Iyaaso Maxaafa 15

Gishon Yuhuda Qommota Gakkida Gade

1 Yuhuda qommotas istta zarkken zarkken saama yeggiin gakkida gadey biidi Eedoomera zawatidi, dugeha bagga gaxan diza Xiine geetettiza bazzo gakkees. 2 Dugeha baggara istta zaway Maxine abbaas dugeha bagga xeerappe doommees. 3 Akirabime purdera kanththidi, Xiine bazzora biidi Qaadeese Barine dugeha bagga gakkees. Qasse hessafe Hexiroomera kanththi pude Adaare gakkidi Qarqqaako simmees. 4 Aximoonera kanththi biidi haaththi baynda Gibxe shaafan gakkidi Mediteraane abban zawatees. Dugeha baggara diza Yuhuda zaway hayssa.

5 Arshey mokkizaso baggara diza zaway Maxine abba gidishin hessika Yordaanoose shaafay izan bi gelizaso gakkees.

Pudeha baggara diza zaway Yordaanoose shaafay Maxine abban gelizasoppe doommidi, 6 pude Beeti-Hoogile kezidi Yordaanoose shoobbafe ganna baggara kanththidi Oroobeele naa Bohaane shuchchaan zawatees. 7 Histtidi zawazi Akoore shoobbafe Dabire katama pude kezidi, shoobbafe duge baggara diza Adumime purdefe sinththara kanththidi pudeha bagga Gelgelakko simmees. Qasse En-Shemishe geetettiza pulttozara kanththi biidi pude En-Roogeele geetettizaso kezees. 8 Hessafe Henoome naa shoobbara kanththi biidi Yaabuseta katama Yerusalaamey dizaso dugeha baggara kanththidi Erafayme shoobbaas pudeha bagga xeerara kanththi biidi Henoome shoobbaas arshey wulliza baggara diza zumbulla xeera gakkees. 9 Heeppeka zumbullaa xeerappe doommidi Nefto pulttotara kanththidi Efroone deren diza katamatakko gakkees. Hessafe qasse duge Ba7aala woykko Qiriyaate-Yi7aarime geetettiza katamaakko wodhdhees; 10 Ba7aalappe arshey wulliza baggara diza Seyre zumaakko mirqqettidi Kisaloone geetetti xeygettiza Yi7aarime zumbullas pudeha baggara diza dugunththaara duge Beeti-Shemishe wodhdhidi Temina pinnees. 11 Qasse Aqaroones pudeha baggara diza dugunththaara kanththidi Shikaroonekko mirqqettidi Ba7aala zuma bollara aadhdhi biidi Yaabin7eele gakkees; hessafe guye zaway biidi abbaan eqqees.

12 Arshey wulliza baggara diza zaway Mediteraane abbaa gaxa gakkees. Yuhuda qommoti ba zarkken zarkken ekkida zawati haytantta.

Kaalebey Xooni Oykkida Kebroonenne Dabire Biitta

(Daanna 1:11-15)

13 GODAY iza azazida mala Iyaasoy Yuhuda gishaappe shaakkidi Kebroone geetettizaaro Qiriyaate-Arba7e Yoofine naa Kaalebes immides; Arba7ey Enaaqe Aawa. 14 Kaalebeykka Enaaqe zare heedzdzata, Shashaye, Ahimaanenne Talimaye Kebrooneppe kessi gooddides.[a] 15 Hessafe guye Dabire dere bolla olas dendides; Dabire katamay kase Qiriyaate-Sefere geetettawus. 16 Kaalebey, «Qiriyaate-Sefere olidi oykkizaades tani ta nayo Akisa immana» gides. 17 Hessa gishshas Kaalebe isha Qenaaze naa Otin7eeley he katamaa olidi oykkides; histtiin Kaalebey ba nayo izas machcho immides.

18 Akisay Otin7eele gelidaappe guye izi aaway izis gade immana mala ba aawaa woossana mala ba azinaas minththa yootadus; iza hareza bollafe wodhdhiin Kaalebey izo, «Ta nees ay ooththana mala koyay?» gi oychchides.

19 Izakka zaarada, «Taas lo7o ooththarkkii! Neni kase taas Negeben gade immidayssaththo ha7ikka pultto haaththara diza gade taas imma» gadus. Histtiin Kaalebey izis puderanne dugera diza pultto immides.

