Isayaasa Tinbite Giddo Qofa Isayaasa Maxaafay Kirstoosi yelettanaappe kase osppunththa xeetu layththa wurseththa heeran diza gita nabe Isayaasa sunththan xeygettides; hayssi ha maxaafazi heedzdzu erettida kifiletan shaakettanaas dandayees. 1. Shem 1-39 gakkanaas diza kifilezi dugeha bagga kawoteth Yuhuda dere bolla Asoore geetettiza wolqqama kawoy gaththida qoho gishshas yootees; Yuhuda dere meton yeggiday Asoore wolqqa gidontta dereza nagaranne asay Xoossas azazettontta ixo; hessaththoka asay Xoossan ammanettontta aggidayssa be7ides. Nabezi derezinne deraa kaaleththizayti xilloteththaakonne tumateththi dizaso simmana mala yootides; qasseka Xoossas azazettontta ixoy pacenne dhays ehanayssa isttas qonccisides; hessaththoka buroppe yaana layththatan alame yuushon saroteththi kumanayssanne kumeththa lo7eteththan ayssanaas Dawite zereththafe kawotanaadey yaanayssa nabe Isayaasi kaseti yootides. 2. Shem 40-55 gakkanaas diza kifilezappe dariza baggay Yuhuda asay di7etti Baabiloone biin heen istta bolla kawushshateththi gakkanayssanne hidotay isttas dhayanayssa yootees. Nabezi Xoossi ba dereza wozziin asay lo7o ooraththa duus daanaas istta izi Yerusalaame zaaranaas wodey matidayssa yootides. Hayta shemppota garsan keehi qoncci beettiza ayfe yo7oy Xoossi hano ubbaas aawa gididayssanne ba deraas izi halchchida halchchoy, Xoossa kiitay Isra7eele asaa baggara dere ubbaas gakkanayssa yootees. «Xoossa oosanchcha gishshas» yootiza kase gal7a caaqon diza erettida kiitatara issife qoodeteettes. 3. Shem 56-66 gakkanaas diza kifilezappe dariza baggay yootizay guye ba dere Yerusalaame simmi bidayta gishshassinne Xoossi Isra7eele asaas immida hidota qaala ubbaa polanaakko giidi naage bolla diza asaas markka gidana malassa; tishshi histti xeellanaas bessizayti xilloteththinne tuma pirda, sambata bonchchonne yarsho shiisho, qasseka minni woosso. Hayssa ha kifilezan erettida shemppoy 61:1-2 gidishin Yesusi koyro ooso oykkishe ba xeygeteththaas markka shiishshida qaalati deettes. Ha Maxaafay Oykkida Kumeththa Qofa Giddo qofa 1:1-31 Yuhuda gishshassinne Isra7eele gishshas aadhdhida kiitata 2:1—5:30 Isayaasa haggazon diza hanotata 6:1—9:7 Yuhuda gishshassinne Isra7eele gishshas gujettida hara kiitata 9:8—12:6 Hara dereta bolla Xoossa qixaate 13:1—23:18 Waaye bolla diza Xoossa deres hidota kiita 24:1—27:13 Xoossi makkalliza ba deraa qaxxayana qaxxayo 28:1—31:9 Xoossi Eedoome qaxxayizaadenne Yerusalaame anjjizaade 32:1—35:10 Asoore, Baabiloone, kawo Hizqiyaasanne Isayaasa 36:1—39:8 Xoossay ba dere ashshizaade 40:1—48:22 Xoossa oosanchcha 49:1—53:12 Xoossay ba immida hidota naagizaade 54:1—55:13 Derey wurikka Xoossa bagga gidanaas dandayees 56:1-8 Dere ayssizayta gidi uttidi Xoossas azazettonttayti qaxxayettana 56:9—59:21 Sinththafe yaanaas diza Yerusalaame bonchcho hidota 60:1—62:12 Malalisiza Xoossa ooraththa medheteththata 63:1—66:24
1 Yuhuda kawota Ooziya, Iyo7aatame, Akaazenne Hizqiyaasa kawoteththa wode Amoxe naa Isayaasi Yuhuda gishshassinne Yerusalaame gishshas be7ida ajjuuta.[a]
Xoossay Ba Dereza Seerida Seera 2 GODAY, «Salotoo siyite! biittayee nekka ezga siya! Tani nayta yelada dichcha gaththiin istti ta bolla makkallida. 3 Booray ba godaa erees; harey iza goday izas giigsida zedhekka erees; Isra7eeley gidikko tana erenna; ta dereykka akeekenna» gides. 4 Intteno nagaranchcha kawoteththatoo! Qohon kumidaytoo! Iita ooththiza zereththatoo! Intte aawata tunateththaa kaalliza naytoo! Inttena aayye ana! GODAA aggaagideta; Isra7eele geeshshaza yeggi aggideta; zokkoka izas zaarideta. 5 Makkalla bolla makkalla gujjidi intte ays zaari zaari qaxxayetteetii? Intte hu7ey mule sakettides; intte wozinaykka daaburdes. 