1 Ŋayi [a]Djalamandja ŋunhi buku‐miyalknha ḏarramu; ŋayi yukurrana dhäykawurrunhanydja märraŋala guḻku'nhana dhika dhäykawurrunha, yurru mulku'‐mulkurunha, wiripunha ga wiripunha bäpurru'nha. 2-3 Garrayyunydja liŋgu ḻakaraŋala ŋäthili ŋunhi [b]Yitjuralpuyŋunhanydja, nhanŋuwaynydja wal'ŋu yolŋu'‐yulŋunha waŋana yaka'yurruna, walala yurru yaka märrama ŋunhi wiripunha bäpurru'nha miyalknha walalanha, liŋgu walala ŋunhi wiripunydja bäpurru' malanha yukurranha ŋuli buku‐ŋal'yuna wiripuŋuwuna waŋarrwu walalaŋgu. Yurru Djalamandja yakana mäkiri'‐witjurruna Garraynha dhäruk, ga malthurruna nhanŋuwaynydja dhärukku, bala yana ŋayi märraŋalana yukurrana guḻku'nhana, dhikana ŋunhiyi miyalknha walalanha. 4 Ga ŋuriŋi dhäykawurruyunydja ŋanya bilmaraŋalana; ŋayi yukurranha ŋuli buku‐ŋal'yunanydja ŋurikina waŋarrwu mulku'‐mulkuruwuna, yakana ŋayi yuwalkkuŋala yukurrana malthurruna ŋurikinydja Garraywu Godku ŋunhi nhanŋu bäpa'mirriŋu yukurrana buku‐ŋal'yurruna [c]Daypit. 5-8 Ŋayinydja yana ŋuli yukurranha buku‐ŋal'yuna ŋurikina wiripu‐guḻku'wuna waŋarrwu walalaŋgu, ga dhuḻ'yurruna ŋayi marrtjina wäŋa malanha buku‐ŋal'yunarawu ŋuriki yätjmirriwuna waŋarrwu walalaŋgu, märr yurru nhanbala mulku'‐mulkuru miyalk walala ŋunhi buku‐ŋal'yun ŋunhiliyi walalaŋgalayŋuwu ŋuriki mulku'‐mulkuruwu waŋarrwu walalaŋgu barrkuwuywu, ŋunhi walala gäŋala lili.

9-10 Yo, buku‐märrma'mirri Garraynydja maḻŋ'maranhamina milkunhamina Djalamangalanydja ŋäthilinydja, ŋayi ḻakaraŋala waŋana ŋanya yaka'yurruna bitjarra, “Yaka yana nhe yurru buku‐ŋal'yurra wiripuŋuwu mulkuruwu waŋarrwu walalaŋgu,” bitjarra. Bala yana Garraynydja ŋaramurryinana nhanŋu Djalamangu, liŋgu ŋayinydja Djalamandhunydja yakana märraŋala ŋanya ŋunhi dhäruk ga malthurruna nhanŋu dhärukku, yana ŋayi mäkiri'‐yarryurrunana bala gonha'yurrunana, ŋapana‐wekanharamina Garraywunydja. 11 Bala Garray waŋanana nhanŋu Djalamangu bitjarrana, “Ŋarranydja yurru gombumana nhuna, ŋunhi ŋarra nhuna dhawu'‐nherrara ŋäthili, yakana nhe yurru biyapulnydja ŋurruŋuyirri dhiyaku bukmakku Yitjuralpuyŋuwu, liŋgu nhenydja marrtjina dhä‐märr‐yuḻkthina warray, bakmaraŋala warray warrpam'thurruna dhawu'‐nherraṉaranydja ŋunhi, yakana nhe malthurruna ŋarrakuwaynydja wal'ŋu. 12 Ŋarra yurru yakana djaw'‐djawyundja walalanha dhuwala ŋunhi nhenydja yana walŋaŋga, liŋgu wirrki ŋarra yukurrana märr‐ŋamathina nhokalaŋuwu bäpa‐ŋaliwu Daypitkunydja. Ga ŋunhi yurru nhuŋu gäthu'mirriŋuna ŋurruŋuyirri, bala ŋarranydja yurru djaw'‐djawyunna nhanukala goŋŋurunydja, ga wekama yurru walalanha wiripuŋuwalana goŋlili. 13 Yurru ŋayipiwaynydja ḏälkuma yukurra yurru waŋganynhana yana miṯtjinha bäpurru'nha, liŋgu wirrkina ŋarra yukurra märryu‐ḏapmarama ŋarrakuway djämamirrinha Daypitnhanydja. Ga dhuwalanydja gay' wäŋa [d]Djurutjalambuynydja dhärra yukurra yurru nhanukalayŋuwuna yana Daypitkalaŋuwuna miṯtjiwu, liŋgu dhuwalanydja wäŋa ŋaraka Djurutjalambuynydja ŋarrakuway dhulŋuŋu yana.”