1 He boshazi aggidaappe guye Xoossi Musessinne qeese Aaroone naa El7ezeeres, 2 «Kumeththa Isra7eele maabaran issaade keeththan keeththan isttas layththi 20 kumidaytanne hessafekka bollara gididi wottadareteththan ooththanaas dandayza attuma nayta ubbaa qoodite» gides. 3 Museynne qeese El7ezeerey Yordaanoose shaafa matan Iyarkko ginara diza Mo7aabe dembaan dereza shiishshidi, 4 «GODAY Muses azazida mala nam7u tammu layththinne hessafekka bollara diza asaa ubbaa qoodite» gida.

Gibxe dereppe kezida Isra7eele asay hayssafe kaallizayta; 5 Yaaqoobes bayra naaza Oroobeele zarkkefe yelettidayti Heenookenne iza zereththata, Paalunne iza zereththata,[a] 6 Hexiroomenne iza zereththata, Karmenne iza zereththata. 7 Oroobeele zarkkefe qoodettidayti 43,730. 8 Paalu nay Elyaabe; 9 Elyaabe nayti Namu7eele, Daataanenne Abraame; Daataaneynne Abraamey derezan doorettidayta gidi uttidi Qooreranne iza kaallizaytara zuppetidi GODAA bolla makkallidi Musenne Aaroone paaccida. 10 Isttaka biittaya doyettada Qoorera issi bolla gaththa mittadus; isttika hayqqiin saloppe wodhdhida tamay 250 asaa xuuggides; histtiin istta qaxxayeteththi hara asaas malata gidides. 11 Qoore zereththati gidikko hayqqibeettenna.

12 Simoona zarkkefe yelettidayti Namu7eelenne iza zereththata, Yaaminenne iza zereththata, Yaakinenne iza zereththata, 13 Zaraahenne iza zereththata, Sa7oolenne iza zereththata, 14 Simoona zarkketappe qoodettidayti 22,200 addeta.

15 Gaade zarkkefe yelettidayti Xifoonenne iza zereththata, Haggenne iza zereththata, Shuunenne iza zereththata, 16 Osinanne iza zereththata, Eerenne iza zereththata, 17 Aroodenne iza zereththata, Ar7eelenne iza zereththata. 18 Gaade zarkketappe qoodettidayti 40,500 addeta.

19 Yuhuda zarkkefe yelettidayti, Eeranne Oonaane; istti Kanaane biittan hayqqida. 20 Hankko attida Yuhuda zarkkefe yelettidayti Seloomenne iza zereththata, Paareesenne iza zereththata, Zaraahenne iza zereththata. 21 Paareese zereththati Hexiroomenne iza baggata, Hamulenne iza zereththata. 22 Yuhuda zarkkefe qoodettidayti 76,500 addeta.

23 Yisakoore zarkkefe yelettidayti Tola iza zereththata, Puuwanne iza zereththata, 24 Yaashubenne iza zereththata, Shimiroonenne iza zereththata. 25 Yisakoore zarkketappe qoodettidayti 64,300 addeta.

26 Zaabiloone zarkkefe yelettidayti, Sereedenne iza zereththata, Eeloonenne iza zereththata, Yaahile7eelenne iza zereththata. 27 Zaabiloone zarkkefe qoodettidayti 60,500 addeta.

28 Yooseefe zarkkefe yelettidayti, Minaasenne iza zereththata, Efreemenne iza zereththata, 29 Minaase nayta zereth Maakirey Gala7aade yelides; 30 Gala7aade nayti Eezerenne iza zereththata, Heleeqenne iza zereththata, 31 Asira7eelenne iza zereththata, Seekeemenne iza zereththata, 32 Shamidanne iza zereththata, Hefeerenne iza zereth. 33 Hefeere naa Xilofaadey macca nayta xalla yelides; heytikka Mahilo, No7o, Hogilo, Milkkonne Tirxxo geetetteettes. 34 Minaase qommotappe qoodettidayti 52,700 addeta.

