1 Bala ŋarra ŋäkula rirrakaynha, ŋayi waŋananydja ŋarrakala bitjarra gam'. “Way yolŋu, gaŋgathiyana djingaryurrana; ŋarranydja yurru waŋana nhuna.” 2 Ga dhunupana yana Godku Walŋanydja Birrimbirr gulŋiyinana‐wala yana ŋarrakala rumballilinydja, bala ŋayi gaŋgathinyamirriyaŋalana ŋarranha, bala ŋarra dhärranana yukurrana. Bala ŋayi waŋana bitjarrana ŋarrakala, 3 “Way yolŋu, ŋarranydja nhuna yurru djuy'yunna, nhenydja yurru ŋarraku dhäwu'‐gänharamirrina ŋuruku yolŋu'‐yulŋuwu *IsraelYitjuralpuyŋuwuna. Walalanydja ŋunhi ŋarraku ŋapa‐nherraṉminana, bitjarra yana liŋgu bitjarra walalaŋgu märi'mu ŋäthili ŋapa‐nherraṉminanydja ŋarraku. 4 Ŋayaŋu‐ḏälmirrina walala ŋunhi yulŋunydja, yakana walala yurru nhina ŋarrakalanydja romŋura. Ŋarrapinydja dhuwala walalaŋgu Waŋarr God, ga ŋarranydja yukurra nhuna djuy'yunna walalaŋgala, märr nhena yurru ḻakaramanydja walalambala, wekamanydja nhe yurru ŋarrakuwaynha dhäwu'. 5 Mak walala yurru mäkiri'‐witjun, mak bäyŋu, yurru dharaŋan warray walala yurru yulŋunydja, ŋunhili ŋunhi ṉapuŋgany'tja walalaŋgala waŋgany yolŋu nhina yukurra, ŋunhi ŋayi yukurra yuwalk dhäwu' wekama, ŋunhiyi liŋgu dhäruk wekanhara Garraywuŋu yana.

6-7 “Yo, nhenydja dhuwala yolŋu yana wal'ŋu, yurru yaka barrariyanydja walalambala. Walala yurru nyinyaŋdhun ŋuyulkthirri nhuŋu, ga waŋa walala yurru yätjkuma nhuna, yurru yaka barrariyanydja walalambala ŋuripayinydja dhärukpanydja. Yananydja walala yukurra maḏakarritjthirri bukunydja, ŋapa‐nherraṉmirrinydja yukurra ŋarrakuna. Yaka nhenydja biyakayi barrariya walalambala dhärukpa, ŋuriŋi buku‐maḏakarritjthunydja, yana ḻakaraŋana walalambala ŋunhiyi yana liŋgu dhäruk ŋunhi ŋarra yurru wekama nhuŋu waŋanharawunydja. Mak walala yurru ŋäma mäkiri'‐witjun nhuŋu, mak yakana, liŋgu ŋuyulkthirrina walala yukurra ŋarrakunydja, yakana walala ŋuli dhäruktja märrama ŋarranha.

8 “Yo yolŋu, ŋäkana yana ŋunhi ŋarra yurru nhuna waŋanydja; yaka nhenydja biyakayi ŋapa‐nherraṉmiya, bitjan ŋunhiyi walala. Ma' dhänydja ḻapthurrana, ga ḻukiyana ŋunhiyi ŋula nhä ŋunhi ŋarrapina nhuna yurru wekama.” 9 Bala ŋarra nhäŋala goŋnha, ŋayi marrtjina djarryurruna lili ŋarrakala; djarryurrunanydja ŋayi ŋurikimirri warray djorra' dhoṯkunhara. 10 Bala ŋayi ŋuriŋi goŋdhunydja buḻuḻuyunmaraŋalana ŋunhi djorrany'tja, bala ŋarra nhäŋala djinawa'lilinydja dhäruknha wukirriwuynha, ga warraŋullili ŋunha ŋapalili wal'ŋu, yurru dhärukthunydja yukurra ŋuriŋi ḻakarama mariwuy ga bunharaminyarawuy ga ŋula nhäpuy malaŋuwuy ŋayaŋu‐yätjthinyarawuy ŋunhi yurru maḻŋ'thun marrtji.