Mikpiirm 18

Babilonn ya berm

1 Ni ya puoli bó nɛ n tí laa' tidɛknt yaam Uwien ya tond uba ñɛn' paaki bó ki jiinh ní, ki ŋmɔbe mituɔm ki gbien', nɛ uʼwenwenku wende' utingbɛn kɛ bo,

2 nɛ u lienh ufaa bo ki teh:

«U lu' ŋɔ, u lu' ŋɔ, uduciɛn Babilonn lu' ŋɔ.

U ji kpɛnde' isɛnpol kɛ ya bol ya kɔnkuɔn nɛ.

Inuɔn nin tiwɛnt tà yé tijɔnkt ya bont ki ŋmɔbe isensen kɛ ji kɔ wun ni nɛ.

3 Kimɛ udu nnɔ nɛ taa' uʼsɔnsɔndl ki puon' inibol kɛ, ki cère' ì kɔn' Uwien ya tudɛre ni.

Utingbɛn bo ya bɛrb tien' lisɔnsɔndl nin wù,

nɛ ikpenkpend laa' lifaal li yɛbe uʼwiel bo.»

4 Nɛ n tí cii' uniɛke uba bó paaki bó u lienh ki teh:

«Nʼnibɛ, ñɛ mɛn Babilonn ni,

ki la li te uʼnib ya tùonbiɛrɛ ya gbɛr ni,

ŋɔ ki la ji ijɛnd yà bi li ji yɛ̀ nnɔ,

5 kimɛ udu nnɔ ya nib sɔn' itùonbiɛrɛ yà nnɔ yɛbre' ki gbien' ki tì kpiɛ kutaaku

nɛ, Uwien ŋa sunde' biʼtùonbiɛrɛ nnɔ bó,

6 Tien bɛ mɛn bi tien' nɛ ma bo nnɔ,

bi tien' nɛ ibiɛre yà nnɔ, jiin bɛ mɛn nnɔ bolm mile bo,

bi là cère' ni jin' ijɛnd ma bo nnɔ,

jiin bɛ mɛn nnɔ bolm mile bo.

7 Bɛn bà là yíe tigbengt, ki yíe bɛ ń li te liwiel ni, nì tì kɛnde' nnɔ,

cère mɛn bɛ ń ji ijɛnd mɔ kí li kaa mikuum kí tì baa nnɔ,

kimɛ udu nnɔ ya nib maaleh biʼfɛ̀l ni,

ki teh biʼdu gbɛre' nɛ, ka te tɛn kpopii,

ka lì li kɛ̀le kuum mɔ fiebu.

8 Nɛn bo, ijɛnd li taan kí lu udu nnɔ ya nib bo uwien uba nɛ. Yɛn si:

mikuum nin ikumuɔ nin mikònm.

Umu li wi udu nnɔ,

kimɛ Yonbdaan Uwien wà bun' tibuur nnɔ ŋmɔbe mituɔm ki gbien'.»

9 Utingbɛn bo ya bɛrb bà kɛ tien' lisɔnsɔndl nin udu nnɔ, bɛn nin wun jin' liwiel nnɔ, li muɔ kí kpiɛnde uʼbo, kimɛ u teknh umu, imuñii dukeh. 10 Bi li juore kí li se fɔnfɔkm nɛ, kimɛ bi fɛnge bi la tì jɛ̀nde udu nnɔ ni nɛ. Bi li lienh ki teh:

«Nì brike' aʼbo ŋɔ, nì brike' aʼbo ŋɔ

uduciɛn Babilonn, sin wà là ŋmɔbe ufaa nnɔ, nì brike' aʼbo ŋɔ,

Uwien pɔk ki bun' aʼbuur ki gben' na taande'.»

11 Utingbɛn bo ya kpenkpend mɔ li muɔh ki kpìɛndeh udu nnɔ bo, kimɛ uba ŋa ji daanh biʼwɛnt. 12 Tun si: miñɔ̀km nin ilike ya kur nin itɛn yà ŋmɔbe kudaaku nin ilaan nin tikpɛlcɛpenpient nin ikpɛlmɔ́nmɔ́n nin tikpɛlcɛr tà dinge suɔɔ ki windeh nin ikpɛlde kɛ ya bol yà ya daaku faa nin isiin yà ya dɔ ya daaku faa nin bi taah iluobñin ki teh tibont tà nin bi kpeh tibont tà kɛ ya bol nin kukurku kùa bi yih kù blɔnsi nin tikutɔr nin itɛn yà ya daaku faa bi yih yɛ̀ maarb 13 nin lɛfina kɛ ya bol nin tisir tà nu ki ŋmɛ kɛ ya bol nin midaam kɛ nin mikpɔm nin miyom nin iji nin inɛ nin ipe nin itaan nin titɛnlolt nin iyonbe nin binib bà bi coh bɛ butɔbu ni. 14 Bi li len ki ye:

«Sin Babilonn, a là fɛ tibont tà nnɔ gben' ŋɔ.