35 Efreeme zarkkefe yelettidayti, Shutulanne iza zereththata, Bekerenne iza zereththata, Tahaanenne iza zereththata, 36 Shutula naa Eraanenne iza zereththata. 37 Efreeme zarkketappe qoodettidayti 32,500 addeta; Yooseefe zarkkefe ba baggan baggan qoodettidayti haytantta.

38 Biniyaame zarkkefe yelettidayti, Beelanne iza zereththata, Ashibeelenne iza zereththata, Ahiraamenne iza zereththata, 39 Shafaamenne iza zereththata, Hufumenne iza zereththata, 40 Beela zarkkefe Araadenne iza zereththata; Na7imaanenne iza zereththata, 41 Biniyaame zarkkefe qoodettidayti 45,600 addeta.

42 Daane zarkketappe yelettidayti, Shuhaamenne iza zereththata, 43 Shuhaame zereththata qooday 64,400 addeta.

44 Aaseere zarkketappe yelettidayti Yiminenne iza zereththata, Yishiwenne iza zereththata, Barihenne iza zereththata, 45 Barihe naytappe Heeberenne iza zereththata, Malkki7eelenne iza zereththata, 46 Aaseeres Seraho geetettiza macca nay dawus. 47 Aaseere zarkketappe qoodettidayti 53,400 addeta.

48 Niftaaleme zarkkefe yelettidayti, Yahixelenne iza zereththata, Gunenne iza zereththata, 49 Yexirenne iza zereththata, Shelemenne iza zereththata, 50 Niftaaleme zarkketappe qoodettidayti, 45,400 addeta.

51 Kumeth qoodettida Isra7eele attumasay 601,730 gidides.

52 GODAY Muses hizgides, 53 «Biittayo istta sunththa sunththa qooda mala zarkketas xinxxo gidana mala shaakka shaakkada imma. 54 Qoodan dariza zarkketas aassa imma; qoodan guuxxizaytas xunththa imma; biitta gishoy asaa qooda corateththaa mala gido. 55 Gidikkoka gishozi saaman gido; saamazikka yegettanay izaade zarkken zarkkenna. 56 Saamazi yegettanay qoodan daro zereththata giddoninne qoodan guuththa zereththata giddon gido.»[b]

57 Lewe zarkkefe yelettidayti Gershoonenne iza zereththata, Qa7aatenne iza zereththata, Meraarenne iza zereththata, 58 Qasseka Libina zereththata, Kebroone zereththata, Mahile zereththata, Mushe zereththata, Qoore zereththata, Qa7aatey Amiraame ma7e. 59 Amiraamey Gibxen yelettida Lewe nayo Yokaabedo machcho ekkides; izakka Aaroonenne Muse geetettiza nam7u attuma naytanne Maaramo geetettiza issi macca naa yeladus. 60 Aaroones Nadaabe, Abihu, El7ezeerenne Itamaare geetettiza oyddu attuma nayti deettes.[c] 61 Nadaabeynne Abihuy Xoossa sinththan bessontta tama shiishshida gishshas boshan hayqqida.[d] 62 Isttas layththay issi aginanne izappe bollara gidida Lewe zarkkefe addeta qooday 23,000 gidides; heytikka hankko Isra7eele asaappe dumma mazgaban xaafetti uttida; gaasoykka isttas Isra7eele deren xinxxos gidiza aykko gadey imettonttayssasa.

63 Museynne El7ezeerey Iyarkko ginara Yordaanoose shaafaa matan diza Mo7aabe demban Isra7eele asaa qoodida wode istti xaafi oykkida Isra7eele asaa qooday hayssafe bollan dizayta. 64 Museynne Aarooney koyro Siina bazzon deraa qoodida wode qoodettida attumasaappe shemppora paxa attiday baawa. 65 Hessi hessaththo haniday GODAY kase isttas, «Istti wurikka bazzo biittan hayqqana!» gida gishshassa; gido attiin Yoofine naa Kaalebeynne Nawe naa Iyaasoy attaafe ubbayka hayqqida.[e]

<- Taybo 25Taybo 27 ->