1 Yo, waŋganymirrinydja ŋayi buŋgawayu *NebuchadnezzarNipukanitjayu bukaway'yinana, ga mirithinana ŋayi yana warwuyurrunanydja dhika wal'ŋu, yakana ŋayi ŋorrana. 2 Bala ŋayi djuy'yurruna dhäruknha ŋuriki nhanukalaŋuwu ŋayi ḻiya‐djambatjkuna yolŋuwu ga marrŋgitjkuna ga mangaṯa'mirriwu walalaŋgu, märr yurru walalana yukurra ḻakarama mayaliny'tja ŋurikiy bukaway'wuynydja nhanŋu. 3 Bala ŋayi waŋananydja walalaŋgala bitjarrana ŋunhiyi buŋgawanydja, “Way, warwuyundja ŋarra yukurra dhuwala mirithirri yana. Bukaway'yina ŋarra dhuwala nhä malanha, ga nhumanydja yurru ŋarrakala maḻŋ'maramana ḻakaramana nhä ŋunhi mayali',” bitjarra ŋayi.
4 Bala walalanydja buku‐wakmaraŋala waŋana nhanŋu bitjarra, “Yo, nhenydja yurru ḻakaraŋa ŋanapurruŋgala bukaway'wuy, ga ŋanapurrunydja yurru ḻakarama mayali'na ŋurikiyi.” 5 Ga ŋayinydja buŋgawanydja ŋunhi waŋana bitjarra, “Yaka ŋarra yurru dhuwala ḻakaramanydja ŋunhi ŋarrakuway bukawayny'tja; nhuma yurru ŋarraku ḻakaramanydja nhä ŋarra ŋunhi bukaway'yina, ga biyapul nhuma yurru mayaliny'tja ḻakarama. Ga ŋuli nhuma yurru yaka dhunupa ḻakarama wal'ŋu, ŋarranydja yurru nhumalanha bumana yana murrkay'kumana. 6 Ga ŋunhi nhe yurru ŋula yolthu ḻakarama bukaway, ga mayali' ŋanya ŋunhiyi bukaway'nha, ga ŋarranydja yurru rarr'yun nhumalaŋgu biyapulnha ḻatju'mirrina dhikana girri' yana, bala bukmaknha nhuŋu yurru märr‐ŋal'yundja yukurra. Ma' ḻakaraŋa ŋarrakala. Nhä ŋarra bukaway'yinanydja?”
7 Ga walalanydja waŋana bala ŋurikala buŋgawawalanydja bitjarra, “Way, nhepi muka yurru dhuwala ḻakaramanydja ŋanapurruŋgala bukawayny'tja nhuŋuway, ga ŋanapurrunydja yurru ḻakarama mayali'na ŋunhiyi bukaway' nhokuŋu,” bitjarra walalanydja.
8-9 Bala ŋayi ŋunhi buŋgawanydja maḏakarritjthinana walalaŋgu bitjarrana, “Nhumanydja yukurra dhuwala mayali'‐wilkthunna ŋarranha. Be muka dhuwala nhumanydja ḻiya‐djambatjmirri be yolŋu walala. Ŋarranydja yurru nhumalanha bumana dhuwala murrkay'kumana, ŋunhi nhuma yurru yakanydja ḻakarama. Ma' ḻakaraŋa ŋarrakala nhä ŋarra bukaway'yina, bala ŋarra yurru dharaŋanna ŋunhi nhumanydja ḻiya‐djambatjmirri gal'ŋu, yuwalk gal'ŋu marŋgimirri nhuma.”
10-11 Bala walalanydja buku‐wakmaraŋala bala nhanŋunydja bitjarra, “Way buŋgawa, yakana yurru ŋula yolthu yolŋuyu nhuŋu ḻakaramanydja bukawayny'tja; walalawuynha ŋunhi marŋgimirri waŋarrnha malanha ŋurikiyinydja, ga ŋunha walala barrku yulŋunydja nhinanydja yukurra, be‐wala birr, yaka dhiyalaŋumi galki ŋanapurruŋgalaynydja.”
