8 « ‹ላፑንቶ ላፑን ላይꬅ ቆዳ፤ ሄ ላይꬃታ ቆዳይ ኦይዱ ታማኔ ኡዱፉን ላይꬅ ጊዴስ፤ 9 ላፑንꬆ ኣጊናይ ጌሊዳፔ ታማንꬃ ጋላስ ቦንቼቲዛ ናጋራፔ ማሬቴꬃ ጋላስ ኩሜꬃ ቢታ ቦላ ዛዬ ዛያናዴ ዬዲቴ። 10 ሄሳꬆካ ኢቻሽ ታማንꬆ ላይꬃ ዱማሲ ሻኪዲ ቢታይ ቦላ ዲዛይታስ ኡባስ ዎዜቴꬅ ኣዋጂቴ፤ ሃይሳፌ ካሴ ባይዜቲዳ ጋዴይ ካሴ ባይዚዳዴስ ዎይኮ ኢዛዴ ቆሞስ ሲሞ፤ ኣይሌቴꬃን ባይዜቲዳ ኣይሌይካ ካሴ ባ ኣሳኮ ሲሞ። 11 ሄ ላይꬅ ጎሼ ጎዪዲ ዜሬꬅ ዜሮፒቴ፤ ዜሬꬅ ዜሮንታ ጮ ኣዛባ ካጺዳ ካꬅ ዎይኮ ቂርጼቶንታ ኣይፊዳ ዎይኔ ሚꬃ ኣይፌ ማጺ ሺሾፍቴ። 12 ሄ ላይꬃይ ኩሜꬅ ኢንቴስ ዱማ ሻኬቲዳ ላይꬅ ጊዶ፤ ካሴ ኢንቴ ዜሮንታ ጮ ባርካ ካጺዳ ካꬅ ጻላ ሚቴ።

13 « ‹ሃይሳፌ ካሴ ባይዜቲዳ ጋዴይ ኡባይ ሄ ዎዞ ላይꬃን ጋዳዴስ ሲሞ። 14 ሄሳ ጊሻስ ኔ ኣሾ ጊዲዳ ኢስራኤሌ ኣሳ ኔኒ ጋዴ ባይዚዳዝ ጊዲኮ ዎይኮ ኔ ሃ ኔስ ሻሚዳዝ ጊዲኮ ጌኔ ኦሶ ኦꬆፋ። 15 ጋዴዛ ዋጋይ ሄሬጌታናስ ቤሲዛይ ሲንꬃፌ ቢታይ ሲሚዛ ላይꬃይ ጋካናፔ ካሴ ሄ ጋዴይ ኢማና ዳንዳይዛ ካꬃ ቆፒ ሄሬጋናስ ቤሴስ። 16 ላይꬃይ ዳሮ ጊዲኮ ሄሬጋይካ ዳሮ ጊዶ፤ ላይꬃይ ጉꬅ ጊዲኮ ሄሬጋይካ ጉꬅ ጊዶ፤ ጋዴይ ባይዜቲዛ ዋጋይ ጋዴዚ ኢሚዛ ካꬃ ማላ ጊዶ። 17 ኢሲ ኢስራኤሌ ኣሲ ሃራ ኢስራኤሌ ኣስ ቆሆፖ፤ ኢንቴ ኢንቴ ጾሳስ ያዪቴ፤ ታኒ ጎዳ ኢንቴ ጾሳ።

18 « ‹ኢንቴ ኢንቴ ቢታ ቦላ ሳሮን ዴኣና ማላ ጾሳ ዎጋ ኡባ ቦንቺቴ። 19 ቢታያ ኢንቴስ ጊዳና ካꬅ ኢማና፤ ኢንቴካ ኢዚፔ ካላና ጋካናስ ማና፤ ሳሮቴꬃንካ ዴኣና።

