1 Yo, ŋayi Garrayyu ḻakaraŋala yukurrana ŋurikiy nhanukalaŋuwuy miṯtjiwuy [a]Yitjuralpuyŋuwalaŋuwuy bitjarra, “Ŋäthilinydja ŋunhinydja wal'ŋu ŋurruthaŋalanydja, ŋarra märr‐ŋamathina märryu‐ḏapmaraŋala gal'ŋu yana Yitjuralnhanydja miṯtjinha. Ŋunhiyinydjayi miṯtji balanyarana bitjan gäthu'mirriŋu ḏarramuna ŋarraku. Yo, ŋunhiyi gäthu'mirriŋu ŋarraku, nhinananydja ŋayi yukurrana ŋunhala [b]Yetjiptja garrpiṉarawuy wal'ŋu yana, yurru ŋarranydja ŋanya dhawaṯmaraŋala beŋuruyinydjayi, ga dhayaḻakuŋala warray. 2 Yo, bitjarra liŋgu ŋarra yukurrana wäthurrunanydja walalaŋgu malthunarawu ŋarrakunydja, walala bini ŋunhi nhinanhanydja yukurranha galki muka yana ŋarrakala, ŋuriŋi ŋarrakala romdhu. Yurru walalanydja gonha'yurruna ŋarranha, ŋapa warray wekaŋala; yaka warray walala djäl ŋarrakunydja, bala buku‐ŋal'yurrunana walala yukurrana wiripuŋuwuna waŋarrwu, mundhurr‐wekaŋala yukurrana bathara wäyinnha malaŋunha ŋurikina waŋarrwu [c]Bälwuna yäkuwu, ga bitjarrayi walala bathara buŋgan bäwny'tja ŋurikina wiripuŋuwuna waŋarrwu, goŋbuywuna ŋurikina djämawuywu. 3 Yo, ŋarra ŋunhiyinydjayi gäthu'mirriŋunha Yitjuralnhanydja marŋgikuŋala nhaltjanarawu marrtjinyarawu, ga ŋarrapi yana ŋunhi ŋanya ŋuthanmaraŋalanydja. Ŋarra ŋuli ŋanya waṉanydja mulkanha, bala goŋ‐gulanhana ŋanya yukurranha, märr yurru ŋayi yaka galkirri, yurru yaka ŋayi dharaŋaranydja ŋuriŋiyi miṯtjiyu, ga yaka ŋayi marŋgithina ŋunhi ŋarrapi muka ŋanya walŋakuŋalanydja.

4 “Yo, ŋarrapi ŋunhi djäka marrtjina Yitjuralwunydja bäpurru'wu ga miṯtjiwu ŋamathaŋala dhika wal'ŋu, bitjarra bitjan ŋuli wapunhu'mirriŋu yolŋu djäka nhanukalaŋuwu ŋayi buliki'wu ŋamathama. Ŋarra gäŋalanydja walalanha marrtjina lili gurrum'thurruna dhika raki'yunydja ŋuriŋi märr‐ŋamathinyarayu, märr yurru walala marrtji malthun ŋarraku wal'ŋu yana galki. Ŋarra dhayaḻakuŋala girri' ŋunhinydja ŋunhi walalanha ŋuli ḏapmarama dhurrwara, ga ŋarrapi yana nyilŋ'maranhaminanydja, bala wekaŋalana marrtjina maranhu‐wekaŋalana ŋanya ŋuriŋi ŋamakurru'yuna wal'ŋu ŋathayu.

5 “Yurru mukthun yana Yitjuralnydja miṯtji yaka ḏukṯuk ŋarraku, yakana walala yurru roŋiyirri lili ŋarrakalanydja, ga nhina ŋunhili yurru ŋarrakalanydja goŋŋura. Ga dhiyakuyinayi märrwu walala yurru roŋiyirri balayi Yetjiplilinydja, ga nhina walala yurru yukurra ŋula yolkalana wiripuŋuwalana goŋŋuranydja, ga ŋunha [d]Yatjiriyana walalaŋgu yurru buŋgawanydja wal'ŋu. 6 Yo, miriŋunydja yurru marrtjina lili ŋurruthirrina, bala bumana marrtji ḏaw'‐ḏawyunna wäŋanydja warrpam'thunna yurru, bumana marrtji yurru murrkay'kumana yolŋu'‐yulŋunhanydja mandjawakthuna ŋuriŋina, liŋgu ŋuriŋi ŋarrakalanydja miṯtjiyu yolŋu'‐yulŋuyu yukurra djäma be nhäna walalaŋgalaynha yana djälkurru ga guyaŋinyarayu. 7 Yo, ŋarrakalaynydja ŋunhinydja yolŋuyu walalay djarr'yurruna ŋunhi walala yurru gananna ŋarranhanydja; yakana yana walala yurru nhina ŋarrakalanydja djäkaŋura. Bala miriŋunydja yurru marrtji ŋurruthirrina lili, bala ŋayi yurru ŋal'maramanydja walalaŋgala ŋonuŋnha mirithirrina ḻambarrlilinydja, ŋonuŋgumana, ga yakana yurru ŋula yolthu ḻaw'maramanydja ŋunhiyi ŋonuŋdja walalaŋgalaŋuŋuru ga dhayaḻakumanydja walalanha, yakana yana.

8 “Yo, nhuma Yitjural miṯtji ŋarraku gäthu'mirriŋu, wirrki yana ŋarra yukurra märr‐ŋamathirrinydja nhuŋu. Ga nhäkuna ŋunhi ŋarra yurru ganan nhumalanha goŋlili ŋurikala miriŋuwalanydja? Ŋarranydja yaka ḏukṯuk ŋarra yurru ganan nhumalanha, märr yurru nhuma yukurra nhina gäna. Ŋarra yaka ḏukṯuk baḏuwaḏuyunarawunydja nhumalaŋgu, bitjanarawuyi bitjarra ŋarra ŋunhi baḏuwaḏuyurruna yätj gal'ŋu mirithirri wäŋa ŋäthili. Ŋayaŋunydja ŋarraku dhuwala märr‐roŋiyinyarawu yana nhumalaŋgu walŋakunharawunydja. 9 Yo, ŋarra ŋaramurryirri yukurra yulŋunydja liŋgu ŋuriŋi nhumalaŋgala yätjthu, yurru yakana ŋarra yurru baḏuwaḏuyun warrpam'thundja nhumalanha. Liŋgu ŋarranydja dhuwala God warray, yaka warray yolŋu. Ŋarranydja ḏarrtjalk gal'ŋu wiripuŋuwalanydja, ganaŋ'thun yukurra ŋulaŋuru ŋurikala yätjkalanydja, ga dhuwala ŋarra nhina yukurra nhumalaŋgalana manapanmirrina, yaka ŋarranydja yurru marrtji lili baḏuwaḏuyunarawunydja nhumalaŋgu.” Ga bitjarra ŋayi Garraynydja waŋana.

<- YUTJIYAWUŊU DHÄRUK 10YUTJIYAWUŊU DHÄRUK 12 ->