6 «ሃይሳፌ ጉዬ ሃ ቢታይ ቦላ ዲዛ ኣሳስ ታ ቃꬌቲኬ፤ ታኒ ታ ባጋራ ኢሳ ኢሳ ኢዛ ላጌሲኔ ኢዛ ካዎስ ኣꬃ ኢማና፤ ኢስቲካ ቢታ ኡንኤꬃና፤ ታኒካ ኢስታ ኢስታ ኩሼፔ ኣሺኬ» ጌስ።
7 ሄሳ ጊሻስ ታኒ ባይዚዛይታሲኔ ሻሚዛይታስ ቃጻሬታ ሹኬታናስ ዶሬቲዳ ዶርሳታ ሄሚዛዴ ጊዳዲስ፤ ዶርሳታካ ሄማሼ ናምኡ ጉፌታ ኤካዳ ኢሳ፥ «ኪያቴꬅ» ናምኣንꬆዛ፥ «ኢሲፌቴꬅ» ጋ ሱንꬃዲስ። 8 ኢሲ ኣጊና ጊዶን ሜሄ ሄሚዛ ሄꬓታ ዲጋዲስ፤ ኢስቲካ ታና ኢጺዳ ጊሻስ ታኒካ ኢስታ ሳሌታዲስ። 9 ታኒ ኢስታስ፥ «ሃይሳፌ ጉዬ ታኒ ኢንቴና ሄሚኬ፤ ሃይቃናይቲ ሃይቄቶ፤ ꬋያናይቲካ ꬋዬቶ፤ ኣቲዳይቲካ ኢሶይ ኢሳ ኣሾ ሞ» ጋዲስ።
10 ቃሴካ ዴሬ ኡባራ ታ ጫቄቲዳ ቃላ ላላናስ፥ «ኪያቴꬅ» ጋዳ ሱንꬂዳ ታ ጉፌዛ ሜንꬃዲስ። 11 ሄ ጋላስ ካሴ ጫቆዚ ላሌቲዴስ፤ ኡንኤቲ ኡቲዲ ታና ጼሊዛ ዶርሳቲ ሄሲ ጎዳ ቃላ ጊዲዳይሳ ኤሪዳ። 12 ታኒካ ኢስታስ፥ «ኢንቴስ ሎኦ ሚሳቲኮ ታ ዋጋ ታስ ቃንጺቴ፤ ኣካይ ጊኮ ኣጋጊቴ» ጋዲስ፤ ሄሳ ጊሻስ ኢስቲ ታስ ሄꬑ ታሙ ሳቂሌ ቢራ ቃንጺዳ። [a]
13 ጎዳይካ ኢስቲ ታስ ኢማና ጊጊዳ ካꬌቲዳ ቢራ ኤካዳ፥ «ሚንጃ ኬꬃን ዎꬃ!» ጊዴስ። ታኒካ ሄ ሄꬑ ታሙ ሳቂሌ ቢራ ኤካዳ ጎዳ ኬꬃ ጊዶን ሚንጃሶን ዎꬃዲስ።[b] 14 ሄሳፌ ቃሴ ኢስራኤሌኔ ዩሁዳ ኢሻቴꬅ ላላዳ፥ «ኢሲፌቴꬅ» ጋዳ ታ ሱንꬂዳ ናምኣንꬆ ጉፌዛካ ሜንꬃዲስ።
15 ቃሴካ ጎዳይ ታና፥ «ኣዛላ ሄንꬃንቻቲ ኦይኪዛ ሚሽ ኢስታፌ ዎꬃ ኤካ። 16 ሄኮ ታኒ ቢታ ቦላ ኦራꬃ ሄንꬃንቻ ዴንꬃና፤ ሄ ሄንꬃንቻይ ካሴ ꬋይዳይሳ ዛሪ ቆፔና፤ ላሌቲዳይሳካ ኮዬና፤ ሜቂዳይሳካ ኮሌና፤ ፓጺዳይሳካ ꬊኬና፤ ጊዶ ኣቲን ሞꬊዳይሳ ኣሾ ማና፤ ቂንጪፊሌካ ኣሾንታ ዲፒ ሂስታና። 17 ዉዴዛ ዬጊ ኣጊዛ ጎኣይ ባይንዳ ሄንꬃንቻስ ኣዬ ኣና!