12 Bala ŋayi ŋunhi buŋgawanydja mirithinana wal'ŋu maḏakarritjthinana dhikana, bala ŋayi yatjurrunana waŋananydja, “Buŋana walalanha, dhawar'maraŋana yana bukmakkuŋana, ga yakana yana yurru dhuwali walala waŋgany ŋula walŋathirrinydja.”
13 Yo, walala bini warrpam' muka bunhanydja walalanha dhawar'maranha, ga bitjanayi liŋgu walala bini bunhayi †DanielDänyulnhanydja ga ḻurrkun'nha ŋunhiyi ‡IsraelYitjuralpuyŋunha, bäythi ŋunhi walala ŋunhilimi yakanydja ŋulinyaramirriyu ŋunhi ŋayi yukurrana buŋgawayu waŋana walalanha, “Ḻakaraŋana ŋarraku bukaway'wuynydja, nhä ŋarra bukaway'yina,” bitjarra.
14-15 Ga ŋayinydja §2:14–15 DanielDänyulyunydja ŋunhiyi ŋäkula, bala ŋayi marrtjinana, bala waŋanana ŋanya ŋunhiyi buŋgawawu djämamirrinhanydja bitjarrana, “Nhäku warray dhika nhuma yurru bumanydja ŋanapurrunha?” Ga ŋayi buŋgawanydja ŋunhi djämamirri waŋana buku‐wakmaraŋala nhanŋu Dänyulwunydja bitjarra, “Yakana ŋula waŋganydhu ḻiya‐djambatjthu yolŋuyu ḻakarama yurru bukaway'wuynydja, ŋunhi ŋayi buŋgawayu bukaway'yina.”
16 Bala ŋayi Dänyulnydja waŋana bitjarrana, “Bulnha ŋathili, galkurra ŋe! Ŋarrana yurru ḻakarama ŋurukala buŋgawawalanydja, nhä ŋayi bukaway'yina, ga mayali' ŋurikiyi.” Bitjarra ŋayi Dänyulyunydja waŋana. 17-18 Bala ŋayi marrtjina balayi, ga waŋana ŋunhiyi ḻurrkun'nha ḏarramuwurrunha bitjarra, “Nhumanydja yukurra yurru bukumirriyama, ŋäŋ'thurra ŋanya Godnha, ŋayi yurru mel‐wuyun ŋilimurruŋgu dhiyakuyinydja; ŋayi yurru ḻakarama ŋilimurruŋgu bukaway'wuy ga ŋunhiyi mayali', märr yurru ŋilimurru yaka muka burakirrinydja nhanukuŋu.”
19 Ga ŋulinyaramirriyu liŋgu munhakunydja Godthu warraŋulkuŋala maḻŋ'maraŋalana Dänyulwala, ŋayi ḻakaraŋala nhanukala nhä ŋunhi ŋayi ŋuriŋi buŋgawayu bukaway'yina, ga biyapul mayali'na ŋurikiy bukaway'wuy. Bala ŋayi Dänyulyunydja mirithinana dhikana buku‐wurrparanydja, wokthurrunana manapara Godku djiwarr'wuywunydja wal'ŋu, waŋana bitjarrana gam'.
24 Yo, bala ŋayi marrtjinana ŋunhiyi *DanielDänyulnydja bala buŋgawawalaŋuwalana djämamirriwala, ga ḻakaraŋala bitjarrana, “Yaka ŋanapurrunha buŋa ŋi', yana ŋanapurrunha gäŋa balayi ŋurikala buŋgawawala, ga ŋarrana yurru ḻakaramanydja nhanbala ŋuripayi mayaliny'tja ŋanya ŋunhi bukaway'wuy.” 25 Ga dhunupana yana ŋayi ŋanya gäŋalanydja balayina buŋgawawalana, bala ŋayi waŋana nhanukala bitjarrana, “Wäy, †IsraelYitjuralpuyŋunhanydja dhuwala ŋarra maḻŋ'maraŋala, ga ŋayina yurru ḻakarama nhokala bukaway'wuynydja ga mayali' ŋunhiyi bukaway'wuy.”