Yuhuda Qommotas Imettida Xinxxo

20 Yuhuda qommotas istta zarkken zarkken gishshas immida biittay hayssafe kaalli dizayssa. 21 Negebe heeran Eedoome zawa xeeran diza dugeha baggara diza Yuhuda qommota katamati Qabxi7eele, Edeere, Yaagure, 22 Qiina, Dimoona, Adaada, 23 Qaadeese, Haxoore, Yutinaane, 24 Ziife, Teleme, Ba7aaloote, 25 Haxoore-Hadaata, Hexiroome geetettiza Qiriyaate-Haxoore, 26 Amaame, Shema7e, Molaade, 27 Haxaare-Gaada, Heshmoone, Beeti-Phaleexe, 28 Haxaare-Shu7aale, Bersaabehe, Biziyootiya, 29 Ba7aala, Iyume, Exeeme, 30 Elttolaade, Kisile, Horma, 31 Xigilaage, Madimaana, Sanssaana, 32 Lebawoote, Shilihiime, Ayinenne Armoone. Katamatinne gutati issi bolla nam7u tammanne uddufuna.

33 Arshey wulliza baggara zumbullata tohosora dizayti Eshtta7oole, Xora7a, Ashina, 34 Zaanohe, En-Gaanime, Taaphphuhe, Enaame, 35 Yarmuute, Adulaame, Sooko, Azeeqe, 36 Shaa7irayme, Aditayme, Gadeerenne Gaderootayme. Katamatinne gutati issi bolla tammanne oydda.

37 Qasse Xinaane, Hadasha, Migidaala-Gaade, 38 Dil7aane, Mixiphpha, Yoqiti7eele, 39 Laakishe, Boxiqaate, Egiloone, 40 Kaboone, Lahimaase, Kitiliishe, 41 Gaderoote, Beeti-Daagone, Naa7imanne Maqeeda. Katamatinne gutati issi bolla tammanne usuppuna.

42 Qasse Libina, Eteere, Ashaane, 43 Yoftahe, Ashina, Nixibe, 44 Qi7ila, Akiziibenne Mareesha. Katamatinne gutati issi bolla uddufuna.

45 Aqarooney ba heeran diza gutatara, 46 hessaththoka Aqarooneppe arshey wulliza baggara diza Ashdoode gakkanaas, 47 qasse Ashdoodey ba heeran diza gutataranne Gaazappe biidi haaththi baynda Gibxe shaafa gakkanaassinne Mediteraane gaxappe haa simmiin diza katamatanne gutata.

48 Zumbullata bolla diza katamatikka Shamire, Yetire, Sooko, 49 Daanna, Qiriyaate-Siina woykko Dabire, 50 Anaabe, Eshttamo, Aniime, 51 Gooshene, Holoonenne Gilo; heyti tammanne issineti istta katamatanne istta gutata.

52 Qasse Arabe, Duuma, Eshaane, 53 Yaanime, Beeti-Taaphphuhe, Afeeqe, 54 Humixa, Kebroone woykko Qiriyaate-Arba7enne Xi7oore; heyti uddufunati istta katamatanne istta gutata.

55 Qasseka Ma7oone, Qarmeloose, Ziife, Yuuxa, 56 Izra7eele, Yoqidi7aame, Zaanohe, 57 Qayne, Gibi7anne Temina; heyti tammati istta katamatanne istta gutata.

58 Qasse Halihuule, Beeti-Xuure, Gadoore, 59 Maarate, Beeti-Anootenne Elttiqoone; heyti usuppunati istta katamatanne istta gutata.

60 Hessaththoka Qiriyaate-Yi7aarime geetettidaara Qiriyaate-Ba7aalenne Eraaba; heyti nam7ati istta katamatanne istta gutata.

61 Bazzon dizayti hayssafe kaallizayta; Beeti-Arabe, Midiina, Sikaaka, 62 Nibishaane, Maxine katamanne En-Gaade; heyti usuppunati istta katamatanne istta gutata.

63 Gido attiin Yuhuda asay Yerusalaamen diza Yaabuseta istti dizasoppe kessi gooddana dandaybeettenna; hessa gishshas Yaabuseti hach gakkanaaska Yuhuda asaara issife Yerusalaamen deettes.[b]

<- Iyaaso Maxaafa 14 Iyaaso Maxaafa 16 ->