10 Balaaqey hanqon ba kushe baqqidi Balaames, «Tani nena ta morkketa qangganaas xeygadis; gido attiin neni istta heedzdzuto anjjadasa. 11 Ha7i gidikko eeson gede neso ba! Ta nees daro miish immana ga qaala geladis; gido attiin ne he miishshaa demmontta mala Xoossi gordides» gides.
12 Balaamey Balaaqes zaaridi, «Neni taakko kiittida asatas, 13 ‹Balaaqey baas diza biranne worqqa ubbaa izi taas immizaakkoka tani ta shenen iita gidiin woykko lo7o ooththanaas GODAA qaalappe aadhdhanaas dandaykke; tani yootanay GODAY taas yootooro xalla› gaada kase ta isttas yootabeekkinaa?» gides.
Balaamey Yootida Oydanththo Tinbite
14 Wurseththan Balaamey Balaaqes, «Ha7i tani gede ta dere simma bays; gido attiin ta baanaappe kasetada Isra7eele asay ne dere asaa bolla gaththanayssa nees qonccisanaas koyays» gides. 15 Hessafe guye izas tinbite yooto doommidi,
«Iza ayfey doyettidaadey,
Bi7oore naa Balaamey
yootiza tinbite qaalay hayssa;
16 Xoossa qaala siyizaade,
izi kundi dishin
iza ayfeti doyettiin
Wolqqama Xoossafe
erateth demmidaade,
Ubbaa Dandayza Xoossaa ajjuuta
be7izaade kiitay hayssa.
17 Tani iza be7ays;
gido attiin ha7i gidenna;
ta iza xeellays;
gidikkoka ha7i matan gidenna;
Xoolinttey Yaaqoobeppe
beettana;
Kawoteththa guufey
Isra7eeleppe kezana;
Mo7aabe zereththaanne
Seete zereththata ubbaa
dippi histti dhayssana.
18 Eedoomey xoonettana;
iza morkke Seyreykka
izas haarettana;
Isra7eele derey
xoonoy xoonoshin daana.
19 Yaaqoobeppe dere ayssizaadey kezana;
izi katama giddon
attidayta pitti dhayssana» gides.
Wurseththan Balaamey Haasayda Haasaya
20 Hessafe guye Balaamey gede Amaaleeqe zaari xeellidi,
«Amaaleeqey ubbaafe aadhdhiza
wolqqama kawoteth;
gido attiin izi wurseththan
mernaas dhayana»
gi tinbite yootides.
21 Gede Qenaawe dere asaakko simmi xeellidi,
«Ne duussasoy
ammanettidaso misatikkoka,
Ne keeththay zaallafe woocetti
keexettidaa gidikkoka,
22 Intteno Qenaawe deretoo!
Asoorey inttena xoonidi
di7i efiza wode
intte wuri wurana» gi
tinbite yootides.
23 Wurseththan Balaamey,
«Xoossi hayssa ooththishin
oonee shemppora paxa daanay?
24 Olas worajjiza asay
markabera Qophirooseppe yaana;
isttika Asoorenne
Eboore dhayssana;
isttika ba hu7es mernaas dhayana» gi
tinbite yootides.
25 Hessafe guye Balaamey dendidi gede ba dere bides; Balaaqeyka baso simmides.
