1 Yo, nhuma ŋurru'‐ŋurruŋu yolŋu walala *IsraelYitjuralpuyŋu, nhuma yukurra nhina be ḻayḻayyun nhumalaŋgalay be nhäŋura malaŋuŋura ŋunha Godkalanydja bukuŋura wäŋaŋura. Yolŋu walala ŋuli marrtji nhumalaŋgala guŋga'yunarawu, ga nhumanydja ŋuli waŋa balanydja bitjan, “Manymak dhuwala warrpam'. Yaka ŋilimurrunha yurru ŋula nhäyu ŋayaŋu‐yätjkuma ga buma.” Yurru yuwalk yana ŋayi yurru marinydja bathala marrtji dhipalanydja wäŋalili, barrari‐wukunharamirrina yanana. 2 Gatjuy marrtjiya bala ŋunha ya' †PhilistiaBilitjiyalili wäŋalili, ga nhäŋa marrtjiya walalaŋgu wäŋa malanha. Ŋäthilinydja ŋunhinydja wäŋa ŋunhayi be bathala wal'ŋu, djuḻkmaraŋala yukurrana nhumalaŋgunydja wäŋanha, yurru dhiyaŋunydja‐wala nhuma yurru nhäma warrpam'nha bak‐bakmaranharana muṉguykunharana. 3 Wiripunydja nhuma ŋuli waŋa bitjan, “Godthu yurru yaka ŋanapurrunhanydja dhä‐ḏir'yun,” bitjan, yurru ŋuriŋi be nhäyunydja djarrpi'yunydja romdhu nhuma yukurra gumurr‐walkikumana lili ŋunhinhana walunha, ŋunhi ŋayi yurru Godthu dhä‐ḏir'yun mirithirrina gal'ŋu yana nhumalanha.

4 Dhiyaŋunydja‐wala nhuma marrtji ŋorra dhika ḻatju'ŋura ŋanya dhika wal'ŋu bala'palaŋura, ga ḻuka ŋatha ŋanya dhika djana'‐ḏilkurru wal'ŋu ŋanak wäyin. 5 Miyaman nhuma ŋuli manikay yiḏakiyu malaŋuyu nhumalaŋgalay nhuma, bitjarra bitjan ŋayi ‡DavidDaypitthu be ŋäthili gal'ŋu, 6 ga ḻuka nhuma ŋuli yukurra be bathalayu gal'ŋu yana banikin'thunydja wurkthun, ŋänitji wo dhika nhä malanha, ga ŋämiṉmirri nhuma ŋuli nhumalanhay nhuma rumbal be nhäyu buŋgan‐bäw'yu, ga dhaṯthunmirri be nhäyu rrupiya‐mäypamirriyu girri'yu, yurru yakana nhuma guyaŋirri yukurra ŋunha wiripuŋunhanydja nhumalaŋguway gurruṯu'mirrinha ŋunha Yitjuralwuynhanydja walalanha, ŋunhi walala yukurra nhina ŋayaŋu‐yätjthirri ga ŋäthi yukurra. 7 Yakana nhuma yukurra wirrki ŋarambiya'‐nherraṉmirri walalaŋgunydja gal'ŋu, ŋunhi walala yukurra nhina galŋa‐yätjthirri ŋula nhämiriwŋura. Ga dhiyakuyinayi märrwu ŋunhi ŋayi yurru miriŋunydja lili marrtjina ŋurruthirrina, bala walala yurru yana djaw'‐djawyunna nhumalanha walalaŋgalaynha wäŋalili bena‐wala. Ŋäthilinydja walala yurru djaw'‐djawyun nhumalanha ŋurru'‐ŋurruŋunha buŋgawanha walalanha, yurruna wiripu‐guḻku'nhanydja; yakana yana biyapulnydja nhuma yurru yukurra ḻuka ga ḻayḻayyun be nhäŋuranydja ḻatju'mirriŋuranydja dhikanydja wal'ŋu.