20 « ‹ጊዶ ኣቲን ላፑንꬃ ላይꬃን ጎሼ ጎዮንታኔ ካꬅ ዜሮንታ ማጾንታ ኣይ ማኔ?› ጊዲ ኦይቺዛ ኣሲ ዶንታ ኣጌና። 21 ኡሱፑንꬃ ላይꬃታን ቢታዮ ኣንጃና፤ ሂስቲኮ ኢዛ ኢንቴስ ሄꬑ ላይꬃስ ጊዳና ካꬅ ኢማና። 22 ኦስፑንꬃ ላይꬃንካ ጎሼ ጎዪሼ ኢንቴ ካሴ ሺሺዳ ካꬃ ማና፤ ሄሳ ሄ ካꬃ ኡዱፉንꬃ ላይꬃን ቦኔ ካꬅ ኢንቴ ሺሻና ጋካናስ ኢዛፔ ማና።

23 « ‹ጋዴይ ዎዜቶንታ ማላ ባይዛናስ ቤሴና፤ ጋሶይካ ቢታይ ታሳ ኣቲን ኢዛ ኢንቴስ ጊዱኩ፤ ኢንቴ ኢማꬃታኔ ቤቴ ኣሳታ ማላ።

24 « ‹ቢታይ ባይዜቲኮ ሄ ባይዚዛዴይ ሄ ቢታ ዛሪ ዎዛናይሲ ኤሬቲዳዝ ጊዶ። 25 ኢስራኤሌ ኣሳፔ ኢሳዴይ ሜቶፔ ኣታናስ ባ ጋዴ ባይዚኮ ኢዛስ ማቲዛ ዳቦይ ሄ ባይዜቲዳ ጋዳ ዎዞ። 26 ኢዛስ ዎዚዛ ማታ ዳቦይ ዶንታ ኣጊኮ ኢዛዴይ ጋምኢሼ ሚሼ ዴሚዲ ዛሪ ዎዛናስ ዳንዳዬስ። 27 ሄሳ ዎዛናስ ኢዚ ዳንዳይዛ ዎዴ ባ ባይዚዳ ዎዴዛፔ ዶሚዲ ዲዛ ላይꬃ ቆዲዲ ኣቲዳ ላይꬃታ ሚሻ ሻሚዳዴስ ዛሮ፤ ሄሳፌ ጉዬ ካሴ ባ ጋዴዛ ዛሪ ኤኮ። 28 ቃሴካ ጋዴዛ ዎዛናስ ጊዲዛ ሚሺ ኢዛስ ዶንታ ኣጊኮ ኢዚ ባይዚዳ ጋዴይ ዎዜቲዛ ላይꬃይ ጋካናስ ሻሚዳዴ ኩሼን ዴኦ፤ ዎዜቲዛ ላይꬃይ ጋኪሺን ጋዴይ ጋዳዴስ ሲሞ፤ ጋዳዴይካ ጌዴ ባ ጋዴን ሲሞ።

29 « ‹ኢሲ ኣሲ ጊምቤይ ጊምቤቲዳ ካታማ ጊዶን ዲዛ ኬꬅ ባይዚዳ ጊዲኮ ኢዚ ባይዚዳፔ ኢሲ ላይꬃ ጋርሳን ዛሪ ዎዛናስ ዳንዳዬስ፤ ኢዚ ዛሪ ዎዛና ዳንዳይዛይ ኢሲ ላይꬃ ጋርሳን ጻላ። 30 ጊዲኮካ ኢሲ ላይꬃ ጋርሳን ዛሪ ዎዛናስ ዳንዳዮንታ ኣጊኮ ሃራ ዎዴ ዛሪ ዎዚሲዛ ዎጋይ ኢዛስ ዴና፤ ኬꬃይ ሻሚዳዴስ ዎይኮ ኢዛ ና ናስ ሃሮ ጊዲ ኣቴስ፤ ባይዜቲዳ ሚሻይ ዎዜቲዛ ላይꬃንካ ባይዚዳዴስ ኬꬃይ ሲሜና። 31 ጊምቤይ ጊምቤቶንታ ጮ ዴሬ ጋርሳን ዲዛ ኬꬃቲ ባይዜቲዳፔ ጉዬ ጎሻ ቢታ ማላ ቆዴቲዲ ኬꬃ ጎዳይ ዛሪ ዎዛናስ ዳንዳዬስ።

