1 Bala ŋuliŋuruyinydja ŋayi Garrayyu goŋmirriyaŋalana ŋanya [a]Saranha, rumbal yuṯakuŋalana, bitjarra yana liŋgu ŋunhi ŋayi dhawu'mirriyaŋala ŋäthili. 2 Bala ŋayi ŋunhi Sara yothumirriyinana, ga ŋuliŋuruyinydja ŋunhiyi yothu dhawal‐wuyaŋinana Sarawuŋu, nhanŋuwaynha [b]Yipurayimguna gäthu'mirriŋu; ŋayi dhawal‐wuyaŋinanydja ŋuriŋi liŋgu waluyu ŋunhi Godthu dhawu'‐nherrara ŋäthili. 3 Bala ŋayi ŋanya Yipurayimdhunydja yäku nherrarana ŋunhiyi yothunhanydja [c]Yitjaknha, 4 ga ŋunhi ŋayi 8‐mirrinydja ḏaykun'mirri, bala ŋayinydja ŋanya mitthurrunana ŋunhiyinhayi yothunhanydja, bitjarra yana liŋgu ŋunhi Godthu ḻakaraŋala ŋäthili Yipurayimgala. 5 Ga ŋayinydja ŋunhi Yipurayimdja worruŋuna wal'ŋu, 100‐nha dhuŋgarra nhanŋu ŋulinyaramirriyunydja ŋunhi ŋayi yothu ŋunhi Yitjak dhawal‐wuyaŋina.
6 Ga ŋayi ŋunhi Saranydja ŋoy‐ŋamathina wal'ŋu wirrkina, bala waŋana bitjarra, “Godthunydja dhuwala ŋarranha wirrkina goŋmirriyaŋalana wal'ŋu, ga gitkitthunmaraŋala yana ŋarranha ŋoy‐ŋamathinyarayunydja ŋuriŋi. Ga ŋunhi yurru walala wiripu‐guḻku'yu yolŋuyu walalay ŋämanydja, walalanydja yurru bitjandhi bili goŋmirriyirriyi ga gitkitthundhi, wirrkina wal'ŋu goŋmirriyirri yurru dhiyaku yothuwu, 7 liŋgu yolŋuyu walalay guyaŋina yanapi ŋarra bäyŋuna gänha yothu. Yurru dhuwalana ŋarra dhangi'yunna yukurra yothunydja, djäkana nhanŋu Yipurayimgalaŋuwu gäthu'mirriŋuwu, ŋunhi ŋayinydja dhuwala worruŋuna wal'ŋu.”
8 Yo, ŋayi ŋunhiyi yothu ŋutharanydja märr‐wakindhinana, ŋunhi yakana ŋayi biyapul yothu, bala ŋayinydja Yipurayimdhunydja ŋamaŋamayurruna ŋathana ŋula nhäna malanha, ḻuŋ'maraŋala yolŋu'‐yulŋunhana ŋurikiyina märr‐ŋamathinyarawu yothuwuna, liŋgu ŋunhiyinydja walalaŋgu rom.
9 Waŋganymirri maṉḏa yukurrana yothu maṉḏa ŋaḻwa'yurruna, waŋganydja ŋunhi yothu djämamirriwuŋu ŋurikiŋi [d]Yaykawuŋu yäku [e]Yitjmayil, ga wiripunydja [f]Sarawu yothu [g]Yitjak yäku, yurru ŋuriŋi djämamirriwalanydja yothuyu yukurrana warku'yurruna ŋunhi Sarawunydja yothunha. 10 Ga ŋayi Sarayunydja nhäŋala maṉḏanha ŋunhimalayi, bala maḏakarritjthinana wirrkina, bala waṉḏina, bala waŋana [h]Yipurayimnhanydja bitjarrana, “Way Yipurayim, djuy'yurrana ŋunhanydja ya' djämamirriwunydja yothunha, ga ŋunha ŋäṉḏi'mirriŋunha. Djuy'yurrana maṉḏanha. Yakana ŋuruŋuyinydja djämamirriwalanydja yothuyu yurru märrama nhokuŋu ŋunhi buku‐meṉgunhara; ŋunhiyinydja yurru nhä malanha nhokuŋunydja bukmak nhanŋuway yana Yitjakkuna, ŋarrakalaŋuwuna yothuwu.”
11 Ga ŋuriŋinydjayi dhärukthu Yipurayimnhanydja wirrkina ŋayaŋu‐yätjkuŋala, liŋgu ŋunhiyi Yitjmayilnydja gäthu'mirriŋu nhanŋu; yaka ŋayi ḏukṯukthina djuy'yunarawu nhanŋu.
