1 Yo marrkapmirri walala, ŋunhi yurru ŋula yolŋu waŋanydja ḻakaranhamirri bitjandja, “Ŋarrakalaŋukurrunydja ŋayi ŋuli Godkunydja Birrimbirr waŋa yukurra,” bitjan, ŋäthilinydja nhe yurru gatjarr'yun ŋanya ŋunhiyi birrimbirrnha, yurruna nhe yurru märr-yuwalkthirrinydja; maḻŋ'maraŋa ŋanya ŋäthili wanhaka ŋunhiyi yuwalk wal'ŋu Godku Birrimbirr, mak bothinyaramirri birrimbirr ŋunhi. Gatjarr'yurra ŋanya ŋäthilinydja, liŋgu guḻku'yu yolŋuyu walalay ŋuli ḻakarama bothinyaramirriyunydja dhärukthu birrka'mirriŋura wäŋaŋura. 2 Yurru nhumanydja dharaŋanna yurru ŋunhi Godkunydja Birrimbirrnha, liŋgu ŋunhi ŋayi ŋuli yolŋuyu waŋa Djesunha yukurra bitjan, “Djesunydja ŋunha Christ, yurru maḻŋ'thurrunanydja ŋayi yolŋuna rumbalnydja dhiyala munatha'ŋuranydja,” ŋunhi ŋayi yurru yolŋu bitjandhiyinydja waŋa, ŋunhiyinydjayi ḻakarama ŋayi yukurra Godkalana Birrimbirryu Garrkuḻukthuna. 3 Ga ŋunhi ŋayi yurru yolŋuyu waŋa wiripukumanydja Djesunha, ŋunhiyinydjayi yolŋu yukurra waŋa birrimbirryu ŋula yolkalana wiripuŋuwalana, ŋurikalana ŋunhi ŋayi yukurra nyinyaŋdhun Garraywu Christku. Nhuma ŋäkula muka ŋäthilinydja ŋanya marrtjinyarana lili, ŋunhinhanydja ŋunhi ŋayi miriŋu nhanŋu Djesu-Christku, ga liŋguna ŋayi dhika djämanydja yukurra dhiyalaŋumina munatha'ŋurana wäŋaŋura guḻku'walana yolŋu'-yulŋuwalanydja.

4 Nhuma yumurrku' ŋarraku, nhumanydja dhuwala nhanŋuway yana Godku walala, ga nhumana djuḻkmaraŋalanydja ŋunhinhanydja walalanha bothinyaramirrinhanydja yolŋu'-yulŋunha. Liŋgu nhanŋuwaynydja Godkunydja Garrkuḻuktja Birrimbirr dhuwalina ŋayi nhina yukurra nhokalana ŋayaŋuŋura, ga ŋayinydja ŋunhi biyapul warray wal'ŋu garrwar warray-wala ŋurikalanydja yätjkalanydja birrimbirrwala, ŋunhi ŋayi yukurra nhina ŋurikala munatha'wuywala yolŋu'-yulŋuwala. 5 Yo, ŋunhiyinydjayi walala bothinyaramirrinydja ḻakaranhamirri dhiyakuy warray munatha'wuy warray, yana walala ŋuli waŋa munatha'wuyyu dhäwu'yu, bala ŋuli ŋunhi munatha'wuynydja yolŋu walala mäkiri'-witjunna yana ŋurikiyi, bala märr-yuwalkthirrina walalaŋgalaŋuwu dhärukkunydja. 6 Yurru ŋilimurrunydja dhuwala nhanŋuway yana Godku warray yolŋu walala, ga ŋunhi ŋayi ŋula yol marŋginydja Godku, ŋayinydja yurru ŋunhiyinydja yolŋu mäkiri'-witjun ŋilimurruŋguna yana. Ga ŋunhi ŋayi yakanydja Godku yolŋu, ŋayinydja yurru ŋunhiyinydjayi yakana mäkiri'-witjun ŋilimurruŋgunydja. Ga bitjandhina nhuma yurru dharaŋandja ŋunhinha yolŋunha ŋunhi ŋanya yukurra gäma ŋuriŋiyi yuwalkŋuyu birrimbirryu wal'ŋu. Liŋgu ŋunhinydja yolŋu ŋunhi ŋayi gänhara ŋurikiŋi bothinyaramirriwuŋu birrimbirrwuŋu, yakana ŋayi yurru ŋunhiyinydjayi mäkiri'-witjun ŋäma nhokuŋunydja dhäwu'.

