1 ሄሳፌ ጉዬ ታኒ ኦራꬃ ሳሎኔ ኦራꬃ ሳኣ ቤያዲስ፤ ካሴ ሳሎይኔ ካሴ ሳኣይ ኣꬊ ቢዳ፤ ሃይሳፌ ጉዬ ኣባይካ ዴና። [a] 2 ጌሻ ካታማያ ኦራꬃ ዬሩሳላሜይ ባ ኣዚናስ ጊጌቲዳ ሚሺራ ማላ ሎኣ ጊጌታዳ ሳሎ ጾሳ ኣቻፌ ዎꬊሺን ታኒ ቤያዲስ። [b] 3 ኣልጋዛፔ፥ «ሄኮ ጾሳ ኣቆሶይ ኣሳራ ዴስ፤ ኢዚ ኢስታራ ዳና፤ ኢስቲካ ኢዛ ዴሬታ ጊዳና፤ ጾሲ ባ ቦንቾን ኢስታራ ኢሲፌ ጊዳና፤ ኢዚ ኢስታ ጾስ ጊዳና። [c] 4 ኢዚ ኢስታ ኣይፌፔ ኣፉንꬅ ኡባ ቁጫና፤ ካሴ ዎጋይ ኣꬊዳ ጊሻስ ሃይቆይ ዎይኮ ሙዞቴꬂ ዎይኮ ዬሆይ ዎይኮ ዋዬይ ሃይሳፌ ጉዬ ዴና» ጊዛ ጊታ ቃላይ ኬዚሺን ታኒ ሲያዲስ። [d]

5 ሄ ኣልጋ ቦላ ኡቲዳይሲካ፥ «ሄኮ ታኒ ዉርሳካ ኦራꬅ ኬሳና!» ጊዴስ፤ ቃሴካ ታና፥ «ሃይሲ ቃላዚ ኣማኔቲዳ ቱሙ ጊዲዳ ጊሻስ ኔ ሃይሳ ጻፋ!» ጊዴስ። 6 ሄሳፌ ጉዬ ታስ፥ «ፖሌቲዴስ! ኣልፋይኔ ኦሜጋይ፤ ኮይሮይኔ ዉርሴꬂ ታና፤ ሳሜቲዳዴስ ታኒ ዴኦ ፑልቶ ሃꬅ ሚሼ ቃንጺሶንታ ኢዛስ ጮ ሜላ ኢማና። [e] 7 ጾኒዳዴይ ሃይሳ ላታና፤ ታኒካ ኢዛዴስ ጾስ ጊዳና፤ ኢዚካ ታስ ና ጊዳና። [f] 8 ጊዶ ኣቲን ሃንኮ ባቦቲ፥ ኢስታስ ኣማኔቶንታይቲ፥ ቱናቲ፥ ኣሳ ሼምፖ ዎꬊዛይቲ፥ ላይማቲዛይቲ፥ ቢቲዛይቲ፥ ኤቃስ ጎይኒዛይቲ፥ ዎርዶቲዛይቲ፥ ሄይታ ኡባታ ቃዳይ ዲኔን ኤጺዛ ታማ ኣባ ጊዶን ጊዳና፤ ሄሲካ ናምኣንꬆ ሃይቆ» ጊዴስ።

9 ዉርሴꬃን ላፑን ቦሻቲ ኢስታን ኩሚዳ ላፑን ጹኣታ ኦይኪዳ ላፑን ኪታንቻታፔ ኢሶይ ታኮ ዪዲ ታና፥ «ሃ ያ! ታ ኔና ዶርሳዛ ማቼዮ ሚሺራዮ ቤሳና» ጊዴስ። 10 ኢዚ ታና ኣያናን ኢሲ ጊታ ꬎቃ ዙማ ቦላ ኬሲዲ ጌሻ ካታማያ ኦራꬃ ዬሩሳላሜይ ጾሳ ኣቻፌ ሳሎፔ ዎꬊዛሮ ቤሲዴስ። [g] 11 ኢዛካ ጾሳ ቦንቾን ፖኢሳዉስ፤ ኢዚ ፖኦዛ ሎኤቴꬂ ቃሴ ኬሂ ቦንቼቲዛ ሹቻ ማላኔ ቢሪሌ ማላ ጌሺኔ ኢያስጲዴ ጌቴቲዛ ኢንቁ ማላ። 12 ኢዚስ ታማኔ ናምኡ ፔንጌታራ ዲዛ ጊታ ኣዱሳ ጊምቤይ ዴስ፤ ሄ ታማኔ ናምኡ ፔንጌታን ታማኔ ናምኡ ኪታንቻቲ ኤቂዲ ናጌቴስ፤ ሄ ፔንጌታ ቦላ ታማኔ ናምኡ ኢስራኤሌ ኮቻታ ሱንꬂ ጻፌቲ ዴስ። 13 ኣርሼይ ሞኪዛ ባጋራ ሄꬑ ፔንጌይ ዴስ፤ ፑዴሃ ባጋራ ሄꬑ ፔንጌይ ዴስ፤ ዱጌሃ ባጋራ ሄꬑ ፔንጌይ ዴስ ኣርሼይ ዉሊዛ ባጋራ ሄꬑ ፔንጌይ ዴስ። 14 ሄ ካታማይ ጊምቤስ ታማኔ ናምኡ ዋና ዮቻቲ ዴቴስ፤ ሄ ዮቻታ ቦላ ታማኔ ናምኡ ዶርሳዛ ሃዋሬታ ሱንꬂ ጻፌቲ ኡቲዴስ።

