1 Hessa gishshas ta ishatoo! Intte asateththaa geeshshinne Xoos ufayssiza de7o yarsho ooththidi intte shiishshana mala ta inttena Xoossa qadhetan woossays; hessika wozinama asa mala intte Xoossas ooththiza ooso. 2 Lo7o, ufayssizaazinne kumeth gidida Xoossa sheney aazakko intte paacci erana mala intte qofan ooraxidi laamettite attiin hayssa alame asaa misatopite.

3 Inttes Xoossi immida ammano mala intterkka inttena paacci xeellite attiin ha7i dizayssafe bollara inttena dhoqqisi xeellontta mala tani taas imettida Xoossa kiyateththan inttena issaa issaa zorays. 4 Nuuppe issi issi asas issi asateththa bolla daro billiteti diza mala heytikka he billiteti issi mala ooso ooththonttayssaththo, 5 hessaththoka nuni darota gidi uttidi Kirstoosan issi asho; nuni issoy issaas asho. 6 Nuus imettida imota mala dumma dumma imotay dees; issaades buroppe hananaaz yooto gidikko izaades imettida ammano mala yooto. 7 Ooththi maaddizaadey ooththi maaddo; tamaarsizaadeyka tamaarso. 8 Zorizaadey gidikko zoro; bayndaytas immizaadey gujji immo; ayssizaadey minni aysso; maarizaadeyka ufayssan maaro.

9 Intte siiqoteththi qoodheppe qommon gidoppo; iita gididayssa wursika ixxite. Lo7o gididayssara issife oykettite. 10 Intte intte garsan issoy issaara ishata mala lo7eththi siiqettite; issoy issaa baappe aaththi bonchchizayta gidite. 11 Godaas ooththana Ayanan xuugettizayta gidite attiin hessa he minoteththaafe guye goopite. 12 Hidotan ufayettizayta gidite; meto dandayte; woosan minnite. 13 Ammanishe waayettizaytas inttes dizayssafe shaakki immite; imath mokkite.

14 Inttena qanggizayta anjjite attiin qanggofte.[a] 15 Ufayettizaytara ufayettite; muuzottizaytara muuzottite. 16 Intte intte garsan doseteththan diite; manqotara issifeteththan daanaas koyite attiin otorettoftenne ceeqettofte.[b]

17 Oonaska iita gishshas iita zaaropite; as ubbaa achchan lo7o miish ooththanaas minnite. 18 Inttes dandayettiko intte intte baggara as ubbaara saron diite. 19 Ta siiqotoo! Intte halo Xoossi kesso attiin intterkka halo kessofte. «Halo kessanay tana gees Goday» geetetti Geeshsha Maxaafan xaafettides.[c]

20 Halo kessanaappe, «Neni ne morkkey gafikko miza; izi saamettiko ushsha; ne hessaththo ooththiko tama bonqo iza bolla koraasa» geetettidi Geeshsha Maxaafan xaafettides.[d] 21 Iita lo7o ooson xoona attiin iitan xoonettofa.

<- Oroome Asaas 11Oroome Asaas 13 ->