7 Yo marrkapmirri walala, ŋilimurru märr-ŋamathinyaramirrina gul' bala-lili'yunmirrina yana, liŋgu märr-ŋamathinyaranydja dhuwala Godkuŋuna wekanhara yanana nhanukuŋuwaynha, ga ŋunhi nhe ŋuli märr-ŋamathirri wiripuŋuwunydja yolŋuwu, ŋunhiyinydja nhe yuṯakunharana liŋguwuynha ŋurikiŋiyina Godkuŋuna nhanukuŋuwaynha walŋawuy, bala nhe marŋgina ŋunhi Godku nhanŋuwaynydja. 8 Ŋunhi nhe yakanydja yurru yukurra märr-ŋamathirri, nhenydja yakana marŋgi yana Godkunydja, liŋgu God dhuwala ŋayipi märr-ŋamathinyaranydja. 9 Ga ŋunhiyi märr-ŋamathinyaranydja warraŋulthinana maḻŋ'thurruna, rumbalnha ŋayi dhuwala nhinananydja yukurrana ŋilimurruŋgala, liŋgu Godthu djuy'yurruna nhanŋuwaynydja ŋunhiyi Gäthu'mirriŋunha dhipala munatha'lilina, märr yurru ŋilimurrunydja walŋathirriyi nhina ŋuliwitjan nhanukalana. 10 Yo, yolŋuwuŋunydja ŋunhinydja märr-ŋamathinyara yana ḏukṯuk warray, djäl warray, yurru Godkunydja märr-ŋamathinyara ganaŋ'thun yukurra, wekama warray marrtji ŋuli. Yaka ŋilimurru yana yuwalkkuŋala märr-ŋamathina Godku ŋäthilinydja wal'ŋu, liŋgu yuwalktja märr-ŋamathinyara balanyara gam': Godthunydja wekaŋala nhanŋuwaynydja ŋayi Gäthu'mirriŋunha, märr yurru ŋayi rakunydhirri ŋilimurruŋgalana dharapulŋura, märr yurru nhanukalanydja maŋgu'-waṉḏinyarayu ŋilimurruŋgunydja yätj malanha buwayakkumana warrpam'thunna. 11 Marrkapmirri walala, yuwalk yana ŋayi Godtja märr-ŋamathirri yukurra ŋilimurruŋgu wirrki wal'ŋu yana, bala ŋilimurrunydja yurru märr-ŋamathinyaramirrina bala-lili'yunmirri ŋuriŋi liŋgu yana ŋupanayŋuyu märr-ŋamathinyarayunydja waŋganydhu. 12 Yakana ŋula waŋganydhu yolŋuyu nhäŋalanydja Godnha nhanukalay ŋayi maŋutjiyu, yurru Godtja dhuwala warray ŋayipinydja nhinana yukurra ŋitjalaŋgalanydja ŋayaŋuŋura, ŋunhi ŋali yukurra märr-ŋamathinyaramirrinydja bala-lili'yunmirri. Yo, nhinanydja ŋayi ŋuli yukurra God dhuwala ŋayaŋuŋura ŋitjalaŋgala, bala ŋilimurrunydja yurru yukurra nhina ŋuriŋiyina liŋguna Godkalana yana märr-ŋamathinyarayu, ŋuriŋina ŋunhi ŋayi ḏarrtjalk wal'ŋu yana ŋayipi. 13 Ga ŋunhi ŋali yurru märr-ŋamathirri wiripuŋuwunydja yolŋuwu ŋuriŋi yuwalkŋuyunydja märr-ŋamathinyarayu Godkalanydja, balakurruyinydja ŋali yurru dharaŋanmirrina nhänharamirri, ŋunhi ŋali yukurra nhina yuwalk yana Godkala wal'ŋu, ga ŋayi nhina yukurra ŋitjalaŋgala. Liŋgu ŋunhiyinydjayi yuwalkŋunydja märr-ŋamathinyara dhawaṯthun ŋuli yukurra ŋuliŋuruna liŋguna Birrimbirrŋuru Godkalana nhanukalaynha, ŋunhi ŋayi ŋanya wekaŋalana liŋguna ŋitjalaŋgala ŋayaŋulilina.

14 Ga ŋanapurrunydja ŋuriŋinydja malthunaramirriyunydja walalay nhäŋala warray ŋanya ŋunhiyi Godkunydja Gäthu'mirriŋunha, ga yuwalk dhuwala ŋanapurru ḻakaramanydja nhumalaŋgu yukurra bitjandja gam': Godthu Gunhu'yu djuy'yurruna nhanŋuway ŋayi Gäthu'mirriŋunha walŋakunharawu dhiyaku wäŋawu, ŋayinydja ŋunhi Walŋakunharamirrina wal'ŋu Godkuŋu yana djuy'yunara. 15 Ga ŋunhi ŋayi yurru yol waŋa ḻakarama ŋanya Djesunha bitjandja, “Ŋayinydja ŋunha Gäthu'mirriŋu Godku,” bitjandhiyinydja yurru, ŋurikalayinydja yolŋuwala yukurra yuwalknha God nhina, ga ŋayi ŋunhiyi yolŋu nhina yukurra nhanukala Godkala.

