Dhuwalanydja Godku dhäruk ŋuliŋuru ŋäthiliŋuŋuru yarrataŋuru, yurru wukirriwuynydja Gumatjkurru dhärukkurru, märr nhuma yurru nhäma ŋunhiyi, ga waḏutja dharaŋan, ga marŋgiyirri yuwalk gal'ŋu Godku, ŋunhi nhaltjarra ŋayi ŋamaŋamayurruna ŋilimurrunha yolŋunha, märr yurru ŋilimurru bitjanna liŋgu nhina yukurra nhanukala nyeyalŋura djäkaŋura.

Yo, ŋurruŋu ŋunhi dhäwu'yu yukurra ḻakarama beŋuru liŋgu ŋurru‐yirr'yunaraŋuru, ḻakarama yukurra ŋunhi ŋayi Godthu djäma yolŋukuŋala, märr yurru yolŋu'‐yulŋu nhina yukurra nhanŋuway yana Godku. Yurru yolŋunydja walala bilyurruna ŋapa‐wekanhamina Godku, ga dhiyaŋuna yätjthuna ŋunhi yolŋunhanydja barrkuwatjkuŋalana Godkalanydja. Bala yolŋunydja walala mirithinana yätjthina; bukmaknha dhika yolŋuyunydja djäma yukurrana walalaŋgalaynha ḏukṯukkurru. Yurru Godtja mukthurruna yana märr‐ŋamathina yukurrana ŋuriki yolŋu'‐yulŋuwu ŋunhi nhanukuŋuway djämawuy. Ga dhiyalami djorra'ŋura nhe yurru marŋgithirri ŋunhi Godthu djarr'yurruna Abrahamnha ga nhanukuŋu mala‐wunharawuynha, märr yurru ŋunhiyinydjayi nhanŋuwaynha wal'ŋu yolŋu walala miṯtji. Ga malanydja dhuwala walala Jew yäku bäpurrunydja.

Yo, Godthu wekaŋala Jewnha malanha romnha, märr yurru walala buku‐ŋal'yun yukurra nhanŋu ŋuliwitjarra romkurru; ŋayi yurru bäy‐ḻakaramana walalaŋgu yätjpuy dhuwurrwuy liŋgu ŋuriŋi ŋunhi wäyin läm gulaŋ wandirri yurru walalaŋgala dharapalŋura, märr yurru bitjanarayunydjayi walala yurru marrtji galkithirri, galkina yana Godkala. Ga bitjarrayi liŋgu Godthu wekaŋala walalaŋgu Jewwu rom, märr yurru walala nhina yana yukurra ŋamakurru nhanukiyingala yana romŋura. God ḏukṯukthina walala yurru wiripu bäpurru ga wiripu bäpurru marŋgiyirri nhanŋu ŋuliwitjan walalaŋgalaŋukurru Jewwalaŋukurru, walala yurru nhäma ga dharaŋan ŋunhi ŋayipi yana waŋgany yuwalkŋunydja wal'ŋu God waŋarr. Liŋgu Godtja dhuwala ŋayipi gäna garrkuḻuk, ganaŋ'thun yukurra yätjŋuru, bala ŋayi yukurra wirrki gal'ŋu goŋ‐nherraṉmirri ŋuriki walalaŋgu yolŋuwu ŋunhi walala yukurra malthun nhanŋuway romgu. Yurru ŋurikinydja walalaŋgu ŋunhi walala yukurra ŋurrkama ŋanya, ga yaka malthun nhanŋu romgu, ŋayinydja yurru ŋunhiyi dhä‐ḏir'yunna walalanha; walala yurru murrmurryunna, liŋgu ŋuriŋi yätjthu walalaŋgalay romdhu.

Wiripunydja nhanŋu Godku yolŋu walala malthurruna nhanŋu dhärukku, ga bitjanarayuyi walala ŋuli nhinanha ŋamathanha yana yukurranha, nhanukiyingala yana Godkala nyeyalŋura djäkaŋura. Ga wiripunydja walala ŋuli ŋula nhäthamirriyu bilyuna, gonha'yuna yuwalkŋunhanydja Godnha, ga ŋunhana‐bala wiripuŋuwuna buku‐ŋal'yuna waŋarrwu, bala ŋuli marina bunanha bathalana; miriŋuna ŋuli bunanha walalaŋgu, ga wäŋana yätjkunha baḏuwaḏuyuna, ga yana liŋgu bala walala ŋuli yolŋunydja walala bilyuna balayi Godkala.

Ŋunhala bala dhawar'yunaramirriŋura gali'ŋura djorra'ŋura nhe yurru maḻŋ'marama dhäwu wukirriwuy ŋurikiŋi walalaŋguŋu dhäwu‐gänharamirriwuŋu walalaŋguŋu, ŋunhi Godthu djuy'yurruna walalanha nhanukiyingalaŋuwu yolŋu'‐yulŋuwu. Wiripu‐guḻku'yunydja ŋuriŋi dhäwu‐gänharamirriyu walalay ŋuli waŋanha yukurranha ḻakaranha yolŋu'‐yulŋuwu gonha'yunarawu yätjku romgu, bala bilmaranha Godkala, märr walala yurru yaka yukurra bitjan liŋgu galŋa‐yätjthirri nhina ŋunhiliyi romŋura yätjŋura. Ga wiripuwurruyunydja dhäwu‐ḻakaranhamirriyu walalay ŋuli yukurranha ḻakaranha ŋunhina wal'ŋu dhäwu ŋunhi ŋayipina Godnha maḻŋ'maranhaminya ŋuli yukurranha walalaŋgala, nhaltjanna ŋayi yurru Godthu djäma yukurra ŋunhi ŋurikinydja walalaŋgu yolŋu'‐yulŋuwu ŋunhi walala yukurra märr‐ŋamathirri ga malthun nhanŋuway dhärukku, ga nhaltjanna yurru ŋunhana‐bala yalalanydja, ŋunhi ŋayi yurru Godthu walŋakuma nhanŋuwaynydja wal'ŋu ŋunhi yolŋunhanydja walalanha ga bukmaknha dhika yolŋunha ŋunha marrtji bäpurru buku‐ḻiw'marama nhina, ŋunhi ŋayi yurru walŋakumana walalanha ŋurikala Walŋakunharamirriwala Yolŋuwala ŋunhi ŋayi boŋguŋu djuy'yurru ŋanya lili.

