal'yurrunana yukurrana ŋurikinayi girri'wu, bitjarrana walala yukurrana ŋurru‐nherrarana ŋäthilina walalaŋgu Gitiyangu ga nhanukalaŋuwu yumurrku'wu. Yo, malthurrunanydja walala yukurrana märr‐ŋal'yurrunana nhanŋuwaynha Gitiyanguna, ga bitjarrayina walala ŋapayuna‐ŋurrkaŋala, gonha'yurrunana Godnhanydja ŋunhi ŋayina walalaŋgu yuwalkŋunydja ŋurruŋu.