26 Ga ŋayinydja ŋunhi buŋgawanydja waŋana nhanukala Dänyulwala bitjarra, “Yuwalk nhe yurru ŋarrakala ḻakarama bukaway'wuynydja? . . . nhä ŋarra bukaway'yina” bitjarra.
27 Ga ŋayinydja Dänyulnydja waŋana bitjarra, “Buŋgawa, yakana yurru ŋula yolthunydja yolŋuyunydja ḻakarama nhokala nhä nhe bukaway'yina, bäyyi ŋunhi muḻkurr‐djambatjtja yolŋu wo ŋula nhä marrŋgitj. 28 Yurru ŋayipina yana Godnha djiwarr'wuynha ŋunhi marŋginydja bukmakku, ga ŋayipina yurru yana maḻŋ'marama warraŋulkumanydja nhä malanha ŋunhi ŋorra yukurra djuḻuḻ'yun. Ŋuliwitjandhi bukaway'kurrunydja Godthu nhokala maḻŋ'maraŋala ŋunhi nhä yurru maḻŋ'thun yalala, ga dhuwala ŋunhi nhe bukaway'yinanydja gam'. 29 Nhenydja yukurrana ŋunhi ŋorrana yulŋunydja, bala ŋayi Godthunydja nhokala milkuŋalana yana nhänydja malanha ŋunhi yurru yalala maḻŋ'thun. 30 Ŋarranydja dhuwala yolŋu yana, yaka ŋarra ḻiya‐djambatjtja dhiyakuyi malaŋuwu, yurru marŋgi ŋarra dhiyaku yulŋunydja, ŋarra yurru ḻakaramana nhokala, liŋgu Godthu ŋarrakala ŋayipi maḻŋ'maraŋalanydja warraŋulkuŋalanydja, märr nhe yurru marŋgiyirri.
31 “Yo, nhäŋalanydja nhe ŋunhi yolŋunha malinydja, ga dhärrananydja ŋayi yukurrana ŋunhiyi biyapul'nha wal'ŋu bathala, yurru rumbalnydja ŋayi ŋunhiyi mali djaḻkarr'yurruna yukurrana djingaryurrunanydja dhika, barrarimirrina ŋunhi ŋayi yulŋunydja rumbalnydja. 32 Ga muḻkurrnydja ŋunhiyi mali ḻatju'na ŋanyana dhikana garwarrwarr'nha, milŋ'‐milŋdhurrunana yukurrana wirrkina, ga gumurr ga waṉa balanyarayi liŋgu ḻatju', yurru märr‐gaŋga milŋ'‐milŋdhunara, ga gandarrŋurunydja, ga yana liŋgu ga yuṯuŋgurrlili wapthun milŋ'‐milŋdhunara yana yulŋunydja, yurru märr ŋuli ya', 33 ga yaṯanydja ŋunhinydja ḏälnha, yurru yaka milŋ'‐milŋdhunaranydja ŋunhiyi, ga djalkirinydja ŋunhiyi djämawuy beŋgurruwuynha bitjanarana, ḏälnha ŋunhi djambaka beŋgurruwuy dhoḻuwuynha ŋunhi manapanarana ŋunhiyinydja. 34-35 Yo, nhäŋalanydja nhe yukurrana ŋunhiyi malinydja, bala nhe nhäŋala ŋunhina bathalana guṉḏa; ḏaw'yurrunanydja ŋayi beŋuruyi bukuŋuruna, bala wutthurrunana ŋunhi malinhanydja djalkirina, ga dhunupana ŋunhiyi malinydja galkina, buḻwaŋ'thurrunana yanana warrpam'nha muṉguythinana, bala watayunydja bo'yurrunana‐wala yana, ga yakana ŋunhiliyi ŋula nhä ŋorrananydja yukurrana, warrpam'nha yana buwayakthinana. Ga guṉḏanydja ŋunhiyi biyapul ŋayi ŋuthara bathalayinana buku‐weyin'thinana, yana liŋgu ga warrpam'nha ŋunhiyi wäŋanydja ŋäkirrmaraŋalana ŋuriŋiyinayi guṉḏayuna.