15 ሄሳ ታስ ዮቲዳ ኪታንቻዛስ ሄ ካታማዮኔ ኢዚ ፔንጌታ ቃሴካ ሄ ጊምቤዛ ኢዛራ ዋꬊዛ ዎርቃ ዛንጌይ ዴስ። [h] 16 ሄ ካታማይ ኣዱሳቴꬂኔ ኣሆቴꬂ ኦይዱ ባጋራካ ኢሲ ጊና፤ ሄ ኪታንቻዚካ ካታማዮ ባ ኢዛራ ዋꬊዛ ዋꬋ ዛንጌዛራ ዋꬊን ኣዱሳቴꬃይ ታማኔ ናምኡ ሺ ኪሎ ሜቲሬ ማላ ጊዲዴስ፤ ኢዚ ꬎቃቴꬂኔ ኣሆቴꬂካ ኢዚ ኣዱሳቴꬃ ጊና ጊዲዴስ። 17 ኪታንቻዚ ጊምቤዛ ዋꬊዴስ፤ ሄ ኪታንቻዚ ኢዛራ ዋꬊዛ ሚሻዚ ኤሬቲዳ ዋꬋ ሚሻዚ ጼታኔ ኦይዱ ታማኔ ኦይዱ ሜቲሬ ማላ ጊዲዴስ። 18 ሄ ጊምቤዚ ጊምቤቲዳይ ኢያስጲዴ ጌቴቲዛ ሹቻና፤ ሄ ካታማያካ ማስቶቴ ማላ ጌያ ኡቲዳ ጌሻ ዎርቃፌ ኦሴታዱስ። [i] 19 ሄ ካታማይሲ ዮቻ ሹቻይ ዱማ ዱማ ኣልኦ ሹቻን ሎኢ ጊጊዴስ፤ ኮይሮ ዮቻዚ ኢያስጲዴ፥ ናምኣንꬆዚ ሲምፔሬ፥ ሄꬓንꬆዚ ኬልቄዶኔ፥ ኦይዳንꬆዚ ማርጊዴ፥ 20 ኢቻሻንꬆዚ ሳርዶንኪሴ፥ ኡሱፑንꬆዚ ሳርዲዮኔ፥ ላፑንꬆዚ ኪርስቶሎቤ፥ ኦስፑንꬆዚ ቢሪሌ፥ ኡዱፉንꬆዚ ቶጳዚዮኔ [ዉራዉሬ]፥ ታማንꬆዚ ኪሪስጲራሲሴ፥ ታማኔ ኢሲንꬆዚ ያኪንቴ፥ ታማኔ ናምኣንꬆዚ ኣሜቴስጺኖሴ ጌቴቲዛ ሹቻታ። 21 ሄ ታማኔ ናምኡ ፔንጌቲካ ታማኔ ናምኡ ኢንቁታ፤ ፔንጌቲ ዉሪካ ኢሶይ ኢሶይ ኢሲ ኢንቁፌ ኦሴቲዳ ሄ ካታማይ ጊዶ ኦጌይ ማስቶቴ ማላ ሃ ዛሪ ቤሲዛ ሙሩታ ዎርቃፌ ኦሴቲዴስ።

22 ኡባ ዳንዳይዛ ጎዳ ጾሲኔ ዶርሳዚ ኢዚስ ጾሳ ኬꬄ ጊዲዳ ጊሻስ ሄ ካታማይ ጊዶን ሃራ ጾሳ ኬꬅ ቤያቤኬ። 23 ጾሳ ቦንቾይ ኢዚስ ፖኢዛ ጊሻሲኔ ዶርሳዚ ኢዚ ፖኦ ጊዲዳ ጊሻስ ሄ ካታማይስ ኣርሼይ ዎይኮ ኣጊናይ ፖኢሳናስ ኮሼና። [j] 24 ዴሬቲ ኢዚ ፖኦዛን ሲሜሬታና፤ ቢታ ካዎቲ ዉሪካ ባ ቦንቾ ኢዚስ ኤሃና። 25 ሄ ካታማይን ቃማይ ባይንዳ ጊሻስ ኢዚ ፔንጌቲ ኣይ ዎዴካ ጎርዴቴቴና። 26 ሃራ ካዎታ ጊታቴꬂኔ ቦንቾይ ኢዚስ ያና። 27 ሃራሲዛ ሚሺ ሙሌካ ጌዴ ኢዚን ጌሌና፤ ቱናቴꬅ ኦꬂዛይቲኔ ዎርዶ ሃሳይዛይቲ ሙሌካ ሄ ኢዚኮ ጌሌቴና፤ ሄ ኢዚን ጌላናይታ ሱንꬂ ካሴ ሄ ዶርሳዛ ዴኦ ማጻፋን ጻፌቲዳይታ ጻላ። [k]