12 Bala ŋayi Godtja waŋana Yipurayimgala bitjarra, “Yaka warwuyurranydja ŋurikiyi yothuwu ga ŋäṉḏi'mirriŋuwu. Ŋarranydja yurru yana djäkayi maṉḏaku marrtji bala. Nhe yurru djuy'yurrana yana maṉḏanha, biyaka liŋgu bitjarra ŋunhi ŋayi Sara waŋana. Liŋgu dhawuny'tja ŋunhiyinydja ŋarra nherrara nhanŋuway yana Yitjakku; nhanukuŋunydja yurru ŋurikiŋinydja Yitjakkuŋunydja mala‐bunhara guḻku'thirriyi, ga ŋarrakuwaynha walala yurru malanydja yana. 13 Ga ŋayi yurru Yitjmayilyu wiripunydja mala‐bumayi guḻku'na yumurrku', wakinnha malanydja yurru nhanukuŋu, liŋgu ŋayinydja ŋunha gäthu'mirriŋuyi yana nhuŋu. Yurru djuy'yurrana‐wala yana nhe yurru maṉḏanha, liŋgu wäwundja dhuwala nhanŋuway yana Yitjakku.”
14 Ga wiripuŋuyuna munhakumirri waluyu ŋayi Yipurayim gaŋgathina, bala ŋayi märraŋala ŋathana malanha ga gapuna dhiṯthurruna ŋuriŋiyi gapuwuyyu bathiyu, bala ŋayi ḏiltjililina nhanukala Yaykawala ŋal'maraŋala ŋunhiyi bathinydja gapumirrinydja ga ŋathamirri. Ga biyapul ŋayi wekaŋala ŋunhi yothunha, bala djuy'yurrunana maṉḏanha gupaḏalnha‐wala.
17 Ga yothunydja nhanŋu ŋorrana nhinana dhuḏiŋura dharpaŋura, ŋäthina nhinana, bala ŋayi Godthunydja ŋäkulana ŋunhi rirrakaynha ŋanya ŋäthinyarana yothunhanydja. Bala ŋayi Godku ŋunhi dhäwu'mirrinydja waŋana ŋulaŋuru djiwarr'ŋurunydja bitjarra, “Way Yayka, nhäku nhe warwuyundja yukurra dhuwala? Yaka nhe wilwilyurra ga barrariya. Godthunydja ŋunha ŋanya liŋgu ŋäkula ŋunhayi yothunha ŋäthinyara. 18 Gaŋgathiyana ga ḻaw'maraŋa, märraŋa ŋanya; ga nhiniya galki nhanukala djäka nhanŋu. Nhanukuŋunydja yurru mala‐wunhara guḻku'yirri yana; yaka ŋarra ŋanya ŋunhayi yothunha yurru buku‐dhumukthirrinydja ga meṉgumanydja.”
19 Bala ŋayi waṯthunmaraŋalanydja Godthu ŋanya Yaykanha, ga dharr‐way nhäŋalana ŋayi ŋunhi gapunydja, ŋayi yukurrana buŋbuŋdhurruna beŋuru dhawaṯthurruna lili munatha'ŋuru. Bala ŋayi waṉḏinana, bala märraŋala ŋunhiyi bathi gapuwuynha; waṉḏinanydja bala dhiṯthurrunana, bala gäŋalana djunamana yothu'wuna, bala yana wekaŋalana ŋanya Yitjmayilnha.
20 Yo, dhäŋuru ŋuliŋuruyinydja maṉḏa marrtjina yukurrana bala‐a‐a, bala nhinana wäŋayaŋalana ŋanhdharkŋurana wäŋaŋuranydja, ŋayilpiŋurana yäkuŋura [j]Barrannha, ga ŋunhiliyina ŋunhiyi yothu ŋutharanydja yukurrana‐a‐a, yana liŋgu ga wakindhina wal'ŋu ḏarramuthina. Ga bitjarrana liŋgu Godtja yukurrana nhanukala galkina, djäkana nhanŋu, ga ŋutharanydja ŋayi djambatj‐ḏumurruyinana wal'ŋu wäyinguna bunharawu. 21 Bala ŋayinydja ŋäṉḏi'mirriŋuyunydja nhanukala maḻŋ'thunmaraŋala dhäykanhana nhanŋu Yitjmayilwu, maṉḏa miṯtjinhana [k]Yetjippuyŋunhana miyalknha, bala ŋayi märraŋala Yitjmayilyunydja dhäykanhanydja ŋunhiyina nhanŋuway.
<- ŊURRUTHANHARAWUYNHA DHÄWU' 20ŊURRUTHANHARAWUYNHA DHÄWU' 22 ->