36 “Yo buŋgawa, dhuwalayi ŋunhi nhe bukaway'yinanydja, ga dhiyaŋunydja‐wala ŋarra yurru nhuŋu ḻakarama mayali'na ŋanya bukaway'nha ŋunhi. 37 Nhenydja dhuwalanydja biyapulnha buŋgawana nhe, bathalana wal'ŋu, biyapulnha gal'ŋu ŋurukala wiripu‐guḻku'walanydja ŋurru'‐ŋurruŋuwala buŋgawawala walalaŋgala; ḏäl nhe dhuwala mirithirri yulŋunydja, ga miṯtji‐guḻku'mirrina biyapulnha, liŋgu Godthu ŋayipi ŋurruŋukuŋalanydja nhuna ŋunhi nherraranydja. 38 Dhipali nhokalanydja goŋlili ŋayi wekaŋalana bukmak dhuwala wäŋa, ga yolŋu'‐yulŋunha nhokalaynha goŋlili bukmakkuŋalana. Yo, muḻkurrnydja ŋunhi mali nhe nhäŋala, ŋunhinydja ḻakarama yukurra nhunana. 39 Ga dhäŋuru ŋuliŋurunydja ŋunhi nhokala goŋŋuru yurru dhawar'yunna, ga ŋayinydja yurru wiripuŋuyuna buŋgawayu ga miṯtjiyu goŋdhu ŋayathama yukurra dhuwalayi wäŋa bukmak yana, ga ŋunhiyinydjayi nhanŋunydja wäŋa yurru ḻatju', yurru märr‐gaŋga ga biyapul'nha ganydjarr‐ḏumurruna, balanyarana liŋgu bitjan nhe. Ga dhäŋuru ŋuliŋurunydja nhanukalanydja ga wiripuŋuwalana yurru goŋŋura buŋgawawala warrpam' wäŋa. 40 Ga dhäŋuru ŋuliŋuruyi ga wiripuna yurru gaŋgathirri buŋgawa, ga ŋayinydja yurru yukurra ŋayathama ŋunhi wäŋa bukmak yana goŋdhu, ŋunhinydja ḏälnha mirithirrina wal'ŋu, ŋuriŋinydjayi yukurra yurru bumana bäpurru'nha ga miṯtjinha warrpam'thunna baḏuwaḏuyun.
41 “Ga djalkirinydja ŋunhi nhe nhäŋala, djämawuy dhoḻuwuynydja waŋgany‐manapanarana ḏälwuynha djambaka'wuynha, ŋuriŋiyinydjayi yukurra ḻakarama wäŋa dhuwala, goŋŋura ŋurikala wiripuŋuwalana buŋgawawala ŋunhi ŋayina yurru yukurra nhina, ga nhanŋunydja yurru rom biyapulnha ḏälnha; rom‐ḏälyirrina ŋayinydja yurru, yurru märr ŋuli yalŋgi. 42-43 Yo, ŋunhi djambaka ga dhoḻu ŋunhi, yakana maṉḏa ŋuli waŋgany‐manapanmirrinydja mam'maranhamirri waŋganygunharamirrinydja, ga ŋunhiyinydja malanha yurru barrku'‐barrkuwatj yana yulŋunydja. Yana bini walala dhambay‐manapanminya muka yulŋunydja, yurru ŋunhiliyinydjayi buŋgawa walala yukurra yurru nhina wiripunydja ḏälmirri ga wiripunydja yalŋgi' wal'ŋu; yaka walala yurru waŋgany‐manapanmirrinydja bitjan waŋganygunharamirrinydja miṯtji. 