3
ዬሩሳላሜስ ሲንꬃፌ ያና ቃዳ
1 ማካላንቻይሲኔ ቱኒዳሪስ፥
ኣስ ኡንኤꬂዛይታ ካታማይስ
ኣዬ ኣና!
2 ኢዛ ኦናስካ ኣዛዜቱኩ፤
ኦኒ ዞሪንካ ኤኩኩ፤
ጎዳንካ ኣማኔቱኩ፤
ባ ጾሳኮካ ሺቁኩ።
3 ኢዞ ካሌꬂዛይቲ
ጻጊዛ ጋሞ ማላ።
ኢዞ ኣይሲዛይቲካ ዎንቶስ ኣሾንታ
ሚዛ ካና ሱይቴ ማላ።
4 ኢዚን ዲዛ ናቤቲ ኦቶራንቻታኔ
ኣስ ባሌꬂዛይታ።
ቄሴቲ ጾሳ ኬꬃ
ቱኒሴቴስ፤
ዎጋ ቦላካ ማካሌቴስ።
5 ኢዚን ዲዛ ጎዳይ ኢዚ ጺሎ።
ሙሌካ ባሌቲ ኤሬና፤
ማላዶ ማላዶ ሱሬ ፒርዴስ፤
ኡባ ጋላሲካ ዳቡሪ ኤሬና፤
ጊዶ ኣቲን ማካላንቻታስ
ዬላይ ዴና።
6 ጎዳይ፥ «ታኒ ዴሬታ ꬋይሳዲስ፤
ኢስታ ሚጻይ ሙሌራ ꬋይዴስ፤
ኦኒካ ኢዛራ ኣꬎንታ ማላ
ኢስታ ኦጌ ካይዚሳዲስ፤
ኢስታ ካታማቲ ሙሌራ ꬋይዳ፤
ኢሲ ኣሲካ ዴና፤
ኢስታን ዴኣናይካ ዴና።
7 ታ ሄ ካታማዮ፥
ቱማፔ ኔኒ ታስ ያያና፤
ታ ሴሪሺን ኔ ኤካና ጋዲስ ሺን፤
ሄሳ ጊሻስ
ኢዚ ዱሳሶይ ꬋዬና፤
ኢዚ ቦላ ቂጻቴይ ጋኬና።
ጊዶ ኣቲን ታ ዴሬይ ኢታ ኦሶን፥
ካሴፔ ጌዴ
ሚኒ ሚኒ ቢዴስ» ጌስ።
8 ጎዳይ፥ «ሄሳ ጊሻስ ታ ፒርዳና
ጋላሳይ ጋካናስ ዲሺቴ፤
ታኒ ዴሬ ኣሳኔ
ካዎታ ሺሻናስ ቃቻዲስ።
ታኒ ታ ሚኖ ሃንቆዛ ኢስታ ቦላ
ጉሳናስ ቃቻዲስ።
ታ ሃንቆ ታማን
ኩሜꬃ ቢታይ ኤጻና።
9 ሄ ዎዴ ኣሳይ ኡባይ
ጎዳ ሱንꬅ ጼይጋና ማላኔ
ሲጋን ኢዛስ ሃጋዛና ማላ
ታ ኢስታ ዶና ጌሻና።
10 ቶጵያ ሻፋታፔ
ሄ ፒንꬃን ላሌቲ ዲሼ
ታስ ጎይኒዛ ታ ዴሬይ
ታስ ያርሾ ኤሃና።
11 ኢንቴ ታ ቦላ ፖሊዳ ቆሆ
ኡባፌ ዴንዲዳይሳን፤
ሄ ጋላስ ዬላቴኬታ፤
ባ ኦቶሬቴꬃን ኡፋዬቲዛይታ፥
ሃኖ ሃ ካታማይፔ ታ ዲጋና።
ሄሳፌ ጉዬ ታ ጌሻ ዙማን፥
ኢንቴ ታ ቦላ ኦቶሬቴኬታ።
12 ጎዳ ሱንꬃን ኣማኔቲዛ፤
ኣሽኬታኔ ባንታና
ካዉሺዛይታ፤
ታ ኢንቴ ጊዶን ኣሻና።
13 ኢስራኤሌፔ ጫሻ ኣቲዳይቲ
ናጋራ ኦሴቴና።
ዎርዶ ሃሳዬቴና፤
ኢስታ ዶናንካ
ጌኔ ሃሳያይ ዴና።
ሄሳ ጊሻስ ኢስቲ ሚዲ
ሳሮን ዴኣና፤
ኢስታ ባቢሳና ሚሺካ ዴና። [a]
14 ሃኔ ጺዮኔ ናዬ ኣኔ ዬጻ!
ኢስራኤሌ ኣሳዉ ኣኔ ኢሊሊቴ!
ሃኔ ዬሩሳላሜ ናዬ!
ኩሜꬃ ዎዚናፔ ኡፋዬታ!
ኡፋዬታሼ ሃሹ ጋ!
15 ጎዳይ ኔ ቦላ
ዪዛ ቂጻቴዛ ዲጊዴስ፤
ኔ ሞርኬታካ ኔፔ ዛሪዴስ።
ጎዳይ ኢስራኤሌ ካዎይ
ኔናራ ዴስ፤
ሃይሳፌ ጉዬ
ኣይ ኢታሲካ ባባካ።
16 ሄ ዎዴ ኣሳይ ዬሩሳላሜስ፥
‹ጺዮኔ ኔ ባቦፋ፤
ኔ ቄሴይ ዳቡሮፖ።
17 ጎዳ ኔ ጾሳይ ኔናራ ዴስ፤
ኢዚ ኣሺዛ ሚኖ ኦላንቻ።
ኢዚ ኔናን ዳሮ ኡፋዬቴስ፤
ኢዚ ባ ሲቆን ኔና ዎፒሳና፤
ኔ ዬꬃን ኢዚ ቦንቼቲዲ
ኡፋዬታና› ጋና።
18 «ቦንቾ ባኣሌ ጋላሳቲ
ኣቲዳ ጊሻስ
ኔኒ ሙዞቲዳይሳኔ፥
ኔስ ቶሆ ጊዲዳ ዬላ
ታ ኔፔ ዲጋና።
19 ሄ ዎዴ ኔና ኡንኤꬂዳይታ
ታ ቃጻያና።
ዎቤታ ታ ኣሻና፤
ላሌቲዳይታካ
ታ ሺሻና።
ኢስቲ ካዉዪዳ ዴሬ ኡባን
ታ ኢስታ ቦንቾሲኔ
ሳባስ ጋꬃና።
20 ሄ ዎዴ ታ ኢንቴና ሺሻና፤
ኢንቴ ዴሬ ታ ኢንቴና ዛራና።
ኢንቴ ኢንቴ ኣይፌራ ቤዪሺን፥
ኢንቴፌ ዲኤቲዳ ሚሻ
ታ ኢንቴስ ዛሪዛ ዎዴ
ቢታ ቦላ ዲዛ
ዴሬ ኡባ ሲንꬃን
ታ ኢንቴስ ሳባኔ