1 ጎዳይ ሙሴስ ሂዝጊዴስ፥ 2 «ዴሬዛ ኢሲ ቦላ ሺሻናስ ጊዲን ዎይኮ ኣሳይ ዱንካኒ ዲዛሶፔ ዴንꬄꬃናስ ፑኒዛ ናምኡ ዛዬታ ቢራፔ ቆጻ ኬሳ። 3 ናምኡ ዛዬቲ ፑኔቲዛ ዎዴ ኩሜꬃ ማባራይ ጋይቶቴꬃ ዱንካኔዛ ፔንጌን ኔ ዲዛሶ ሺቆ። 4 ኢሲ ዛዬይ ዛዬቲዛ ዎዴ ጊዲኮ ኢስራኤሌ ኣሳፔ ኮራፒኔቲ ጻላ ኔኮ ሺቄቶ። 5 ዛዬዛ ꬎቁ ሂስቲ ዛይኮ ኣርሼይ ሞኪዛ ባጋራ ዱንካኒ ኡቲዳ ኣሳይ ኮይሮ ሄሜꬅ ዶሞ። 6 ኔ ዛዬዛ ናምኣንꬆ ꬎቁ ሂስታ ፑኒዛ ዎዴ ዱጌሃ ባጋራ ዱንካኒ ኡቲዳ ኣሳይ ሄሜꬅ ዶሞ፤ ዛዬይ ꬎቁ ጊ ዛዬቲዛ ዎዴ ኣሳይ ሄሜꬅ ዶማናስ ማላታ ጊዶ። 7 ዴራ ኢሲ ቦላ ሺሻናስ ዛዬታ ꬎቂሶንታ ዚቂ ሂስታ ዛያ። 8 ቄሴ ጊዲዳ ኣሮኔ ናይቲ ዛዬታ ፑኔቶ፤ ሄሲካ ኢንቴስ ና ና ጋካናስ ኤቂ ዲዛ ዎጋ ጊዶ።

9 «ኢንቴ ዴራ ቦላ ዎራጂዳ ኢንቴ ሞርኬታራ ኢንቴ ኦሌታናስ ኬዚዛ ዎዴ ዛዬታ ꬎቁ ሂስቲ ፑኒቴ፤ ሂስቲኮ ጎዳ ኢንቴ ጾሳይ ኢንቴና ቆፓናኔ ኢንቴ ሞርኬታፔ ኢንቴና ኣሻና። 10 ሄሳꬆካ ኢንቴ ኡፋይሳ ባኣሌ ጋላስ፥ ሄሲካ ኣጊና ባኣሌታኔ ዱማ ዱማ ኢንቴ ቦንቻናስ ቃቺዳ ባኣሌታ ቦንቺዛ ዎዴ ጹጌቲዛ ያርሾኔ ኢሲፌቴꬃ ያርሾታ ሺሺዛ ዎዴ ዛዬታ ፑኒቴ፤ ሄይቲ ጾሳ ሲንꬃን ኢንቴና ቆፍሳና፤ ታኒ ጎዳ ኢንቴ ጾሳ።»

11 ዴሬዚ ጊብጼ ዴሬፔ ኬዚዳ ናምኣንꬆ ላይꬃን ናምኣንꬆ ኣጊናይ ጌሊዳ ናምኡ ታማንꬆ ጋላስ ማርካቴꬃ ዱንካኔዛፔ ቦላራ ዲዛ ሻራዚ ዴንዲዴስ። 12 ኢስራኤሌ ኣሳይ ሲና ባዞፌ ዴንዲዲ ሻራዚ ፓራኔ ባዞን ኤቃና ጋካናስ ዱማ ዱማሶን ሼምፒዳ። 13 ኢስራኤሌ ኣሳይ ጎዳይ ካሴ ሙሴ ኣዛዚዳ ኣዛዞዛ ማላ ኮይሮ ዩሾ ሄሜꬅ ዶሚዴስ። 14 ዩሁዳ ቆሞታ ባንዲራ ጋርሳን ዲዛ ኣሚናዳቤ ና ኔኣሶኔይ ካሌꬂን ባ ቡቴ ታራ ናጊዲ ኮይሮ ቢዳ። 15 ዪሳኮሬ ዛርኬታ ካሌꬂዛይ ጹኣሬ ና ናቲናኤሌ። 16 ዛቢሎኔ ዛርኬታ ካሌꬂዛይ ሄሎኔ ና ኤልያቤ። 17 ሄሳፌ ጉዬ ዱንካኔዚ ሾዴቲን ዱንካኔዛ ቶኪዳይቲ ጌርሾኔ ቆሞቲኔ ሜራሬ ዛርኬቲ ቡስ ዶሚዳ።

18 ኢስታ ካሊዲ ኦሮቤሌ ዛርኬታ ባንዲራ ጋርሳን ዲዛይቲ ሻዱሬ ና ኤልጹሬይ ካሌꬂን ባ ታራ ናጊዲ ቢዳ። 19 ሲሞና ዛርኬታ ካሌꬂዛይ ጹርሻዳዬ ና ሳሉምኤሌ። 20 ጋዴ ዛርኬታ ካሌꬂዛይ ዳኡኤሌ ና ኤልያሳፌ።

