1 Yo, ga biyapul ŋayi ŋunhiyi djiwarr'wuyyu yolŋuyu ḻakaraŋala ŋarrakala bitjarra gam'. “Ŋulinyaramirriyunydjayi dhä‐yawar'yunaramirriyunydja waluyu, ŋunhiyinayi yolŋu djiwarr'wuy dharrpalnha wal'ŋu yurru marrtji yäku *MichaelMäykuḻnha, ŋunhina ŋunhi ŋayi ŋuli yukurra gunganhamirriyama ŋapatjkuma nhumalanha †IsraelYitjuralpuyŋunha yolŋunha walalanha. Yo, ŋulinyaramirriyunydjayi mirithirrina yurru ŋanyana bathalana marinydja maḻŋ'thun. Yaka ŋäthilinydja bitjarrayi maḻŋ'thurruna bathala mari, yurru ŋulinyaramirriyunydjayi Godthunydja yurru nhanŋuwaynydja yolŋu'‐yulŋunha dhawaṯmarama ŋuliŋuruyi mariŋurunydja, walŋakumana ŋayi yurru bukmaknhana yana wal'ŋu, ŋunhinhanydja walalanha ŋunhi walala yukurra dhärra'‐dharra yäku ŋunha Godkala djorra'ŋura. 2 Ga mirithirri guḻku' yolŋu walala ŋunhi walala marrtjina murrmurryurruna ŋäthili, walalanydja yurru gaŋgathirrina beŋuru moluŋurunydja yukurra, rumbal manapanna yurru; wiripu‐guḻkuny'tja yurru marrtji ga nhina ŋunhili galki nhanukala Godkala yana gal'ŋu gupaḏalnha‐wala, ga wiripu‐guḻku'nhanydja ŋunhinydja yurru djalkthunna yana, bala walala yurru nhina yukurra ganaŋ'thunna‐wala Godkalanydja gupaḏalnha‐wala. 3 Ga ŋunhinydja walala yolŋu'‐yulŋu ḻiya‐djambatjmirrinydja gal'ŋu, ŋunhi walala yuwalk gal'ŋu marŋgi Godku, ŋunhi walala yukurra bilyunmarama guḻku'nha mirithirri yolŋunha walalanha, märr yurru walala marrtji Godkalana yanana dhunupa'ŋukurruna dhukarrkurru, ŋunhinydja walala yolŋu'‐yulŋu yurru dhärra bitjanna bitjan djarraṯawun'mirrina gal'ŋu, bitjan walu ga ganyu' malanha, gupaḏalnha‐yana walala yurru yukurra räkukumanydja wäŋanha buku‐ḻiw'maramana.”

4 Bala ŋayi ŋunhi djiwarr'wuynydja yolŋu waŋana ŋarrakala bitjarrana, “‡DanielDänyul, dhaḻ'yurrana dhuwali djorrany'tja, bala mam'maraŋanydja ŋuriŋina girri'yu mam'thunmaranharamirriyuna. Yo, dhuwalayi dhäruktja yurru dhärra yukurra dhaḻ'yunara yana, ga yakana ŋula yolthu yurru maḻŋ'marama ga dharaŋandja dhuwalayi mayali', ga yana liŋgu‐u‐u ga ŋuriŋi dhä‐yawar'yunarayuna waluyu ŋayi yurru ḻapthundja. Yo, ŋuriŋiyinydjayi dhä‐yawar'yunarayunydja waluyu yolŋu walala yukurra yurru marrtji bala ga lili, bitjanna yukurra, dhuḏithu bala ga bala bitjan, bitjanna yurru yukurra wäŋgamanydja yolŋunydja walala, ga yolŋu'‐yulŋunydja yurru marŋgiyirri mirithirrina guḻku'na nhäku malaŋuwu ŋunhi yukurra dhiyaŋu‐wala ŋorra djuḻuḻ'yun.”

5 Bala ŋarra nhäŋala märrma'nhana yolŋunhanydja maṉḏanha, maṉḏa yukurrana dhärrana galki mayaŋŋura gapuŋura, waŋganydja ŋunhala bala gali'ŋura, ga waŋganydja dhiyala lili gali'ŋura. 6 Bala waŋganydhu dhä‐wirrka'yurruna ŋanya ŋunhi djiwarr'wuynha yolŋunha bitjarra, “Nhämunha' dhuŋgarra yurru ŋupandja yukurra, yurruna ŋayi yurru ŋunhi mari bathalanydja ḏaḏawyun?”

