DHÄWU ŊURRU'‐ŊURRUŊUWALAŊUWUY 7

Gitiyangalanydja märr‐ḻurrkun'thunydja miriŋuyu djuḻkmaraŋalana‐wala yanana Midiyanbuyŋunhanydja miriŋunha

7:1–25 (Gideon’s few soldiers defeated the Midianites)

1 Yo, *GideonGitiyandja ga nhanŋu miriŋunydja ŋorra'‐ŋurrana yukurrana ŋunhala galki mayaŋ'ŋura, galki walala yurru bunharamirrina ŋunhi †MidianMidiyanbuyŋuna miriŋu, ŋunhina walala ŋunhi walala yukurra nhina ŋunhili balkuwarra'ŋura galki bukuŋura ‡MorehMoray yäkuŋura. 2-3 Ga Garraynydja waŋana nhanukala Gitiyangala bitjarra, “Malanydja dhuwala nhuŋu guḻku' mirithirri. Ŋunhi ŋarra yurru Midiyanbuyŋunhanydja ŋunhanydja yolŋu'‐yulŋunha wekama nhumalaŋgalanydja goŋlili dhawar'maranharawuna bunharawu, ga dhiyaŋu ḏarramuwurruyunydja yurru waŋa bitjanna, ‘Dhuwalanydja ŋanapurruway yana dhawar'maraŋala, ŋanapurruŋgalay ganydjarryu,’ bitjanna yurru. Ḻakaraŋa nhe yurru walalaŋgu biyaka, ‘Ŋunhi nhe yukurra ŋula yol beyaṉiyirri, ga marrmarryun yukurra beyaṉiyinyarayu, gatjuy nhe yurru marrtji balayi roŋiyirri wäŋalilina.’ ”

Ga guḻku'na yolŋu'‐yulŋu roŋi'‐ruŋiyinanydja, 22,000‐nha malanydja ŋunhi, gonha'yurrunana walala Gitiyannhanydja, bala marrtjina wäŋalilina. Yurru märr‐ḻurrkun'nha yukurrana nhinana ŋunhilinydja bäymanydja, 10,000‐nha mala.

4 Ga biyapul ŋayi Garray waŋana Gitiyangala, “Mukthun yana dhuwala guḻku' malanydja nhe yukurra ḏälkuma. Gatjuy, nhe yurru gäŋa walalanha bala ŋunhamala gapulili mayaŋ'lili, ga ŋunhala ŋarra yurru walalanha mala‐yarr'yundja yukurra, barrkuwatjkumanydja.”

5-6 Bala yuwalkthi Gitiyandhunydja gäŋalana walalanha bala ŋunhimala mayaŋ'lilina gapuwuna wurkthu'‐wurkthunarawu. Wiripu‐guḻkuny'tja ḏarramuwurru ŋunhi baḻa‐waḻapthurruna munatha'lilina, bala yukurrana nyamaḻŋ'‐dharranana ḻukananydja ŋäṉarryunna gapunydja, ga wiripu‐guḻku'yunydja yukurrana ḻukana gurrum' yana; walala yukurrana goŋdhu dhiṯ‐dhiṯthurruna gapu, bala bulnha yana ḻukana yukurrana gurrum'thurruna.

7-8 Ga Garraynydja waŋana nhanukala bitjarra, “Ma', nhe gurrunharrana dhuwalanydja wiripu‐guḻku'nhanydja ŋunhi walala yukurra ḻuka gurrum'thun, dhipala bala wiripulili gali'lili, ga dhuwalanydja walalanha wiripu‐guḻku'nhanydja ga dhipala wiripulilina gali'lili.”

Bala ŋayi yuwalkthi Gitiyandhunydja guḻk‐guḻkthurruna, barrkuwatjkuŋala ŋunhiyi miriŋunhanydja walalanha märrma'kuŋalana miṯtji, ga miṯtjinydja ŋunhi ḻurrkun'nha yana, 300‐nha ŋunhinydja walala ŋunhi walala yukurrana gurrum'thurruna gapu ḻukana. Ga Godtja waŋana bitjarra, “Dhuwalanhana ḻurrkun'nhana miṯtjinha ŋarra yurru walŋakumanydja §Yitjuralnha. Ga wiripu‐guḻku'nhanydja dhuwala djuy'yurrana walalanha wäŋalilina.”

