1 Yo, Garrayyu Godthunydja ŋarrakala nherrara dhaŋaŋguŋala ŋuriŋina nhanukalay ŋayi Walŋayuna Birrimbirryu; ŋayi djarr'yurruna ŋarranha, bala djuy'yurrunana, ŋarra yurru gäma manymaknha gal'ŋu dhäwu' yolŋu'‐yulŋuwuna ŋuriki gurrupuruŋumirriwuna. Ŋarra yurru baḏarraŋ'kuma ŋayaŋu yolŋu'‐yulŋunha ŋunhi walala yukurra ŋayaŋu‐warwumirriyirri, ga ḻakarama ŋarra yurru ŋuripanydja ŋunhi ŋayi garrpiṉarawuy ŋula nhäkuŋu romguŋu, “Way dhawaṯthurrana,” bitjan, bala ŋarra yurru dhayaḻakumana dhawaṯmaramana ŋanya ŋuliŋuru nhäŋuru . 2 Yo, Garrayyu ŋarranha yänguŋalana ŋurikalana walalaŋgala ŋunhi walala yukurra gäma ŋonuŋ, bitjanna yurru ŋarra ḻakarama gam'. Dhuwalana walunydja nhuŋu, ŋunhi ŋayi yurru Godthu walŋakumanydja nhuna, ga dhawaṯmarama nhuna beŋuru miriŋuwala goŋŋuru; galki ŋayi yurru baḏuwaḏuyunna yulŋunydja buku‐ruŋinyamaramana ŋunhinhanydja yätjmirrinhanydja ŋunhi walala ŋuyulkthirri yukurra nhanŋu. 3 Yurru ŋayipi Godthunydja yurru marrparaŋ'kuma warray nhanŋuwaynydja yolŋu'‐yulŋunha, ŋunhi walala yukurra ŋäthi galŋa‐yätjthirri wal'ŋu; ŋunhiyinydja yurru walalaŋgu galŋa‐yätjthinyaramirrinydja ŋäthinyaramirrinydja winya'yunna‐wala yana buwayakthirrina, bala walala yurru nhinanydja yukurra ŋayaŋu‐djulŋithirrina‐wala yana. Yakana walala yurru biyapulnydja ŋula galŋa‐ŋonuŋdhirri ŋula nhäyu, yanana walala yurru wokthunna gal'ŋu goŋmirriyirrina dhikana Garraywunydja, bitjanna bitjan yurru ŋayi dhaṯthunmirri ŋuriŋiyi wokthunarayuna. Yo, dhärranydja walala yurru wuṉḏaŋarrnha gal'ŋu yana dhunupana, bitjanna bitjan dharpa dholkunharawuy Garraywuŋu; walala yurru djämanydja nhäyinyara dhunupa ga ŋamakurru', märr yurru ŋuruŋu yolŋu'‐yulŋuyunydja nhämana, bala wokthunna yurru Garraywu.