7 Bala ŋayi ŋunhiyi djiwarr'wuynydja yolŋu goŋ‐garrwarthina bala djiwarr'lilina, bala ŋayi yana dhawu'‐nherrarana yäkuyu Garraywalana, waŋana bitjarrana, “Ŋuriŋiyinydjayi dhuŋgarrayu ḻurrkun'thunydja ga 6‐thu ŋaḻindiyu, ŋulinyaramirriyunydjayi yukurra yurru bumana yolŋunha walalanha, bitjanna ŋayaŋu‐yätjkumana yurru yukurra ŋunhi Godkunydja yolŋunha walalanha nhanŋuwaynydja. Yo, ŋurruŋunydja yurru dhuwalayi malanha maḻŋ'thun, yurruna ŋunhiyinydjayi ŋayaŋu‐yätjthinyaramirrinydja rom yurru dhawar'yun.”

8 Yo, ŋarra ŋäkula rirrakaynydja ŋanya ŋunhi waŋanharanydja ga dhäruktja, yurru yakana ŋarra ŋunhi dharaŋaranydja mayaliny'tja. Bala ŋarra dhä‐wirrka'yurruna ŋanya biyapul, “Wäy, nhä yurru ŋunhala bala dhä‐yawar'yunaraŋuranydja dhika maḻŋ'thun?”

9 Bala ŋayi ŋunhiyi djiwarr'wuynydja yolŋu waŋana bitjarrana, “Gatjuy marrtjiyana nhenydja yurru Dänyul, liŋgu mayaliny'tja yurru ŋunhiyi dhäruktja ŋorra yukurra djuḻuḻ'yunna, ga yana liŋgu‐u‐u ga dhä‐yawar'yunaramirriyu ŋuriŋiyi waluyu, ga ŋulinyaramirriyunayi waluyu yolŋuyunydja walalay yurru dharaŋan ŋunhi mayaliny'tja.

10 “Yo, guḻku'na mirithirrina yolŋu walala yurru yukurra ḏarrtjalkthirrinydja dhikanydja wal'ŋu ŋuriŋi ŋayaŋu‐yätjthinyaramirriyunydja romdhu malaŋuyu gatjarr'yunaramirriyunydja, bala walala yurru ḏarrtjalknha ŋanya dhikana, ŋula nhämiriwnha. Yurru ŋuriŋi yätjthunydja wal'ŋu dhuwurr‐yätjthunydja yolŋuyu, ŋayi yurru djäma mukthunna‐wala yana ḻay‐ŋarr'ŋarrnha yukurra, yakana walala yurru dharaŋan. Yurru ŋuriŋina ḻiya‐djambatjmirriyuna yolŋu'‐yulŋuyu, ŋunhi walala marŋgi gal'ŋu Godku, walalana yurru dharaŋandja wal'ŋu mayaliny'tja ŋunhiyi.

11 “Yo, ŋayinydja yurru ŋuriŋinydja yolŋuyu gulmaramana ḏaḏawmaramana yolŋu'‐yulŋunha, märr yurru walala yakana yukurra gäma ga bathan mundhurr Godkunydja Garraywunydja ŋunhiyi biyapulnydja, bala ŋayi yurru nherraṉ be nhäna nhäŋiniŋ'nha, yätjnha gal'ŋu yanana, ŋunhiwala Godkalanydja Buṉbulili. Ga ŋuliŋuruyinydja dhäŋuru ŋunhi ŋayi be nhä nherrara, ga ŋula nhämunha' yurru mirithirri guḻku' walu djuḻkthun, 1200‐nha ga 90‐na walu. 12 Ga ŋunhinydja yolŋu ŋunhi ŋayi yurru yukurra dhärra mukthun ŋunhili liŋgu Godkala yana romŋura, märr‐nherraṉmirri gal'ŋu yuwalkkuma yana nhanukala, yana liŋgu ga ḏaykun' yurru djuḻkthunna marrtji, guḻku'na mirithirrina ḏaykun', 1300‐nha ga 53‐na, ŋayinydja yurru ŋunhinydjayi yolŋu ŋunhi ŋayi dhärra yukurra wuṉḏaŋarr, Godthunydja yurru ŋanya mirithirrina gal'ŋu goŋmirriyama.

13 “Dänyul, nhenydja mukthurrana‐wala yana märr‐nherraṉmiyana‐wala Garraywalanydja, ga yana liŋgu ga rakunydhirri nhe yurru, ga yalalaŋumirriyunydja ŋunhinydja dhä‐yawar'yunarayunydja nhe yurru gaŋgathirrina biyapul walŋathirriyi, bala nhe yurru märramana ŋunhiyinydja Godkuŋunydja buku‐ruŋinyamaranharawuynydja, ŋurikiy ŋunhi nhä nhe yukurrana djäma ŋamathaŋala.” Ga bitjarrayina ŋayi ŋuriŋi djiwarr'wuyyu yolŋuyu ḻakaraŋalanydja nhanukala Dänyulwalanydja.