1 Yo, Garray waŋana bitjarra, “Yolthu nhuna djuy'yurrunanydja bitjarranydja bitjan ŋuli ḏarramuyu dhuway'mirriŋuyu ganan nhanŋuway miyalknha? Nhenydja ŋunhi guyaŋina yanapi ŋarra nhuna wekanha goŋlili nhokala miriŋuwala, yurru yaka warray ŋarranydja ŋunhi, ŋunhiyinydja ŋuriŋi nhokalay yätjthu gäŋala nhuna yukurrana ŋunhiwala garrpiṉminyarawuylilinydja romlili, liŋgu nhepi ŋunhiyinydja yarrkmaranhamina nhunapinyay nhe ŋarrakalanydja ŋuriŋi nhokalay nhäŋiniŋ'thu romdhu. 2 Ŋarranydja warrya'yurruna nhuŋu, ga yakana ŋarra nhuna maḻŋ'maraŋalanydja; yäku‐ḻakaraŋala ŋarra nhuna marrtjina yulŋunydja, ga nhenydja yaka warray ŋäkula ŋarranha, ga buku‐ruŋinyamaraŋala dhäruk bitjarra, ‘Dhuwala ŋarra,’ bitjarranydja. Ŋarranydja nhuŋu ḏukṯuk walŋakunharawu, ga nhäku warray nhe yakanydja buku‐ruŋinyamaraŋala dhäruk ŋarraku? Mak nhe guyaŋina ŋarranha yanapi ŋarra ganydjarrmiriwnha ŋula nhäna, märr bini ŋarra yakana nhuna walŋakunha. Ŋarranydja dhuwala yaka ŋarra ganydjarrmiriw. Ŋuli ŋarra ḏukṯuktja, ŋarra yurru yana waŋa dhäruknha waŋganynha, bala ŋayi yurru ŋunha gapunydja moṉuktja baṉḏanydhirrina, ga guya malanha yurru murrmurryunna marrtji. 3 Ŋuli ŋarra ḏukṯuk, ŋarra yurru waŋa yana dhäruk gäraklilinydja, bala ŋayinydja yurru gäraktja ŋunhanydja bilyun munha'yunna,” bitjarra ŋayi Garray waŋananydja.

4 Yo, Godthu ŋayipi Waŋarryu ŋarranha wekaŋala dhäruktja waŋanharawunydja, märr yurru balakurru‐witjan ŋarrakalanydja dhärukkurru ŋarra yurru marrtji gaŋgathinyamirriyama walalanha ŋunhi märr‐yawaryunamirrinha yolŋu'‐yulŋunha. Bitjanna liŋgu munhakumirrinydja ŋarra ŋuli yuwalkkuma yana mäkiri'‐witjun Godkalaŋuwu rirrakaywu, wirrki yana wal'ŋu ŋarra ḏukṯuktja ŋänharawunydja ŋurikiyi, ga marŋgithinyarawunydja marrtjinyarawu nhaltjan ŋayi yurru ŋarrakala ḻakarama marrtji. 5 Yo, ŋayi Garray waŋananydja ŋarrakala, ga ŋarranydja mäkiri'‐witjurrunana yana, ŋäkulanydja ŋanya. Yakana ŋarra ŋuyulkthina yarryurrunanydja ŋurikiyi, yakana ŋarra ḏiltjinydja wekaŋala nhanukala Godkala. 6 Ŋarranydja dhäruk ŋanya märraŋala yana; yaka ŋarra ŋoynydja‐dharrana buku‐ruŋinyamaraŋala balanydja bumara, ŋunhi walala bartjunmaraŋala ŋarranha ḏiltji biralyu djambaka'mirriyunydja. Warryurruna walala yukurrana bolutjuny'tja ŋarranha, ga dhupthurruna ŋarranha buku, yurru ŋarranydja yaka djuḻuḻ'maranhamina ŋarranhawuy ŋarra buku. 7 Ga ŋunhi walala yukurra yätjkuma waŋa ŋarranha, ŋarranydja yaka ŋuli buku‐ruŋinyamarama wekama yätj dhäruk balanydja walalaŋgunydja, liŋgu Garrayyunydja ŋuli marrtji Godthunydja ŋarranha ganydjarr‐wekama, guŋga'yunna bala. Ga ŋunhi walala ŋuli djäma yätj ŋarraku, ŋarranydja ŋuli yukurra dhärra yana mukthun wuṉḏaŋarrnha, gaḻ'‐gaḻyunamiriwnha. Liŋgu ŋarra ŋunhi djarr'yurruna dhukarrnydja ŋarrakuway, ŋarra yurru djäma bitjan yana liŋgu ŋoy‐wuṉḏaŋarryirri ŋunhi nhaltjan yukurra Garray waŋa, nhanukala yana djälkurru, yakana ŋarra yurru bilyun ŋunhiwalanydja gora‐wekanharamirrililinydja romlili. 8-9 Liŋgu Godtja dhuwala galki yana, ŋayinydja marŋgi ŋarraku, ga ŋayinydja yurru gora‐wekama ŋurikinydja walalaŋgu ŋunhi walala ŋuli yätjkuma waŋa ŋarranha. Wanhaka dhika ŋayi ŋunhinydja yolŋu, ŋunhi ŋayi ŋuli ḻakarama yätj‐ḻakaramanydja ŋarranha? Marrtji ŋayi yurru yana ŋunhiyinydjayi, märr yurru ŋilinyu rrambaŋi dhärra gumurrŋuranydja nhanukala Godkala, ga ŋayina yurru ŋinyalanha mala‐yarr'yundja. Yuwalk yana ŋayi yurru Garrayyu guŋga'yundja ŋarranha yuwalkkuma. Yolthu ŋarranha yurru yätj‐ḻakaramanydja dhika, yana bini ŋarra djäma ŋula nhä yätjkunha? Ŋunhiyinydjayi yolŋu yurru winya'yunna‐wala yana buwayakthirrina, bitjanna bitjan girri' ḻukanhara ŋula nhäkuŋu.

10 Yuwalk nhe yukurra rom‐wiyaṉiyirri Godkunydja? . . . ga yuwalk ŋurrumarama ŋunhi yätjnhanydja? Yuwalk nhe yurru mäkiri'‐witjundja ga dhäruktja märrama nhanŋu djämamirrinhanydja? Bäyyi nhe yurru marrtji buku‐munha'kurrunydja warumukkurrunydja wäŋakurru, yana märr‐nherraṉmiya nhanukalay wal'ŋu Garraywala, ga märr‐ŋal'yurrana nhanukala yäkulilinydja, bala ŋayi yurru nhanukala djarraṯawun'thunydja ŋuriŋinydja bitjan räkukumana dhukarrnha nhuŋu. 11 Ga nhe ŋunhi, ŋunhi nhe ŋuli dhaŋalkuma gurtha nhuŋuway djarraṯawun', gatjuy marrtjiya‐wala nhe ŋuriŋiyi nhokalay nhe djarraṯawun'thunydja, ga yana nhe yurru yukurra nhinanydja ŋunhiliyi galŋa‐yätjthirrina warwumirriyirrina wal'ŋu, ŋunhi nhe yurru marrtji ŋuliwitjandhinydjayi ŋunhi nhepi yurru nhuŋuway djarraṯawun'kuma.

<- YITJAYAWUŊU DHÄRUK 49YITJAYAWUŊU DHÄRUK 51 ->