Bala yana yuwalknha walalanydja marrtjinana ŋunhiyi wäŋalilina, ga ŋunhina liŋgu märr‐ḻurrkun'nha nhinananydja miṯtjinydja. Yurru Midiyanbuynydja walalanydja nhinana yukurrana märr‐galki wäŋaŋura, ŋunha galki buku'‐wukuŋura ŋoyŋura, yurru malanydja ŋunhi miriŋunydja dhaŋaŋnha biyapulnha wal'ŋu dhika.

9 Ŋulinyaramirriyu munhakuna Garrayyu waŋana Gitiyannha bitjarra, “Gaŋgathiyana, bala yana marrtjiyana. Marrtjiyana ŋunhana‐wala ya' yarrupthurrana ŋunhimalana wäŋalili walalaŋgalana, liŋgu ŋarranydja yurru wekama nhokalana goŋlili ŋunhayi miriŋunhanydja. 10-12 Ŋuli nhe yukurra beyaṉiyirrinydja, ga nhenydja yurru marrtjiya nhepi gayul, ga buthuru‐witjurra marrtjiya; nhe yurru ŋämana nhaltjan walala yukurra yurru waŋanharamirri, ga ŋuriŋiyi dhärukthu nhe yurru ganydjarrmirriyirrina, bala nhe yurru yakana beyaṉiyirri biyapulnydja.”

Bala Gitiyandhu garr'yurruna nhanŋuway ḏarramunha, bala maṉḏa marrtjinana, yuḻwutjtjurrunana maṉḏa marrtjina bala ga‐ga‐ga‐ga‐ga‐a‐a, ga galkithina ŋunhi wäŋa. Bala maṉḏa biyapul gaḻ'yurruna marrtjina bala yuḻwutjtjurruna, ga ŋunhilina waŋganyŋurana ḏalwaḏalwa'ŋura maṉḏa yukurrana baḻapthurrunanydja, ŋäkulana maṉḏa yukurrana. 13 Bala maṉḏa ŋäkulana dhäruknha, ŋayi waŋganydja ḏarramu waŋana nhanukalaŋuwala ḻundu'mirriŋuwala bitjarra, “Way, bukaway'yina ŋarra dhuwala. Nhäŋala ŋarra bukaway'kurru, ŋayi nhinana lili djarrarrayurruna ŋatha dämba ŋomaṉara, bala nhinana lili djarrarrayurrunana ga‐ga‐ga‐ga‐ga‐a‐a, ga wutthurruna dhuwala ya', dhä‐muŋdhurruna ḏalwaḏalwa'na yana.”

14 Bala ŋayi ŋunhi ḻundu'mirriŋunydja wirrkina ṉirryurruna, bitjarrana waŋana, “Wä‐ä‐äy! Dhuwalanydja dhuwala mayali' Gitiyannhana yukurra ḻakarama, ŋayi yurru marrtjina dhika lili, ga bumana ŋilimurrunha. Godthu yurru wekama nhanukalana goŋlili ŋilimurrunhanydja Midiyanbuyŋunhanydja.”

15 Yo, Gitiyandhunydja ŋäkulana yukurrana ŋunhala warraŋulnha, yurru ŋayi wirrkina dhika goŋmirriyinanydja, buku‐ŋal'yurrunana Godkuna. Bala yana ŋayi marrtjina wäŋalilina roŋiyina walala‐miṯtjiwalanydja, nhanukalaŋuwalanydja miriŋuwala, bala marrtjinana waŋanana walalanha, “Way walala! Gaŋga'‐gaŋgathiyana ma'! Liŋguna ŋayi Godthunydja wekaŋalana ŋunhiyinydja miriŋunha ŋilimurruŋgalana goŋlili.”

16 Ga bukmak ŋunhi miriŋunydja ḏurryurrunana, ga ŋayi Gitiyandhu weka'‐wikaŋalanydja walalaŋgala goŋlilinydja gurtha‐ŋäṉarrmirri djarraṯawun', yurru ŋäkirrmaranharanydja rupa'mirri, ga yiḏakinyara barrkuwatj yana walalaŋgala rarr'yurrunanydja ŋayi Gitiyandhu. Ga guḻk‐guḻkthurrunanydja walalanha marrtjina ḻurrkun'lili ŋurruklilinydja, yurru yakana walala gäŋala ŋula gara, yiki ŋula nhä goŋdhu; ŋunhina liŋgu yana djarraṯawun'nha ga yiḏakiyinyarana.

