9-10 Yo, ŋuriŋinydja walalay yolŋu'‐yulŋuyu ŋunhi walala ŋuli djäma be dhuyukuma waŋarrnha walalaŋguway, ŋunhiyinydja ŋula nhäna ḻiya‐dhumuknha yana. Walala ŋuli guyaŋirri yanapi ŋunhiyinydjayi maḏayin' malanha ŋula nhä waŋarrnha dhuyuna wal'ŋu, yurru nhäŋiniŋ' warray ŋunhi yulŋunydja ŋula nhä warray. Ŋunhiyinydjayi yolŋu'‐yulŋu ŋula nhäna muḻkurrmiriwnha bambaynha, yakana walala ŋuli nhäma ga guyaŋirri dhunupakuma, bala walala yurru goramirriyirrina. Nhäku warray walala ŋuli djäma ŋunhiyinydja be waŋarrkuma? Ŋunhiyinydja be nhä warray, ganydjarrmiriw warray yana, yakana ŋayi yurru guŋga'yun walalanha. Ŋunhiyinydjayi nhä malanha djämawuy goŋbuy warray yolŋu'‐yulŋuwuŋu warray. 11 Nhumanydja ŋunhi yolŋu'‐yulŋu ŋunhi nhuma yukurra djäma goŋdhu nhumapi waŋarrkuma ŋula nhä, nhenydja yurru dhärra nhanukala Godkalana gal'ŋu gumurrŋurana dhä‐wirrka'yunarawuna yukurranharawu, bala nhe yurru mirithirrina yana barrarirrinydja, goramirriyirrina nhe yurru buku‐wurana.

12-13 Yo, yolŋuyu ŋuli märrama ŋula nhä dharpa ḻanara', bala ŋayi yurru djämana yolŋukumana wo ŋula nhäna, ḻatju'kumana dhikana ŋayi yurru djämanydja ŋunhiyi, bala ŋayi yurru djawaryunna, djaṉŋarrthirrina manapan ŋuriŋiyi djämayunydja. 14 Yo, djatthun ŋayi yurru gulkthun dharpa, bala muṉguykumana lanarany'tja malanha djäma, ḻatju'kumana dhikana dhapirrkkumana, märr yurru yukurra dhärra nhanukala wäŋaŋura ŋunhiyi. 15 Yo, wiripunydja ŋunhi ŋuliŋuruyi ḻanara' ŋayi yurru djäma gurthana nhanŋuway ŋayi gorrmurkunhaminyarawuna ga ŋathawuna bathanarawu, ga wiripu ŋunhi ŋuliŋuruyi liŋgu waka dharpaŋuru ḻanara' ŋayi yurru djäma ŋunhiyina waŋarrkumana, bala ṉepaḻ‐nyilŋ'thunna buku‐ŋal'yunna ŋurikiyi. 16 Yo, nhinanydja ŋayi yurru galki gurthalili, bala waŋanydja ŋayi yurru marrtji bitjanna, “Nhä dhuwalanydja, ḻatjuny'tja ŋanya dhika gurtha.” 17 Bala ŋayi yurru buku‐ŋal'yunna ŋurikinydja ŋunhi ŋayi djäma ŋuliŋuruyi liŋgu waka'ŋuru dharpaŋuru, bala ŋayi yurru waŋa buku‐ŋal'yundja bitjanna, “Walŋakuŋa ŋarranha. Nhenydja dhuwala waŋarr muka ŋarraku,” bitjanna yurru. 18 Ŋunhiyinydja malanha ŋuli'‐ŋulinyaranydja yolŋu walala muḻkurr‐dhumukmirrina yana dhuŋamirrina, yakana walala marŋgi gal'ŋu yuwalkku, liŋgu maŋutji walalaŋgu bambaynha, ga ḻiyanydja walalaŋgu ŋunhiyi dhumuknha wal'ŋu yana. 19 Yakana walala yurru guyaŋirri, ga waŋa bitjandja, “Wiripunydja malanha dhuwala ḻanara' ŋarra yukurra dhuŋgur'yunna, ga wiripunydja ŋarra djäma waŋarrkuŋala yana. Nhä dhuwalanydja? . . . dharpa warray! Nhäkuna ŋarra yukurra dhika buku‐ŋal'yundja dhiyakuyi? Dhuwalanydja yana dharpana waŋganynha, yakana ŋula waŋarr. Nhaltjanna ŋarra yukurra dhika yulŋunydja? . . . bawa'mirriyirrina?” Yakana walala ŋuli waŋa bitjandhiyi. 20 Yo, bawa'mirrina ŋayi ŋunhiyinydja yolŋu. Ŋunhiyinydja bitjan ŋayi yukurra ḻuka ŋunha ḻirrwi'na, yakana yuwalkŋu ŋatha wal'ŋu, liŋgu yolŋunha ŋayi ŋunha mayali'‐wilkthurruna ŋuriŋi nhanukalay ŋayi djarrpi'yu guyaŋinyarayu. Yakana ŋayi yurru bilyundja ga walŋakunharamirrinydja ŋanyapinyay ŋayi, ga yakana ŋayi yurru waŋa bitjandja gam', “Dhuwalanydja gay waŋarr, ŋunhi ŋarra yukurra ŋayathama ŋarrakalay goŋdhu, dhuwalanydja bothinyamirrina, yakana ŋayi yuwalkŋu wal'ŋu waŋarr.” Yakana ŋayi yurru waŋa bitjandhinydjayi.