32 « ‹ጊዶ ኣቲን ሌዌ ናይቲ ባስ ኢሜቲዳ ካታማታን ዲዛ ባ ኬꬃታ ባ ኮዪዳ ኣይ ዎዴካ ዎዛናስ ዳንዳዬቴስ። 33 ሃይቲ ካታማታን ኢሲ ሌዌ ቆሞይ ኬꬅ ባይዚኮ ቃሴ ዛሪ ዎዛናስ ኢዚ ዳንዳዮንታ ኣጊኮ ባይዜቲዳ ሚሽ ዎዞ ላይꬃን ኢዛስ ሲሞ፤ ጋሶይካ ሌዌ ቆሞቲ ባ ካታማታን ኬጺዳ ኬꬃቲ ኢስራኤሌ ናይታ ጊዶን ኣይ ዎዴ ጋካናስካ ኢስታሳ። 34 ቃሴካ ኢስቲ ካታማታ ዩሾን ዲዛ ሜሄይ ሄሜቲዛ ቢታይ ሙሌካ ባይዜቶፎ፤ ሄ ቢታይ ኣይ ዎዴካ ኢስታሳ።

35 « ‹ኔ ባጋ ኢስራኤሌ ኣሳፔ ኢሳዴይ ማንቂዲ ባና ኣይሳናስ ዳንዳዮንታዴ ጊዲኮ ኢማꬃ ጊዲዳ ዎይኮ ቤቴ ኣሲ ኔ ኣቻን ዳና ማላ ኔ ማዲዛይሳꬆ ኢዛካ ማዳ። [b] 36 ኔ ባጋ ጊዲዳ ኢስራኤሌ ኣሲ ኔናራ ዳና ማላ ኢዛፔ ዲች ሞፓ፤ ኔ ጾሳስ ያያ። 37 ኔ ኢዛስ ታልኤ ኢሚኮ ኢዛፔ ዲች ኦይቾፋ፤ ኔ ካꬅ ኢዛስ ዎꬌራ ባይዞፓ። [c] 38 ኔና ካናኔ ቢታ ላቲሳናስ ኔስ ጎዳ ጊዳናስ ጊብጼ ቢታፌ ኬሲዳ ጾሳይ ታና።

39 « ‹ኔ ባጋ ጊዲዳ ኢስራኤሌ ኣሳፔ ኢሳዴይ ማንቆቴꬃፌ ዴንዲዳይሳን ኣይሌ ማላ ኔስ ሃሬታናስ ባና ባይዚኮ ኔ ኢዛ ኣይሌ ማላ ኦሲሶፓ። 40 ኔ ኢዛ ኔ ማታን ዲዛ ኢማꬃ ማላ ዎይኮ ሚሻስ ኦꬂዛ ኦሳንቻ ማላ ቆዳ፤ ኢዚካ ኢቻሹ ታሙ ላይꬅ ጋካናስ ኔስ ኦꬆ። 41 ሄሳፌ ጉዬ ባ ናይታራ ኔፔ ሻኬቲ ጌዴ ባሶ ኣሳኮኔ ባ ዱሳሶ ሲሞ። 42 ኢስራኤሌ ኣሳ ታ ጊብጼ ቢታፌ ኬሲዳ ታ ኦሳንቻታ ጊዲዳ ጊሻስ ኢስቲ ኣይሌ ማላ ባይዜቶፌቶ። 43 ኔ ኢስታ ዎልቃራ ሃሮፓ፤ ኔ ጾሳስ ያያ።