Aʼnacenkpebont tà mɔn ki ŋmɔbe kuñuɔrku nnɔ gben' ŋɔ,

nil ŋa ji li lɛ tù fiebu.»

15 Binib bà tien' ukpenkpende udu nnɔ ni, ki laa' lifaal nnɔ,

li juore kí li se fɔnfɔkm nɛ ki muɔh ki kpìɛndeh,

kimɛ bi fɛnge bi la tì jɛ̀nde niʼbó nɛ. 16 Bi li lienh ki teh:

«Nì brike' aʼbo ŋɔ, nì brike' aʼbo ŋɔ uduciɛn Babilonn, nì brike' aʼbo ŋɔ,

sin wà là te tɛn upii wà guo tikpɛlcɛpenpient

nin ikpɛlmɔ́nmɔ́n nin yà kɛ ya bol ya daaku faa

ki fɛ̀nde' aʼba nin bi taah miñɔ̀km nin itɛn yà ya daaku faa

ki teh tijɛfɛ̀nbont tà nnɔ nin ilaan nnɔ.

17 Li ya faal kɛ nɛ pɔk ki gben' na taande' nɔ-ɔɔ?»

Biñɛrkurb nin biʼciɛnb nin bikpentuɔnb nin bà kɛ sɔnh miñunciɛnm bo ki jinh se fɔnfɔkm nɛ, 18 ki likeh udu wà teknh nnɔ ya muñii, ki wuureh ki teh: «U lɛ udu ba te ki baa' uduciɛn wuu nɔ?» 19 Nɛ ki yiih titɛnt ki pukeh biʼyul bo, ki muɔh ki kpìɛndeh ki wuureh ki teh:

«Nì brike' aʼbo ŋɔ, nì brike' aʼbo ŋɔ,

uduciɛn Babilonn nì brike' aʼbo ŋɔ,

biñɛrdɛnb kɛ ñi' a ya faal bo nɛ ki faake'.

Nɛn kɛ nɛ pɔk ki lá gben' na taande' nɔ-ɔɔ?»

20 Tibont tà kɛ te kutaaku bo ń li poknh,

Uwien ya nib nin *Yesu ya tondb nin

*Uwien ya ñɔbonsɔknbɛ niʼmɔ ń li poknh,

uduciɛn nnɔ ya berm bo,

kimɛ Uwien bun' udu nnɔ ya nib tibuur

bi tien' nɛ mibiɛrm mà nnɔ bo ki kun' nɛ imɔ̀n.

21 Nɛ Uwien ya tondtɔdaan uba yuure' litɛnl liba li yɛbe tɛn linɛ̀ciɛnl ki wiɛ' miñunciɛnm ni, nɛ ki ye:

«Bi li bere uduciɛn Babilonn ufaa bó ma sɔ.

Nil ŋa ji li lɛ wù fiebu.

22 Ba ji li cii biɛñib nin yonyuonb

nin wopieb nin natunpieb bó udu nnɔ ni.

Utonsɔnl uba mɔnɔn nin utɔ ŋa ji li te uʼni.

Ba ji li cii naal bó uʼni.

23 Frl ŋa ji li wende uʼni,

ba ji li cii ujɛ nin upii bà kuɔn' tɔb,

na laan wuɔke' ya yuon bó uʼni,

udu nnɔ ya kpenkpend nɛ là cɛn' binib kɛ utingbɛn bo.

Uʼnib là taa' iñɔke nɛ ki lɛre' inibol kɛ.»

24 Liɛbe' ki ní, *Uwien ya ñɔbonsɔknb nin uʼnib bà kɛ bi ku' bɛ utingbɛn bo nnɔ u ya du nɛ si biʼkuum.

<- Mikpiirm 17 Mikpiirm 19 ->