1 Bitjanna liŋgu dhuŋgarra‐manhdhinya walala ŋuli Giŋdja buŋgawanydja walala marililina marrtjinya, ga *DavidDaypitthunydja djuy'yurruna nhanŋuway ŋurru‐warryunaramirrinha †JoabDjawapnha yäkunha ḏarramunha, ŋayi yurru gäma ŋunhiyi miriŋunha mala‐warryun, ga ŋunhala walala yurru bunharamirri bäpurru ‡AmmonitesWamanbuyŋuwu, nyäṉ'thun yurru. Ga ŋayipinydja Daypittja ga ŋunhalana bäyma nhinana §JerusalemDjurutjalam warray, yaka warray ŋayinydja marrtjina marilili ŋunhimala.

2 Waŋganymirri ŋayi Daypit ŋal'yurruna bukulili ŋunha baṉgalkal'lili wäŋalili nhanukiyingala; marrtjina bala, ga dhut‐gay nhinana ŋunhimala, bala ŋayi nhäŋala djipthurruna bitjarra, dharr‐way nhäŋala dhäykanhana, ŋayi yukurrana ḻupthurruna nhanukiyingala ŋunhili bala wäŋaŋura, yurru ŋayi ŋunhi dhäykanydja dhika dhapirrknha ŋanyana djana'mirrina rumbal. 3 Daypittja ḏukṯukthinana ŋuriki dhäykawu, bala ŋayi djuy'yurrunana waŋganynhana djämamirrinha nhanŋuway, yol ŋayi ŋunhi dhäyka. Ga ŋunhi ŋayi djämamirrinydja marrtjina waṉḏina bala, ga ŋunhala maḻŋ'maraŋala ŋunhiyi dhäykanha, ga lilinydja ŋayi roŋiyinanydja ŋunhiyi ḏarramu djämamirri nhanŋu, ga ḻakaraŋalanydja, “Ŋunhayi dhäykanydja yäku *BathshebaBatjipa; miyalktja ŋayi ŋunha †UriahYurayawu dhäykanydja ‡HittiteYitpuyŋuwa ŋunhi ya'.”

4 Ŋayinydja dhika Daypittja wirrkina ḏukṯukthina nhanŋu ŋuriki dhäykawunydja, bala yana ŋayi djämamirrinhana nhanŋuway djuy'yurruna märranharawuna garr'yunarawuna ŋuriki miyalkku. Bala ŋayi gäŋalana ŋanya lili ga Daypitpana wekaŋala, ga ŋunhalana maṉḏa nhinana yukurrana wirrkina ḏukṯukthinyaminanydja maṉḏakuway maṉḏa. Ga dhäŋuru ŋuliŋurunydja bala ŋayi ŋunhiyi dhäykanydja marrtjina wäŋalilina roŋiyina. 5 Ga dhäŋuru ŋuliŋurunydja bala ŋayi yothumirriyinana, bala ŋayi dhäwu'na djuy'yurruna ŋuriŋi dhäykayunydja Daypitkuna, ga dhäwuny'tja ŋunhala bunana Daypitkunydja bitjarrana, “Ŋarranydja dhuwala yothumirrina. Gämanydja ŋarra yukurra dhuwala yothuny'tja nhuŋuna ŋunhi.”

6 Daypittja wirrkina dhika galyurrunanydja, bala yana ŋayi dhäwu'na djuy'yurruna Djawapkunydja, ŋunhi ŋayi ŋurruŋu ŋuriki miriŋuwu, bitjarra ŋayi dhäruktja djuy'yurruna, “Djuy'yurrana lili ŋunhinha ḏarramunha Yurayanhanydja ŋe! . . . ŋarra nhanŋu ḏukṯuk.” 7 Ga yuwalkthi ŋayi Yurayanydja roŋiyina liliyi Daypitpa bunana, ga ŋayinydja Daypitthunydja dhä‐wirrka'yurruna ŋanya bitjarra, “Wanhana be marinydja? Nhäŋga yolŋunydja walala ŋunha be ŋamakurru'mirriŋga?” bitjarra. Ga ŋayinydja waŋana ŋunhiyinydja Yurayanydja, ḻakaraŋala bitjarra, “Ŋe, manymakmirri ŋunhanydja bukmakka, yurru wirrki walala yukurra ŋunha bunharamirrinydja.” 8 Ga Daypittja waŋana Yurayawala bitjarra, “Gatjuy ŋäthili nhe bala marrtjiya wäŋalili, dhäykawa nhokalaŋuwa buniya, ga ŋunhala ŋäthili ganydjarr nhiniya galkunmiya, yurruna nhe boŋguŋu balayinydja roŋiyi marililinydja.”

9 Yurru ŋayi Yurayanydja yaka warray marrtjina nhanukiyingalanydja wäŋalili; ŋayinydja nhinana marrtjina ŋurikala warray giŋgalaŋuwala warray djämamirriwala walalaŋgala. 10 Ga ŋayi Daypitthunydja ŋäkulana ŋunhi Yuraya yaka marrtjina bala wäŋalili nhanukiyingala, bala ŋayi dhä‐wirrka'yurruna ŋanya bitjarra, “Baman' warray nhe ŋuli dhuwala marililinydja marrtjinya. Nhäku warray nhe yaka marrtjinya yawungu miyalkkala nhokiyingalanydja?”