21 ሄሳፌ ጉዬ ሌዌ ባጋ ኣስ ጊዲዳ ቃኣቴ ዛርኬ ጊዲዳይቲ ጌሻ ሚሻታ ቶኪ ኤኪዲ ቢዳ፤ ኢስቲ ባፔ ሲንꬃ ባጋን ዲዛ ሄራዛ ጋካናፔ ካሴ ጾሳ ዱንካኔዚ ቶሌቲ ኡቴስ።

22 ሄሳፌ ካሊዲ ኤፍሬሜ ዛርኬታ ባንዲራ ጋርሳን ዲዛይቲ ኣሚሁዴ ና ኤልሻማይ ካሌꬂን ባ ታራ ናጊዲ ቢዳ። 23 ሚናሴ ዛርኬታ ካሌꬂዛይ ፔዳጹሬ ና ጋማልኤሌ። 24 ቢኒያሜ ዛርኬታ ካሌꬂዛይ ጊዲኦኔ ና ኣቢዳኔ። 25 ዉርሴꬃን ሃ ቡቴታ ጉዬ ቱቻን ናጊዛ ዳኔ ዛርኬታ ባንዲራ ጋርሳን ዲዛይቲ ባ ታራ ናጊዲ ቢዳ፤ ዳኔ ቆሞታ ካሌꬂዛይ ኣሚሻዳዬ ና ኣሂኤዜሬ። 26 ኣሴሬ ዛርኬታ ካሌꬂዛይ ኦክራ ና ፋጉኤሌ፤ 27 ኒፍታሌሜ ዛርኬታ ካሌꬂዛይ ኤናኔ ና ኣሂሬ። 28 ሄሳ ጊሻስ ኢስራኤሌ ኣሳይ ካሴ ባ ዲዛሶፔ ኬዚዲ ባ ቡቴን ቡቴን ቢዛ ቡሳ ማራይ ሃይሳ ማላ።

29 ሙሴይ ባ ማቼይ ኣዋ ሚዲያሜ ዴሬ ኣስ ኤራኡኤሌ ና ሆባቤስ፥ «ሄኮ ኑኒ ጎዳይ ኑስ ኢማናስ ካሴ ጫቂዳ ዴሬ ባናስ ጊጌቲዶስ፤ ጎዳይ ኢስራኤሌ ኣሳ ዱሬሳናስ ካሴ ኑስ ጫቂ ዎꬂዴስ፤ ሄሳ ጊሻስ ኔካ ኑናራ ሄꬋ፤ ኑኒ ኔስ ሎኦ ኦꬃና» ጊዴስ።

30 ሆባቤይ፥ «ኣካይ! ካሴ ታኒ ዬሌቲዳ ዴሬኔ ታ ዳቦታኮ ሲማ ባና» ጊዴስ።

31 ሙሴይ ኢዛስ፥ «ኔ ኑፔ ሻኬታ ቦፓርኪ! ኑኒ ሃይሳ ባዞ ቢታን ቢሼ ኣዋን ኣዋን ሼምፓና ቤሲዛኮ ኔኒ ኤራሳ፤ ኔኒ ኑና ኦጌ ካሌꬂዛ ኣስ ጊዳና። 32 ኔኒ ኑናራ ቢኮ ጎዳይ ኑስ ኢሚዛ ሎኦ ሚሻ ኡባፌ ኑ ኔስ ሻኪ ኢማና» ጊዴስ።

33 ዴሬዚ ጌሻ ዙማይ ዲዛ ሲና ባዞ ዬጊዲ ሄꬑ ጋላሳ ኦጌ ቢዴስ፤ ሄꬑ ጋላሳታን ጎዳ ጫቆ ቃላ ታቦታዚ ኣሳይ ሼምፓናሶ ኮያናስ ኣሳፔ ሲንꬃቲ ቢዴስ፤ ኢስቲ ካሴ ባ ዲዛ ሄራ ዬዳናፔ ካሴቲዲ ኣሳይ ሼምፓናሶ ኮያናስ ጫቆ ቃላ ታቦታዚ ኢስታፌ ሲንꬃን ሲንꬃን ቢዴስ። 34 ኢስቲ ባ ዲዛሶፔ ዴንዲ ዴንዲ ቢሺን ጎዳ ሻራይ ጋላስ ጋላስ ኢስታ ካሚ ኦይኬስ። 35 ጫቆ ቃላ ታቦታይ ባና ዴንዲሺን ዴንዲሺን ሙሴይ፥ «ጎዳዉ! ኔካ ዴንዳ፤ ኔ ሞርኬቲ ላሌቴቶ፤ ኔና ኢጺዛይቲ ዉሪካ ኔ ሲንꬃፌ ኪቼቶ!» ጌስ። [a] 36 ጫቆ ቃላ ታቦታዚ ኢሲሶ ጋኪ ኤቂዛ ዎዴ፥ «ታ ጎዳዉ! ዳሮ ሺያን ቆዴቲዛ ኢስራኤሌ ኣሳኮ ኔ ኣይፌሶ ሃ ዛራ» ጌስ።

<- ታይቦ 9ታይቦ 11 ->