44 « ‹ኔስ ኣቱማኔ ማጫ ኣይሌቲ ዴኣና ማላ ኮይኮ ኔ ዩሾን ዲዛ ኣይዛቤታ ጊዶፌ ሻማ ኤካ። 45 ቃሴካ ኢንቴ ቢታን ዲዛ ቤቴ ኣሳታፔኔ ኢንቴ ቢታን ዬሌቲዳ ኣሳታፔ ሻማናስ ዳንዳዬታ፤ ኢስቲ ኢንቴስ ሃሮ ጊዴቶ። 46 ሄይታን ኢንቴ ኢንቴ ናይታ ላቲሳናስ ዳንዳዬታ፤ ኢስቲ ዴኢዛ ላይꬃ ኡባን ኢንቴ ናይታስ ኦꬂዛይታ ጊዳና፤ ኢንቴ ቆሞ ጊዲዳ ኢስራኤሌ ኣስ ዎልቃራ ሃሮፒቴ። [d]

47 « ‹ኢንቴ ጊዶን ዲዛ ሃራ ዴሬ ኣሳፔ ኢሳዴይ ዱሬ ጊዲኮ ኢንቴ ባጋ ጊዲዳ ኢስራኤሌ ናይታፔ ማንቆ ጊዲዳይ ባና ሃራ ዴሬ ዱሬስ ዎይኮ ኢዛሶ ኣሳፔ ኢሳዴስ ባና ኣይሌቴꬃስ ኣꬂ ኢሚኮ፥ 48 ኢዚ ባይዜቲዳፔ ጉዬ ሲሚዲ ናምኣንꬆ ዎዜታናስ ዳንዳዬስ፤ ሄሳ ጊሻስ ኢዛ ኢሻታፔ ኢሳዴይ ኢዛ ዎዞ። 49 ኢዛ ኣዋ ኢሻይ ዎይኮ ኢዛ ኣዋ ኢሻ ናይ ዎይኮ ኢዛስ ማታ ዳቦታፔ ኢሳዴይ ኢዛ ዛሪ ዎዛናስ ዳንዳዬስ፤ ኢዛዴይ ባስ ጊዲዛ ሚሼ ሺሺዳ ጊዲኮ ባ ሚሻራ ዎዜታናስ ዳንዳዬስ። 50 ኢዚ ባና ሃሪዳዴራ ኢሲፌ ጊዲዲ ኢዚ ባና ባርካ ባይዚዳ ላይꬃፌ ዶሚዲ ዎዜቴꬃ ላይꬃ ጋካናስ ዲዛ ላይꬃ ቆዶ፤ ኢዛ ዎዚሲዛ ሚሻይ ሄ ላይꬃታ ቆዳ ጊዶ፤ ኢዚ ባና ሃሪዛይሳራ ጋምኢዳ ዎዴ ዋጋይ ኢሲ ኣሲ ኦꬂዲ ዴሚዛ ኪራ ሚሻ ኬና ጊዶ። 51 ዎዞ ላይꬃይ ጋካናስ ቡሮ ዳሮ ላይꬃቲ ኣቲዳ ጊዲኮ ባ ባይዜቲዳ ዋጋፔ ሄ ኣቲዳ ላይꬃ ቆዳን ባና ዎዚዛ ዋጋ ቃንጾ። 52 ሄ ኣቲዳ ላይꬃቲ ጉꬅ ጊዲኮ ባ ሃሬቲን ኣቲዳ ላይꬃ ቆዲዲ ባና ዎዚዛ ዋጋ ቃንጾ። 53 ኢዚ ላይꬃፌ ላይꬅ ጋካናስ ኡኔ [e] ኦꬂዛ ኣሳ ማላ ባና ሃሪዳዴራ ዴኦፔ ኣቲን ኢዛ ዎልቃራ ሃራናስ ቤሴና።

54 « ‹ሄሳꬆ ሃኒዲ ዎዜታናስ ዳንዳዮንታ ኣጊኮ ሲንꬃፌ ያና ኣይሌቴꬃፌ ዎዜቲዛ ላይꬃን ኢዚኔ ኢዛ ናይቲ ሜላ ዬዴቴቶ። 55 ኢስራኤሌ ኣሳይ ታስ ኣይሌታኔ ታኒ ጊብጼ ቢታፌ ኬሲዳ ታ ኦሳንቻታ፤ ታኒ ጎዳ ኢንቴ ጾሳ።

<- ሌዌታ 24ሌዌታ 26 ->