11 Ga Yurayayunydja buku‐ruŋiyinmaraŋala nhanŋu Daypitku bitjarra, “Bukmak ŋunha ḏarramuwurru wiripu‐guḻkuny'tja nhina yukurra ŋunhaŋga yana bäyma ŋorra marrtji ŋuli warraŋulkurru, ŋulwitjŋura yana; yakaŋga yana walala roŋi'‐ruŋiyirri miyalkkalanydja ŋuli walalaŋgala wäŋalilinydja. Nhäkuna ŋarrapinydja yurru be marrtji bala wäŋalili, ga ḻuka yurru ŋatha ḻatju' ga gapu, ga ŋorra ŋarra yurru miyalkkala? . . . ŋunhi walalanydja yukurra yana galŋa‐yätjthirri muka. Yakana ŋarranydja yurru bitjandhi.”

12 Ga ŋayi Daypittja waŋana, “Manymak. Dhiyalana bäymana ŋiniya bay', waŋgany biyapul munha, ga yurruna nhe boŋguŋu marrtji balayi marililinydja.” 13 Ga ŋuriŋinydja munhayu Daypitthu garr'yurruna bala Yurayanha ŋathawuna ḻukanharawu, bala yana ŋayi wekaŋalana ŋanya dhaŋaŋnha dhika ŋänitjiny'tja, ḻukanana ŋayi yukurrana‐a‐a yana liŋgu‐u‐u ga muḻkurr ŋayi leŋu. Ga ŋunhala yana bäyma ŋayinydja Yurayanydja mukthurruna ŋorrana, yaka yana ŋayi marrtjina bala nhanukiyingala bala'lili ŋorranharawu.

14 Bala yana ŋayi Daypitthu dhäruknha wukirri Djawapkuna, ga djuy'yurrunanydja ŋayi nhanukalana goŋlili wekaŋala Yurayawalana ŋunhi djorrany'tja dhärukmirrinydja. 15 Ga bitjan ŋayi yukurra ŋunhi dhäruktja waŋa gam'. “Nherrala dhuwalanhanydja gay' ḏarramunha Yurayanhanydja gumurrlili ŋunha wal'ŋu yana. Ŋunhi yurru ŋutuny'tja mari wirrkinydja yukurra yurru bunharamirri, ga nhumanydja yurru gonha'yunna yana ŋanya ŋunhimalana; gonha' ŋayi yurru burakirrinydja ŋayipina gänana.”

16 Ga Djawapthu mel‐ḻaw'maraŋala ŋunhiyi djorra', bala ŋayi djuy'yurruna ŋanya Yurayanhanydja ŋunhimalana ŋunhi wanhami walala yukurrana bunharamina wäŋalili yindililina, bala'‐guḻku'mirrililina. 17 Walala ŋunhi miriŋunydja walala dhawaṯthurruna marrtjina bitjarranydja, bala wirrkina yana bunharaminanydja marrtjina, ŋutu'na marinydja. Ga guḻku'na dhika miṯtji miriŋu Daypitkunydja burakina rakunygu, ga ŋayi Yurayanydja burakinayi ŋunhilina, liŋguna dhawar'yurruna.

18-19 Bala Djawapthunydja djuy'yurruna dhäwu'mirrinha Daypitkuna, ga dhäruk‐wekaŋalanydja ŋayi bitjarra gam'. “Ḻakaraŋa nhanŋu yulŋunydja dhiyakuy mariwuynydja. 20-21 Ga ŋuli ŋayi yurru ŋoynydja‐dharra, maḏakarritjthirrinydja bitjan yurru, ‘Nhäku warray walala marrtjina galkililinydja wal'ŋu ŋunhi bala'‐guḻku'mirrililinydja?’, bitjandja ŋayi yurru waŋa, bala nhenydja yurru ḻakaraŋana yana nhanbala, ‘Ŋunhiyinydjayi ḏarramu, ŋunhi ya' Yurayanydja liŋguna burakinana; liŋguna rakunynha ŋayi ŋunha’, biyakana ŋi ḻakaraŋanydja.”

22 Bala yana yuwalkthi ŋunhi dhäwu'mirrinydja yolŋu waṉḏinana‐a‐a, ga bunana ŋunhala Daypitpa, ga ḻakaraŋalana nhanbala yukurrana Daypitpana bitjarrana, 23-24 “Ŋunha marinydja ŋutu'na dhikana, ḏälnha yukurrana marrtjina, ga guḻku'na nhuŋunydja miriŋu burakina raku'‐rakunydhina, ga Yurayanydja burakinayi ŋunha rakunyguna.”

25 Ga ŋayi Daypittja buku‐ruŋiyinmaraŋala bitjarra, “Gatjuy, marrtjiya ga ḻakaraŋa Djawapku biyaka, ‘Bäyyi ŋunhi, liŋgu guḻkuŋ'ka marrtji dhuwala yolŋu'‐yulŋunydja murrmurryun mariŋuranydja bunharaminyarayu. Biyapul marrtjiya, nyäṉ'thurra ŋunhiyi liŋgu wäŋa bala'‐guḻku'mirri, ga mulkiyana walalanha.’ ” Ga bitjarra ŋayi Daypit waŋananydja.

26 Yo, ŋunhiyi miyalktja Batjipanydja wirrkina dhika galŋa‐yätjthina warwumirriyinana, ŋunhi ŋayi ŋäkulanydja bäpurruny'tja dhuway'mirriŋunha rakunydhinyara, ga ŋäthinanydja ŋayi dhika wirrkina nhanŋu. 27 Ga dhäŋuru ŋuliŋurunydja ŋayi Daypitthunydja ŋanya garr'yurruna nhanukiyingalana wäŋalili, ga nhanŋuna ŋayi miyalktja, ga yothuny'tja nhanukuŋu dhawal‐wuyaŋina ḏarramu. Yurru Garraynydja yaka galŋa‐ŋamathina Daypitku, ŋurikalayi ŋunhi ŋayi nhaltjarra djäma yätj.