4 Weyinŋumirrina yukurrana yolŋu walala Garraywunydja nhinana walŋamiriw dhika nhämiriw, balanyarana bitjan ḏaw'‐ḏawyunara wäŋa buṉbu, yurru biyapul walala yurru dhärrayi yulŋunydja walŋathirriyi, ga djäma ŋamakurru'na nhä ŋunhi dhunupa; walala yurru dhärranydja yukurra bitjanna bitjan yuṯa buṉbu dhuḻ'yunarawuy ŋunhiwala ŋäthiliŋulili yuṯuŋgurrlili. 5 Yo, mulkurunydja yolŋu yurru nhumalaŋgu djämamirrina walala; walala yurru maranhu‐wekamana nhumalaŋgu wäyinnhanydja malaŋunha, ga ŋuthanmarama ŋatha nhumalaŋgu. 6 Ga nhumapinydja yurru ŋunhi bitjan ḏalkarra'mirrina walala Garraywu, gulŋiyirri yurru galkililina yana nhanukala, ga djämana yukurra yurru Godkuna. Ga nhumanydja yurru ŋunhi bitjan ḻukunydjamirrina ŋurikiŋina walalaŋguŋu mulku'‐mulkuruwuŋuna, ŋunhi walala yurru gäma nhumalaŋgu ḻatju'mirri ŋanya dhika wal'ŋu. 7 “Ŋäthilinydja wal'ŋu nhe ŋunhinydja ŋurruwuyknha ŋula nhämiriwnha, gurrupuruŋuna nhe, yurru dhiyaŋunydja‐wala nhe ḻukunydjana mirithirrina, bitjanna nhe yurru yukurra nhinanydja ŋoy‐djulŋithirrina gupaḏalnha‐wala. 8 Liŋgu ŋarrapinydja Garraynydja yukurra märr‐ŋamathirri ŋurikinydja walalaŋgu ŋunhi walala rom‐waŋganymirri yolŋu walala, ga djäma dhunupa wal'ŋu, yurru ŋaramurryirrinydja ŋarra yukurra ŋapa‐nherraṉmirrinydja ŋurikina ŋunhi yätjkuna djarrpi'wuna. Yuwalk yana ŋarra yurru buku‐ruŋinyamaramanydja wekama ŋarrakalayŋunydja yolŋu'‐yulŋuwu, ga walalanydja yurru ŋarrakuwaynha walala yolŋu'‐yulŋu gupaḏalnha‐wala, dhulŋuŋuna yurru. 9 Birrka'mirriyu miṯtjiyunydja yurru walalanha ḻakarama ŋarrakuwaynha gal'ŋu dharrpalmirrina yolŋu'‐yulŋu, bala dharaŋanna yurru nhäma ŋunhi ŋarranydja walalanha goŋmirriyaŋala mirithinana yana,” bitjarra ŋayi Garray waŋananydja.

10 Yo, [a]Djurutjalam wäŋa galŋa‐djulŋithirrina yukurra, waŋa yukurra bitjanna, “Ŋarranydja dhuwala mirithinana galŋa‐djulŋithina dhikana, liŋgu Garrayyu ŋarranhanydja walŋakuŋala; ŋayi dhaṯthurrunanydja ŋarranha ŋuriŋi nhanukalay ŋayi ŋayaŋu‐dhunupayinyarayu. Ŋarranydja dhuwala balanyarayi bitjan dhäyka ŋarra, dhaṯthunminyara girri'wuy ŋanya dhika dhapirrkmirriwuynha, girri'‐ŋamathirri yukurra dhuway'mirriŋuwuna ŋunhi ŋayi yurru märramana ŋanya, balanyarayi ŋarranydja dhuwala, liŋgu ŋayi ŋarranhanydja Garrayyu dhapirrkkuŋala.” 11 Yo, yolŋuyu ŋuli ḻämu‐nherraṉ maŋutji ŋatha, ga ŋunhiyi dhamany'tjundja yurru ŋayi yuṯana wal'ŋu, bala ŋayi yurru ŋuthanna‐wala yana dhapirrkthirrina dhikana, ga borummirriyirrina yurru. Ga bitjandhiyina ŋayi yukurra Godthu ḻämu‐nherraṉdja ŋayaŋulili ŋurikalanydja nhanukalaŋumirriwalanydja yolŋu'‐yulŋuwala, ga ŋuliŋuru ŋunhi ŋayi Godthu ḻämu‐nherrara ŋunha ŋayaŋulili yolŋuwala yurru dhamany'tjundja, bala ŋuthanna ŋayaŋu‐dhunupayinyaramirrina ga wokthunaramirrina. Bukmakthuna yurru yolŋuyunydja walalay nhämana yana, bala wokthunna yukurra yurru Garraywunydja.

<- YITJAYAWUŊU DHÄRUK 60YITJAYAWUŊU DHÄRUK 62 ->