Yuwalknha bukmakthu dhiyaŋu djorrayu yukurra ḻakarama Godnha ŋanyapinyaynha, ŋunhi ŋayi nhaltjarra ŋäthilimirriyaŋala dhuwala wäŋa ŋaraka ŋurikinydja waluwu ŋunhi yurru ŋayipina wal'ŋu nhanŋuway gäthu'mirriŋuna Djesuna buna dhiyala munatha'ŋura, ga rakunydhirrina yurru ŋilimurruŋgala dharapulŋura, märr yurru ŋula yol märr‐yuwalkthirrinydja nhanŋu ga malthun nhanŋuwaynha dhärukku, ŋunhiyinydja yolŋu yurru walŋathirrina ŋuliwitjan Djesuwalaŋukurru gulaŋ‐waṉḏinyarayu.

Dhuwalanydja djorra wukirriwuy wiripuwuŋu ga wiripuwuŋu yolŋu'‐yulŋuwuŋu barrkuwatj yana, yurru ŋayipi yana Godthu wekaŋalanydja marrtjina walalaŋgala dhäruktja malanha, ga yuwalknha dhuwalanydja dhäruk malanha nhanukuŋuwaynha yana dhäwu Godkuŋuna. Ŋuriŋiyi yolŋu'‐yulŋuyu wukirrinydja dhuwala dhäwuny'tja Hebrewkurru dhärukkurru, ga yalalana wiripuwurruyunydja dhuḏakthurruna bilmaraŋala ŋunhi yana liŋgu dhäruk ga ŋäpakililina dhäruklili bala wiripulili ga wiripulili dhäruklili guḻku'lilina. Bala dhiyaŋunydja‐wala nhuma yukurra yurru nhäma Gumatjkurruna ŋunhiyi yana liŋgu waŋgany dhäwu.

Dhiyalami djorra'ŋura wiripunydja dhäwu malanha dhaŋaŋ dhäwu, balanyara yana liŋgu bitjan nhuma yurru maḻŋ'marama ŋunhi ŋäpakikurru dhärukkurru, ga wiripuŋuranydja makarr dhäruk malanha dhiyalami djorra'ŋura ḻakarama yukurra gurriri yana. Nhuma yurru dharaŋanna yana nhämanydja ŋunhiyinydja wukirriwuy märr‐gurriri, liŋgu ŋunhiyinydjayi dhäruk yukurra dhärra märr‐napuŋga yana ŋuliŋuru wiripuŋuru dhärukŋuru.

Guḻku' ŋunhi yäku dhiyalami dhäwuŋura ḏäl mirithirri waŋanharawu ga nhänharawu, bala ŋanapurru wukirri ŋunhiyi yäkunydja malanha märr‐dharaŋanarawu. Ŋunhi yurru nhe nhäma dhuwala wukirriwuynydja * bitjan dhiyalami dhäwu'ŋura, nhe yurru nhäma ŋunhiyi ŋäpakikurru ŋäṉarr ŋunhana gal'ŋu dhuḏiŋura djorra'ŋura.

Ga ŋunhanydja bala dhawar'yunaraŋurana wal'ŋu nhe yurru maḻŋ'marama mali, wäŋana ŋarakana ḻakarama yukurra, ŋunhi yukurra milkumana dharapulnha malanha wanhami yukurrana maḻŋ'thurruna bitjarrayi ŋunhiyi dhäwu'yu yukurra ḻakaramana dhiyalami djorra'yuna.

Ŋanapurru yukurra bukumirriyama Godnha, märr yurru nhuma marŋgiyirrina Godku nhanŋuway balakurru‐witjan djorra'kurru. Ŋanapurru ḏukṯuk nhumalaŋgu, nhuma yurru ḻiya‐ŋamaŋamayunmiyana nhunapinyay nhe buku‐ŋal'yunarawu yuwalkku ŋunha Godku, märr nhe nhina yukurra yurru ŋamakurru'yuna romdhu nhanukalaynha yana. Ga manymak yana ŋunhiyi New Testamenttja, nhuma yurru wiripunydja nhäma ŋunhiyi Gumatjkurrunydja dhärukkurru, liŋgu ŋunhiyinydjayi ḻakarama yukurra biyapulnha wal'ŋu Godnha, ga nhanŋu gäthu'mirriŋunha Djesu‐Christnha, ŋunhinhaŋgayi Walŋakunharamirrinha ŋunhi Godthu djuy'yurruna ŋanya lili yolŋuwu walalaŋgu walŋakunharawu, bukmakku bäpurruwu ŋunhi nhina yukurra dhiyalami munatha'ŋura.