16 Yo, marŋgina ŋalinydja ŋunhi ŋayi yukurra God märr-ŋamathirri ŋitjalaŋgunydja, bala ŋali yukurra ŋayaŋu-nherraṉmirrina nhanukala märr-ŋamathinyaralilinydja ŋunhiwalayi. Liŋgu Godtja ŋunhi ŋayipinydja märr-ŋamathinyara, ga ŋunhi yurru ŋali nhina yukurra märr-ŋamathinyaŋuranydja, ŋali yukurra ŋunhi nhinanydja nhanukalaynha Godkalana yana, ga God ŋayipi nhina yukurra ŋitjalaŋgala. 17 Bala ŋalinydja yurru dhärra yukurra rum'rumdhunamiriwnha ga barrarimiriwnha gumurrŋurana nhanukala Godkala, liŋgu ŋali märr-ŋamathirri ŋuli yukurra wiripuŋuwuna ŋuruku yolŋuwu yuwalkkumana wal'ŋu ŋuriŋi Godkala märr-ŋamathinyarayunydja. Yakana ŋali yurru goranydja beyaṉiyirri ŋulinyaramirriyu mala-yarr'yunaramirriyunydja waluyu, liŋgu dhiyalaŋuminydja wäŋaŋura munatha'ŋuranydja ŋali yukurra nhina waŋganyŋurana, rrambaŋina yana ŋurikala wiripu-guḻku'wala Godkalaŋumirriwalanydja yolŋu'-yulŋuwala, bitjan yana liŋgu bitjan ŋayi Christ yukurra nhina waŋganyŋura yana nhanukalaŋuwala Bäpa'mirriŋuwala, märr-ŋamathinyaraŋura yana.

18 Ga ŋunhi nhe nhina ŋuli yukurra märr-ŋamathinyaraŋura, yakanydja nhe yurru barrarirri ŋula nhäkunydja, liŋgu ŋuriŋi märr-ŋamathinyarayunydja yurru winya'yunmaramana yana ŋunhi barrarinhanydja. Yo, ŋunhi ŋali yukurra guyaŋirri ŋula yolnha ŋunhi ŋayi ŋitjalanha yurru buma dhä-ḏir'yun, ŋali yurru ŋurikiyi yolŋuwu beyaṉiyirrina, ga ŋunhi ŋali yurru beyaṉiyirri Godkunydja yukurra, ŋuriŋiyi ḻakarama yukurra ŋitjalanhanydja ŋunhi ŋali yukurra yakana nhina ŋunhili Godkalanydja märr-ŋamathinyaraŋura. Liŋgu Godthunydja yurru yakana ŋitjalanha dhä-ḏir'yun, ŋunhi ŋali yukurra märr-ŋamathirri wiripuŋuwunydja yolŋuwu yuwalkkuma dhika wal'ŋu. 19 Yo, ŋalinydja Garraywalaŋumirrinydja yolŋu walala märr-ŋamathirri ŋuli yukurra wiripu-guḻku'wunydja yolŋu'-yulŋuwu, liŋgu ŋayi ŋäthilinydja God märr-ŋamathina ŋitjalaŋgu.

20 Yo, ŋuli nhe yurru waŋa bitjan gam', “Ŋarranydja märr-ŋamathirri yukurra Godkunydja,” bitjan, yurru ŋuyulkthirri warray nhe yukurra ŋuruku wiripuŋuwunydja yolŋuwu Garraywalaŋumirriwu, ŋunhiyinydjayi nhe bothinyaramirrina yolŋu, yakana nhe yukurra yuwalk ḻakaranhamirri nhunapinyay nhe. Liŋgu ŋayipinydja Godtja nhinana yukurra ŋurikalayinydjayi yolŋuwala, ŋunhi nhe ŋuli gumurr-nherraṉ ŋuyulkthirri nhanŋu. Ga ŋunhi nhe ŋuli yakanydja märr-ŋamathirri yolŋuwu ŋurikiyi, ŋunhi nhe yukurra nhämanydja ŋanya dhiyaŋu maŋutjiyu, yakana nhe yurru yuwalktja märr-ŋamathirri Godkunydja, ŋurikinydja ŋunhi nhe yukurra yaka ŋanya nhäma.

21 Yo, Christthu ŋayipi yana nherrara romdja dhuwala ŋilimurruŋgu gam': Ŋunhi nhe märr-ŋamathirri yukurra Godku nhanŋuway, nhenydja yurru bitjandhi liŋgu märr-ŋamathirriyi Godkalaŋuwu wiripu-guḻku'wunydja yolŋu'-yulŋuwu.

<- 1 Djon 31 Djon 5 ->