1 Teslonqqe 5

1 Ta ishato hesi hanana wode gish nu intes xaafanas kooshshena. 2 Kaysoy qaman yiza mala Goda gaallasayka hessa mala yaanayssa inte inte baggara looethi ereista. 3 Asay “gadey sarone loo7oko” gishin miixay qanththara diza maccash oyyikiza mala hessathoka asi dhayssizay qoopontta asa bolla gakkana. Oonikka kessi ekkena. 4 Inteno ishato, he gaallasay kayso mala intena daganththanas inte dhuman deekkista. 5 Inte wurkka poo7o nayta; nuni dhuma woykko qama bagga gidokko. 6 Histtiko ane beegos; ane nurkka nuna haaros attin hankko dhiskkiza asa mala nukka dhiskkoko. 7 Dhiskkizayti qamara dhiskketes; maththotizaytikka qamara maththottettes. 8 Nu qass gaallasa asata gidida gish ammanone siiqo tiran mayiza asa mayo mala mayidi atotetha ufayss hu7en woththiza asa qoobe mala nu hu7en woththidi ane nunatetha haaridi deyoos. 9 Xoossi nu atoteth Goda Yesuss Kiristtossa baggara demmana mala attin nuna hanqqos xeygibeytena. 10 Nu hayqqikkoka woykko paxxa dikkoka izara isife daana mala izi nu gish hayqqides. 11 Hessa gish tumape inte hai oothizayisa malakka issay issara minettite; issay issa minsso.

wurththetha zorene sarotho

12 Histtiko ta ishato inte garssan miinni oothizayta Godan intefe bollara diza halaqatane intena zorizayta inte bonchana mala nu intena woosos. 13 Istta ootho gishakka istta siiqora looathi bonchite; inte inte garssan saroni diite. 14 Ta ishato nu intena “ootho oothontta asata hanqqetite; babbizayta minssite; daaburanchata maadite; asi wurthth danddaite” gi zorosu. 15 Oonasikka iita gish iita zaarontta mala naagettite; Gido attin inte inte garssan gidin hara asara gidin wursso wode loo7o gidizayssa oothanas baaxetite. 16 Wuri wode ufaettite. 17 Qanxxontta woosite. 18 Ayi hanonkka galatite Xoossa sheney intes Yesuss Kiristtosa baggara hessako. 19 Xiillo ayana tama toyssofite. 20 Buro hananas immetida qaala kadhopite. 21 Wurththika paacci xeellite, loo7o gidida oykkite. 22 Iita milatiza ay miishapekka hakite. 23 Sarotetha Goday izi intenatetha bees duummaso; inte ayanay, inte shemppoyne inte ashoy Goda Yesuss Kiristtossay yiza wode wothoyi bayindda naagetto. 24 Intena xeyigidayssi ammanetidade gidida gish izi hessa oothana. 25 Nu ishato nu gishakka woosite. 26 Ammanizayita wurssi geeshshata yeeretethan saroththite. 27 Ha kiitay ammanizaytas wurssos nabbabistana mala Goda sunththan hadara gayis. 28 Nu Goda Yesuss Kiristtossa aadho kiyatethi intista gido.

<- 1 Teslonqqe 4