6 Hessa gaason hirki toho xugunththafe biidi hu7e iske gakkanaas paxateththi inttes baawa. Madunth, kixanne uzas xalla gidides. He madunththay meecettibeenna; qashettibeenna; zaytenkka shuggibeenna. 7 Intte derey aykkoy baynda bazzo gidana; intte katamati taman xuugettana; intte ayfey xeellishin intte biitta allagay bonqqi ekkana; istti intte biitta bula kessana. 8 Xiyoone naya woyne miththa giddon diza gaabba mala, lelehe giddon diza qeeri keeththa malanne morkkey giddoththida katama mala gidadus. 9 Ubbaafe Wolqqama GODAY nuus zereth ashshonttaakko, nuni Sodoome malanne Gamoora mala gidanakkoshin.[b] 10 Intteno Sodoome ayssizaytoo! GODAA qaala siyite; intteno Gamoora deretoo! Nu Xoossa timirte ezgi siyite. 11 «Intte yarsho daroy taas ay ooththanee? Hanno gakkanaas intte taas shiishshida xuugetti shiiqiza dharsho ashonne modhdho meheta asho kalladis; tani boora suuththan, dorsa suuththaninne deysha suuththan ufayettike.[c] 12 Intte taas goynnanaas yiza wode hessa ubbaa intte ekki yaana malanne ta Keeththa zago intte yedhdhana mala ooni oychchidee? 13 Hayssafe guye hayssa misatiza hada yarsho nam7anththo shiishshofte; intte cuwasiza exaaney tana shaattees; agina xeeron, sambata gallassataninne intte goynos shiiqiza gallassatan intte bonchchiza ba7aaleti iitateththan kumida gishshas tani heyta gencca aadhdhanaas dandaykke. 14 Agina xeeron intte bonchchiza gallassatanne kase intte woththida ba7aale gallassata ta shemppoya harasettadus; heyti taas daro deexo tooho gidida gishshas ta istta tookkanaas dandaykke. 15 Intte intte kushe woosas taakko micciko tani ta ayfe inttefe haraso zaarana; intte kushen suuththi kumida gishshas intte keehi woossikokka ta intte woosa siyikke. 16 Meecettite; inttena geeshshite; intte iita oosoza ta sinththafe diggite; iita oosokka aggite. 17 Lo7o ooso tamaarte; suure pirda koyite; qohettidayta minththeththite; yi7otas eqqite; am7etas mootettite» gides. 18 Qasseka GODAY, «Haa yiite issoy issaara ane buuxettoos; intte nagaray xeeqa zo7o gidikkoka shachcha mala boottana; suuththa mala zo7ikkoka puutto mala puqqa booth gidana. 19 Intte taas eeno gi azazettiko biitta anjjo maana. 20 Intte taas akkay gi makkalliko mashshay inttena maana; hayssa yootiday tana GODAA» gides. Nagaray Kumida Katamayo 21 Kase ammanettida katamaya waanada layma gidadee? Kase izin suure pirday kumidaaranne xilloteththi izin kumidaara ha7i gidikko shemppo wodhizaytas duussaso gidadus. 22 Hanne ne biray shiydes; ne woyne ushshay haaththan yeellettides. 23 Nena kaaleththizayti makkallanchchataranne kaysotara laggetida; istti ubbayka maganxo doseettes. Matta7ekka keehi koyeettes; yi7otas aadhdhi eqqettenna; am7eta magana siyettenna. 24 Hessa gishshas GODAY, Ubbaafe Wolqqama GODAA Isra7eele Xoossay, «Tani ta morkketa bolla ta hanqo gussana; tana komizayta bollaka tani halo kessana. 25 Tani ta kushe ne bolla denththana; ne bolla diza kinththaka ta geeshshana; ne qitaakka ne bollafe diggana. 26 Kase nena ayssizayta mala hara nena ayssanaytanne zoranayta tani nees denththana; hessafe guye neni, ‹Xilloteththi diza ammanettida katamayo› geetettana. 27 Xiyoona suure pirdan, maaroteththan simmizayti xilloteththan wozzettana. 28 Gido attiin makkallanchchatinne nagaranchchati issi bolla liiqana; Xoossa aggizayti wurikka dhayana. 29 Kase intte dosiza kaashshatan intte yeellatana; kase intte doorida atakiltesohotan intte kawuyana. 30 Wurseththan intte bonccoy qokkida wola mala, haaththi baynda atakiltesohota mala gidana. 31 Mino asi happa mala; iza oosoykka pil7i giza laco mala gidana; nam7ayka issi bolla xuugettana; he tamaa toyssana asikka deenna» gides.
Isayaasa Tinbite 2 ->
1 Yuhuda kawota Ooziya, Iyo7aatame, Akaazenne Hizqiyaasa kawoteththa wode Amoxe naa Isayaasi Yuhuda gishshassinne Yerusalaame gishshas be7ida ajjuuta.[a]