17 Yo, munhakuŋga yana ŋunhi baḏak yulŋunydja, warumukka yana dhika, ŋayi Gitiyandja waŋana ŋurikala miriŋuwalanydja, “Go go, malthurrana walala ŋarraku. Ŋilimurru yurru marrtjina ga ḻiw'maramana walalaŋgu ŋunhiyi wäŋanydja gayul yana. Nhäŋanydja walala ŋarranha, ga ŋunhi ŋarra yurru nhaltjan djäma, nhumanydja yurru biyakayi bili yana. 18 Ŋunhi yurru ŋarra ḻoḻthun, ga nhumanydja yurru ḻoḻthundhi, ga ŋunhi ŋarra yurru yatjun, ga nhumanydja yurru biyaka yana liŋgu yatjurra mirithiya; ḏaw'yurrana ŋunhi banikin'tja, bala garrwarkuŋana ŋunhi baḏayalany'tja, ga mirithiyana yatjunmiyanydja, waŋiya biyakana. ‘Dhuwalanydja yiki Garraywuna ga Gitiyanguna.’ ” Bitjarra ŋayi Gitiyandhu ḻakaraŋalanydja yukurrana walalambala.

19 Bala yana Gitiyan ga nhanŋu miriŋunydja marrtjinana bala ḻiw'yunmaraŋalana, ḏap‐gay ŋunhi wäŋanydja; walala marrtjina djingaryurrunanydja dhäruk mukthurrunana dhika, rirrakay mukthurrunana djingaryurruna yukurrana yana. 20 Ga Gitiyandja ḻoḻthurrunana nhanukalay ŋayi yiḏakiyuna ŋuriŋi, ga bukmakthunydja bitjarra yana liŋgu, bo‐o‐op bitjanmina dhika. Bala walala marrtjina bukmakthuna buḏaw'maraŋalanydja rrambaŋina, ga ŋunhi banikin'tja djalkthurrunana, buḏaw' bitjarrana, bala yana garrwarkuŋalana ŋunhi baḏayalany'tja. Ga baḏayalany'tja ŋunhi bena dhika räkukuŋalanydja bukmaknha ŋunhi wäŋanydja ḻiw'maraŋala. Ga bukmaknha waŋana yatjunmina yiŋgathinana dhika, “Dhuwalanydja yiki nhanŋuwaynha Garraywuna ga Gitiyanguna.”

21-22 Walalanydja Midiyanbuynydja gaŋga'‐gaŋgathinana dhika, ga wiṯthurrunana dhika beyaṉiyinyaminanydja, yatjunminana dhika wäthunminana; walala birrka'yurruna yana bini Yitjuralpuyŋuna ŋunhi wapthurru walalaŋgala wäŋalili. Bala walalawuynha ŋunhili bunharaminanydja buku‐munha'ŋurana, rakunygunhaminana yukurrana walalawuynha, bala‐lili'yunminana bunharamina, liŋgu Garrayyuna walalaŋgu guyaŋinyaranydja dhulmu‐waŋala bitjarrayinydja. Walala Yitjuralpuyŋunydja mukthurruna yana dhärrana marrtjina ŋulawitjarra wäŋakurru ḻiw'maraŋala walalaŋgala, yurru wiripu‐guḻkuny'tja Midiyanbuyŋu burakinana yukurrana rakunyguna walala‐miṯtjiwuŋuna ŋurikiŋi yana bäyma, ga wiripu‐guḻkuny'tja gundupuŋala winya'‐winyayurrunana.

23-25 Ga Gitiyandhunydja ga nhanukala miriŋuyunydja ŋuparayi walalanha, bala bumarana Midiyanbuyŋunhanydja ga walalaŋgu ŋurru'‐ŋurruŋunha ŋunhi, bala warr'‐warryurrunana yanana walalanha bena‐wala barrkulilina ŋuliŋuru wäŋaŋurunydja. Ga ŋuliŋurunydja dhurrwaraŋuru yakana walala biyapulnydja Midiyanbuyŋunydja roŋi'‐ruŋiyina lilinydja, ga yakana walala biyapulnydja mari‐wunana ŋuriki Yitjuralpuyŋuwunydja. Bala walala Yitjuralpuyŋunydja nhinanana yukurrana marimiriwŋurana.

<- DHÄWU ŊURRU'‐ŊURRUŊUWALAŊUWUY 6 DHÄWU ŊURRU'‐ŊURRUŊUWALAŊUWUY 8 ->