44 Ga ŋulinyaramirriyunydjayi Godthu djiwarr'wuyyunydja yurru ŋayipina ŋunhinydja nherraṉmirri nhanŋuwaynha rom, ga ŋunhiyinydja nhanŋunydja yurru wäŋa ga rom yukurra dhärra gupaḏalnha‐wala yanana yurru. Yo, ŋuriŋiyi Godkalanydja yurru ḏaw'‐ḏawyunna warrpam'thunna ŋunhi wiripunydja malanha rom, buḻwaŋ'marama yurru winya'yunmaramana, ga ŋuriŋi nhanukalanydja romdhu yurru warrpam'nha monyguma ŋäkirrmaramana dhuwala munathany'tja wäŋanha, ga dhärranydja ŋayi yurru yukurra bitjanna liŋguna, gupaḏalnha‐wala yanana. 45 Yo, ŋunhiyinydjayi guṉḏanha ŋunhi nhe nhäŋala bukaway'ŋura, gäna ŋunhiyinydjayi ḏaw'yurruna ŋuliŋuruyi bukuŋurunydja, yaka ŋula yolkuŋu djämawuy bitjanarayi, yana ŋayi ŋunhi buku‐yupthurrunanydja, bala wutthurrunana buḻwaŋ'maraŋalana ŋunhiyi malinydja yana warrpam'thurrunana. Yo, ŋuliwitjarrayinydjayi bukaway'kurrunydja Godthu ŋayipi ŋuruŋu djiwarr'wuyyu waŋarryu milkuŋalanydja nhokala ŋunhi nhaltjan yurru maḻŋ'thun yalala, ga yuwalk yana yurru ŋunhiyi rumbalthirri maḻŋ'thundja bitjandhiyi.” Ga bitjarra ŋayi yukurrana ŋuriŋi Dänyulyunydja ḻakaraŋala ŋuripa buŋgawawanydja.
46 Bala ŋayi ŋunhi buŋgawanydja ṉepaḻ‐nyilŋ'thurruna, bala buku‐ŋal'yurrunana ŋayi dhunupana ŋuriki Dänyulwalaŋuwuna Godkunydja, waŋananydja ŋayi marrtjina bitjarra, 47 “Nhuŋunydja God dhuwala biyapul warray wal'ŋu bathala, djuḻkmarama yukurra wiripuŋunhanydja ŋunha waŋarrnha malaŋunha. Ŋayinydja ŋunhi Garray wal'ŋu buŋgawawu malaŋuwu, ŋayipina yurru yana maḻŋ'marama warraŋulkumanydja nhä yukurra ŋorra djuḻuḻ'maranhara, liŋgu nhenydja maḻŋ'maraŋala ŋarrakala nhä yurru maḻŋ'thun yalala.”
48 Bala ŋayi ŋuriŋi buŋgawayunydja wekaŋala mundhurrnha Dänyulwunydja, ḻatju'mirrina ŋanyana dhikana nhä malanha, bala ŋayi nherraranydja ŋanya, ŋunhi ŋayinydja Dänyulnydja ŋurruŋuna ŋayi bukmakkuna ŋuriki ‡BabylonBapilunbuyŋuwu wäŋawu. Ga ŋayina yurru Dänyulnha ŋurruŋunydja ŋurikinydja walalaŋgu ḻiya‐djambatjmirriwunydja yolŋu'‐yulŋuwu bukmakku yana. 49 Ga bitjarrayi liŋgu ŋayi wiripu‐guḻku'nhanydja ŋurruŋukuŋala ḻurrkun'nhanydja ŋunhi Dänyulwu ḻundu'mirriŋunha walalanha §ShadrachDjaturaknhanydja ga *MeshachMitjaknhanydja ga †AbednegoBitnikunha, ga walalana yukurrana djäka ŋurikiyi bukmakkunydja yana wäŋawu Bapilunbuyŋunydja, ga Dänyulyunydja ŋayipinydja djäma yukurrana galkina gal'ŋu buŋgawawalana nhanukalana yana.
<- DÄNYULWALAŊUWUY DHÄWU 1DÄNYULWALAŊUWUY DHÄWU 3 ->