WAYMUTJKUŊU DHÄRUK 2

1 “Ga bitjan yana liŋgu ŋarra yurru dhä‐ḏir'yundhi yolŋu'‐yulŋunha [a]Mawappuyŋunhanydja wirrki yana dhika wal'ŋu, liŋgu bitjan liŋgu walalanydja yukurra djäma yätjkuma; yakana walala yurru dhä‐ḏir'yunamiriwnydja marrtji yänanydja‐wala, liŋgu walala ŋaraka malanha djaw'‐djawyurruna beŋuru mathirraŋuru buŋgawanha Yedambuynha, bala dhuŋgur'yurrunana yana ḻirrwi'kuŋalana. 2 Bala ŋarra yurru djuy'yun gurthayi ŋunhiwalayinydjayi yana wäŋalili Mawaplilinydja ŋarakalili, ŋarra yurru warrpam'thunna nhäranhamaramanydja dhikana wal'ŋu yana yurru, ga ŋunhi be gumurr‐ḏäl gunganhara wäŋa, ŋunhinydja yurru buku‐yupthunna yanana. Yo, miriŋunydja yurru marrtjina ŋurruthirrina, ga yiḏakinydja yurru bena ḻoḻthun dhikana, ga ŋurikiynydja yolŋu'‐yulŋu Mawappuynydja wäŋawuy yurru marrtji murrmurryunna ŋuriŋiyinayi gunyambiyuna mariyuna. 3 Bala buŋgawana yolŋu ŋunhi ga ŋurru'‐ŋurruŋu yurru ŋurikiyinydjayi wäŋawuy murrmurryunna marrtji, bukmakthirrina yurru.” Bitjarra ŋayi Garray waŋananydja.

4 Ga dhäŋuru ŋuliŋurunydja ŋayi Garray waŋana bitjarra, “Ga nhuma dhuwali Djudawuy wäŋawuy ŋarrakuway yolŋu'‐yulŋu, nhumanydja yukurrana bitjarrayi liŋgu yana djäma yätjkuŋala, bitjarra yana liŋgu bitjarra ŋunha wiripu‐guḻku' bäpurru', ŋunhi walala yaka marŋgi ŋarraku, ga märr‐yuwalk yana ŋarra yurru nhumalanha dhä‐ḏir'yundja, ga nhumanydja yurru yakana yana marrtji dhä‐ḏir'yunamiriw‐wala yänanydja. Nhumanydja ŋunhi ŋarrakalaŋuwunydja romgu ŋuyulkthina, ŋapa‐nherraṉmina warray, yaka warray nhuma dhäruk märraŋala ŋarraku, bala nhumalanha yukurrana mayali'‐wilkthurrunana yulŋunydja, liŋgu ŋuriŋiyinydjayi bothinyarayŋuyunydja waŋarryu bilmaraŋalana nhumalanha, ŋanydjaḻa'yunmaraŋalana djämawu yätjkuna, bala nhuma malthundja yukurra ŋurikina nhumalaŋgalaŋuwu märi'muwuna walalaŋgalaŋuwu romgunydja, djarrpi'wuna yana. 5 Bala dhunupa yana ŋarra yurru djuy'yunna gurthana yulŋunydja wäŋalili ŋarakalili Djudalilinydja, yana ŋayi yurru nhärana‐wala yulŋunydja be wuṉḏaŋarrmirrinydja gal'ŋu wäŋa Djurutjalamdja.” Ga bitjarra ŋayi Garray waŋananydja.

Godthu yurru bitjandhi liŋgu dhä‐ḏir'yundhi Yitjuralnhanydja

2:6–16 (God will judge Israel)

6 “Yo, nhuma wiripunydja [b]Yitjuralpuyŋu yolŋu walala miṯtji, nhuma yukurrana djäma yätjtja bitjarrana liŋguna‐wala, ga yuwalkkuma yana ŋarra yurru dhä‐ḏir'yundja nhumalanha wirrki yana wal'ŋu. Yakana nhuma yurru winya'yun dhä‐ḏir'yunamiriwnydja, liŋgu yakana nhuma ŋuli djäka yukurra goŋ‐nherraṉmirri ŋuriki ŋurruwuykkunydja yolŋuwu. Wiripunydja nhuma ŋuli wekama rrupiyawuna ŋunhi dhuwurr‐ŋamakurru'mirrinhanydja yolŋu'‐yulŋunha, märr yurru walalanydja bitjan garrpiṉarawuynha yolŋu walala djämamirrina, 7 ga bitjandhi liŋgu nhuma ŋuli muŋdhu'‐muŋdhunna ŋunhinydja yolŋu'‐yulŋunha yalŋgi'mirrinhanydja ganydjarrmiriwnhanydja ŋunhi, ga bitjandhi liŋgu nhuma ŋuli ḏur'‐ḏuryunna marrtji ḻikandhuna wurrkurrum'nhanydja ŋunhi galŋa‐mundurrnhanydja yolŋunha. Wiripunydja ŋuli ḏarramuyu bäpa'mirriŋuyu ga yothuyu nhanukala ḏarramuyu märrama ŋunhinha liŋgu waŋganynhana miyalknha, bitjan ŋuriŋiyinydjayi ŋuli walala djäma buŋgulnha, buku‐ŋal'yunna wiripuŋuwuna ŋurikina waŋarrwu. Ŋunhiyinydjayi yätjnha wal'ŋu yanana mirithirrina, ga walalanydja yurru yolŋu'‐yulŋuyunydja nhämana ŋunhiwalayi djämalili bitjanaralilinydja, bala yätj ḻakaramana ŋarranha yäkunydja, yanapi ŋarranydja yakana ŋula ḏarrtjalk gal'ŋu. 8 Yo, marrtji nhuma ŋuli wiripunydja ŋunhiwalayi be nhäkalanydja wiripuŋuwalanydja waŋarrwala buṉbulili, bala ŋorrana marrtji ŋäkirrina nhuma ŋuli girri'yunydja ŋuriŋina manaŋinyarawuyyuna, ŋunhi nhuma yukurrana djaw'yurruna ŋulaŋuru ŋurruwuykkala yolŋu'‐yulŋuwala, ga ḻukanha nhuma ŋuli ŋänitji'na rrupiyawuy dhulŋuŋuwuynha ŋunhi nhuma gombuŋala yolŋunha ŋunhi yolŋumiriwnha ŋurruwuyknha.