8 Yo, Godthunydja ŋayipinydja dhäruk nherrara ŋuriŋina bili nhanukalaynha ŋayi yana yäkuyu, dharraykuma yukurra waŋa bitjan, “Ŋunha Yitjuralnydja miṯtji bena dhika bathala‐ḻakaranhamirrina ŋayi yukurra ŋanyapinyay ŋayi. Walala ŋuli wokthun be walalaŋgalayŋuwu buṉbuwu malaŋuwu ŋuriki dhapirrkmirriwunydja ga ŋarranydja nyinyaŋdhun yukurra ŋapa‐nherraṉmirri ŋurikiyi walalaŋgalaŋuwu romgu be ḻanydjatkunydja, ga dhiyakuyinayi märrwu ŋunhi ŋarranydja yurru wekama dhuwala wäŋanhanydja, ga bukmak nhä malanha dhiyalaŋumi goŋlili ŋurikala miriŋuwalana. 9 Bäy warray yurru ŋunhi miṯtji märr‐ḻurrkun'tja nhina yukurra ŋunhili wäŋaŋura, warrpam'nha yana walala yurru murrmurryundja. 10 Ga ŋunhi ŋayi yurru gurruṯu'mirrinydja marrtji lili märranharawu rumbalwunydja, dharra'wunydja yolŋuwu, mak ŋula waŋgany yolŋu walŋa yukurra nhina buṉbuŋura ŋula djinawa', bala mak yurru yolŋunydja marrtji, bala dhä‐wirrka'yunna ŋanya ŋula yolnha bitjanna, ‘Wäy, ŋula yol walŋanydja yukurra nhina dhiyalaŋumi?’ bitjan yurru, ga ŋayinydja yurru buku‐wakmarama balanydja bitjanna, ‘Bäyŋuna.’ Ga ŋayinydja yurru wiripunydja waŋa mukthunmarama bitjan, ‘Way, mukthurra! Yaka waŋiya Garraynhanydja yäku ḻakaraŋa; ŋayi ŋuli bäynha ŋäku.’ ”

11 Yo, ŋayi yurru Garraynydja waŋa dhäruk yana waŋgany, bala ŋayi yurru warrpam'nha baḏuwaḏuyun buḻwaŋ'thunmarama wäŋanydja bathalamirri ga yumurrku', walala yurru buḻwaŋ'thundja warrpam'thunna yana muṉguythirrina ŋuriŋi bili dhärukthu waŋganydhu. 12 Yo, ŋunhina liŋgu bawa'mirrina yarraman' ŋuli waṉḏirri guṉḏakurrunydja bathalakurrunydja, ga ŋuriŋina bili bawa'mirriyuna yolŋuyu ŋuli marrtji gapu moṉuktja ŋunha buma dhalkaranharawu ŋathawunydja. Ga ŋunhi nhuma yurru waŋa warku'yun nhä ŋunhi dhunupa, ga ŋunhi nhuma yurru baḏuwaḏuyun nhä ŋunhi ŋamakurru' wal'ŋu, ŋunhiyinydjayi mirithirrina gal'ŋu yana bawa'mirrina rom bitjanarawunydjayi. 13 Wiripunydja nhuma ŋuli ŋurr'yun be wal'ŋu nhumalaŋgalay, ḻakaranhamirri bitjan, “Ŋanapurrunydja ḏälmirri warray, mirithirri warray wal'ŋu. Ŋanapurruway ŋunhanydja baḏuwaḏuyurruna ḏälmirrinydja wäŋa dhiyaŋu ŋanapurruŋgalay wal'ŋu ganydjarryu.”

14 Yo, Garraynydja waŋa yukurra bitjan, “Nhuma Yitjuralpuyŋu yolŋu'‐yulŋu, ŋarranydja yurru djuy'yun mulkurunhana miriŋunha, walala yurru marrtjinydja bena dhika miṯtji, bala walala yurru nhinana yukurra dhiyalanydja, ga walalana yurru nhumalaŋgu buŋgawamirrinydja.” Ga bitjarra ŋayi Garray waŋananydja.