2Sameela Maxaafa 23

Dawiti Wurseththan Yootida Qaala

1 Dawiti wurseththan haasayda qaalay hayssafe kaallizayssa;

«Yaaqoobe Xoossaan tiyettidayssi,

Ubbaafe Dhoqqa Xoossay

dhoqqu dhoqqu histtida asi,

Isra7eelen dosettida yeththanchchay,

Isseye naa Dawite tinbite

qaalay hayssa;

2 «GODAA Ayanay

ta baggara haasaydes;

iza qaalay ta doonan dees.

3 Isra7eele Xoossi haasaydes;

Isra7eele zaallay taas,

‹Asaa xilloteththan haarizay,

Xoossa yashshateththan ayssizay,

4 izi shaaray bayndason,

maalado xalqqey keziza

wode diza poo7o mala;

izi biitta bolla maata

purccisiza xalqqe mala,

iray bukki aadhdhishin

ke7iza awa mala› gides.

5 «Ta keeththi Xoossa matan

likke gidennee?

Ubba miish giigsidinne naagidi,

tanara mernaa caaqo qaala

geliday iza gidennee?

Ta atoteththa polo gaththanay

ta amo ubbaa taas immanay

iza gidennee?

6 Gido attiin iita asati ubbay,

kushen shiishshana dandayettontta

agunththa mala

wora wodhdhana.

7 Agunth bochchiza ubbaas,

birata woykko

toora tooma koshshees;

istti ba dizason mulera

taman xuugettana.»

Erettida Qara Asata

(1Taari 11:10-41)

8 Dawites erettida qara asata sunththi hayssafe kaallizayssa; koyroyssi Tahikimoone dere as Yoshebi-Baashebete gidishin izi heedzdzu halaqatas halaqa; izikka issi olan ba toora xongidi 800 as wodhida qara.

9 Nam7anththozi Ahihohe dere as Doode naa El7ezeere; olettanaas issi bolla shiiqida Filisxeeme asay eqettiza wode Isra7eele asay baqatides; Dawitera diza heedzdzu qarata garsafe issoy iza. 10 Izi gidikko ba eqqidaso yeddibeenna; iza kushey argacanaashenne mashshara issife oykettanaashe gakkanaas Filisxeemeta olides; he gallas GODAY izas gita xoono immides. Baqati bida olanchchati hayqqida asaappe ola miishshinne may7o xalla qaaratanaas Ele7eezerekko guye simmida.

11 Heedzdzanththozi Harare dere as Aage naa Shaama; Filisxeemeti Leehan kumeth misiray zerettida gaden istti issi bolla shiiqi dishin Isra7eele olanchchati Filisxeemeta sinththafe baqatida. 12 Shaamay gidikko ba eqqidaso yeddibeenna; he olaa eqettidi Filisxeemeta wodhides; he gallas GODAY gita xoono immides.

13 Kaththa shiisho wode Filisxeeme olanchchati Erafayme zullen dunkaani uttidaashe heedzdzu tammu halaqatappe heedzdzati Dawiti dizaso Adulaame gongolo yida. 14 He wode Dawiti miixa giddon dees; Filisxeeme olanchchati Beeteliheemen deettes. 15 Dawiti laamotidi, «Beeteliheeme penge achchan diza olla haaththaafe taas oonee ehanay!» gides. 16 Hessa gishshas erettida ola qara heedzdzati Filisxeeme olanchchata giddora kanththi biidi Beeteliheeme penge achchan diza haaththa ollafe duuqqi Dawites ehida; izi gidikko GODAA sinththan yarsho histti gussides attiin uyibeenna. 17 «Abeet GODAWU! Hayssa mala ooso ta wostta ooththoo? Hayssi taappe haakko! Hayssi bantta shemppo bolla pirdida asata suuth deennee?» giidi Dawiti uyana koyibeenna; hekko erettida heedzdzu ola qarati ooththida goobateththa oosoy hessa.

18 Xuriya naa Iyo7aabe ishaa Abisayey heedzdzu erettida ola qaratas halaqa; heedzdzu xeetu asaa bolla ba toora xongidi wodhidanne ha heedzdzu qarata mala erettida gooba asa. 19 Abisayey heedzdzatappe bollara keehi erettida as gidennee? Izi isttafe gidontta aggikokka izi isttas halaqa.

20 Hara erettida qaray Qabxi7eele dere as Yoodahe naa Bannayay gita erettida ooso ooththides. Izikka nam7u erettida Mo7aabe asata wodhides; qasseka shachchi bukkida gallas olla giddo gelidi gaammo wodhides. 21 Hessaththoka issi gita Gibxe as wodhides; he Gibxe addezi ba kushen toora oykkides; gido attiin Bannayay izara olettanaas guufe oykkidi izakko bides; Gibxe addeza kusheppe iza toora woththi ekkidi iza tooran iza wodhides.

22 Yoodahe naa Bannaya goobateththi hessa; izikka erettida heedzdzu qara asata mala erettida gooba asa. 23 Izi he heedzdzu tammu asatappe aadhdhi bonchchettidaade; gido attiin erettida heedzdzu qara asata mala sabettenna. Dawiti Bannaya ba bonchcho zabeta bolla shuumides.

24 He heedzdzu tammatappe baggayta sunththi hayssafe kaallizayssa.

Iyo7aabe ishaa Asaheele,

Beeteliheeme dere as Doode

naa Elyaane,

25 Harare dere as Shammaha,

Harare dere as Eliqa,

26 Palixe dere as Heleexe,

Tequhe dere as Iqesha

naa Ira,

27 Anatoote dere as Abi7eezere,

Huushe dere as Mebunaye,

28 Ahihohe dere as Xalmoone,

Naxoofe dere as Mahiraye,

29 Naxoofe dere as Ba7aana

naa Helebe,

Biniyaame baggafe Gibi7a dere as

Eribaye naa Ittaye,

30 Piraatoone dere as Bannaya,

Ga7aashe zulle as Hidaaye,

31 Arabe dere as Abi-Elboone,

Barhume dere as Azimoote,

32 Shaalboone dere as Eliyaahibe,

Yashene nayta,

Yoonataane,

33 Harare dere as Shammaha naa,

Harare dere as

Sharare naa Ahi7aame,

34 Ma7ikate dere as

Ahasiba naa Elfaleexe,

Gilo dere as

Akxofeele naa El7aame,

35 Qarmeloose dere as Hexiro,

Arabe dere as Paaraye,

36 Xoobba dere as

Naataane naa Yigi7aale,

Gaade dere as Baane,

37 Amoone dere as Zallaqa,

Xuriya naa Iyo7aabes

gondalle oykkiza Bi7eroote

dere as Nahiraye,

38 Yatire dere as Ira,

Yatire dere as Gaareebe,

39 Hessaththoka Hiite

dere as Ooriyo,

istti issi bolla heedzdzu

tammanne laappuna.

<- 2Sameela Maxaafa 22 2Sameela Maxaafa 24 ->