9 “Yo, nhumanydja dhuwalanydja ŋarrakuwaynha gal'ŋu yolŋu walala yanana. Guyaŋiya biyaka ŋunhi ŋarra ŋäthili nhumalanha guŋga'yurruna wal'ŋu. Yuwalkkuŋala yana ŋarra baḏuwaḏuyurrunanydja ŋunhinydja [c]Yamarpuynhanydja miṯtjinha be weyin'kurrunhanydja ganydjarr‐ḏilkurrunhanydja, ŋunhi walala ŋuli nhinanha yukurranha dhiyala wäŋaŋura. 10 Yo, ŋarra dhawaṯmaraŋala nhumalanha beŋuru [d]Yetjipŋuru, ga gäŋala ŋarra nhumalanha goŋ‐gulaŋala yukurrana ŋanhdharkkurru lili wäŋakurru; djäkanydja ŋarra marrtjina wirrki yana gal'ŋu nhumalaŋgu ŋula nhämunha' dhuŋgarranydja ŋupara 40, märr yurru ŋayi dhuwalanydjayi wäŋa Yamarpuynydja nhumalaŋguway yana. 11 Yitjural, ŋarra djarr'yurruna nhumalaŋgunydja ŋunhi ḏarramuwurrunha, märr walala yurru djawarrkmirri ŋarrakuway, ga wiripu‐guḻku'nhanydja ŋunhinydja ŋarra djarr'yurruna, ga ganaŋ'maraŋalana ŋarrakuwaynha ŋarra wal'ŋu dhulŋuŋuna, yakana walala yurru ḻuka dhä‐wirrkiyirri ŋula nhä ŋänitji. 12 Yurru nhumanydja ŋunhi walalanha bilmaraŋala ŋarrakuwaynydja ŋunhi ganaŋ'maranharawuynhanydja walalanha, bitjarra leŋumirriyaŋalana ŋuriŋina ŋänitjiyuna, ga waŋa nhuma ŋuli ŋarrakalaŋuwalanydja ŋurikala djawarrkmirriwala walalaŋgala, mukmaramana walalanha bitjanna, ‘Way, mukthurra. Yaka ŋanapurru ḏukṯuk ŋanapurru yurru ŋäma Godkunydja dhäwu',’ bitjanna nhuma ŋuli. 13 Bala ŋarranydja yurru nhumalanha ŋayaŋu‐ŋonuŋgumana wirrkina wal'ŋu ṉiṉ'ṉiṉmaramana, bitjan nhuma yurru ŋorr'‐ŋurryunna ŋuriŋi ŋonuŋdhuna gänharayu. 14 Yakana yurru ŋula yol yolŋu waṉḏirrinydja winya'yundja, ga ḏälmirrinydja ŋunhi ḏarramuwurru yurru balayi yalŋgi'yirrina, ga ŋunhinydja be bathalamirrinydja gal'ŋu buŋgawamirrinydja yurru murrmurryunna yanana, yakana walala yurru walŋakunharamirrinydja walalanhawuy walala. 15 Liŋgu yolŋu ŋunhi garamirrinydja yurru waṉḏirrina‐wala yana, barrarirrina yurru; yakana yurru walala winya'yun‐wala walŋamirrinydja, bukmakthirrina yurru marrtji raku'‐rakunydhirrinydja ŋurikiŋi miriŋuwuŋuna bunhara. 16 Bäyyi ŋayi ŋunhi yolŋu be ŋayi ḏäl wal'ŋu barrarimiriw, yanana ŋayinydja yurru djalkthunna garanydja nhanŋuway ŋayi, bala waṉḏirrina yurru ŋulinyaramirriyunydjayi waluyu.”

<- WAYMUTJKUŊU DHÄRUK 1 WAYMUTJKUŊU DHÄRUK 3 ->