1 ኣሮኔ ኣቱማ ና ናምኣቲ ቤሶንታ ታማ ጎዳ ሲንꬅ ኤኪ ሺቂዳ ጊሻስ ሃይቂዳ፤ ሄሳፌ ጉዬ ጎዳይ ሙሴስ ሂዝጊዴስ፥ 2 «ኔ ኢሻ ኣሮኔይ ታቦታ ቦላን ዲዛ ኣቶ ጊዛሶዛ ካሚዛይሳ ሲንꬃን ማጋላሻፔ ጉዬ ባጋራ ዲዛ ኬሂ ዱማ ጌቴቲዛሶዛ ባ ሼኔ ማላ ኡባ ዎዴ ጌሎንታ ማላ ኢዛስ ዮታ፤ ኢዚ ኡባ ዎዴ ባ ሼኔን ጌሊዛ ጊዲኮ ሃይቃና፤ ጋሶይካ ታኒ ሻራ ጊዶራ ኣቶ ጊዛሶዛ ካማ ቦላ ቆንጫይስ። [a]

3 «ኣሮኔይ ናጋራፔ ማሬꬂዛ ያርሾስ ኢሲ ሚርጎ ቦራኔ ቃሴ ጹጌቲዛ ያርሾስ ኢሲ ꬋርሾ ኤኪዲ ኬሂ ዱማ ጌቴቲዛሶዛ ጌሎ። [b] 4 ኣሮኔይ ኬሂ ዱማ ጌቴቲዛሶ ጌላናፔ ካሴ ማይኦቲ ዱማ ጊዲዳ ጊሻስ ባ ቦላ ሜጬቲዲ ቄሴቴꬃ ማይኦ ማይኦ፤ ሄሲካ ላይኖፔ ኦሴቲዳ ቃሚሳኔ ሱሬ ማይኦ፤ ሄሳꬆካ ላይኖፔ ኦሴቲዳ ቃባቶን ጊጾ፤ ላይኖፔ ኦሴቲዳ ጎሴካ ጎዞ።

5 «ኢስራኤሌ ናይታ ማባራይ ናጋራ ጊሻስ ሺሺዛ ያርሾስ ናምኡ ዴይሻ ኦርጌኔ ጹጌቲዛ ያርሾስ ኢሲ ꬋርሾ ኣሮኔስ ኤሄቶ። 6 ኣሮኔይ ባሲኔ ባሶ ኣሳ ናጋራ ዉርሳናስ ኢሲ ኮርማ ቦራ ያርሾስ ሺሾ። 7 ሄሳፌ ጉዬ ሄ ናምኡ ዴይሻ ኦርጌታ ጌዴ ጋይቶቴꬃ ዱንካኔዛ ፔንጌን ጎዳ ሲንꬅ ኤፎ። 8 ሂስቲዲ ሄ ናምኡ ኦርጌታ ቦላ ኢዚ ሳማ ዬጎ፤ ሄይታፔ ኢሶይ፥ ‹ጎዳ› ናምኣንꬆዚ፥ ‹ኣዛዜሌ›[c] ጊዛ ማላታይ ዲዛ ሹቻታ ኦርጌታ ቦላ ዬጎ። 9 ጎዳስ ጊዛ ማላታይ ኢዛ ቦላ ዎꬊዳ ዴይሻዛ ናጋራፔ ጌሺዛ ያርሾስ ሹኮ። 10 ኣዛዜሌስ ጊዛ ማላታይ ኢዛ ቦላ ዎꬊዳ ዴይሻዚ ሹኬቶንታ ፓጻ ጎዳስ ሺቆ፤ ዴሬዛ ናጋራ ቶኪዲ ዱጌ ባዞ ዬዴቶ።

11 «ኣሮኔይካ ኮርማ ቦራዛ ባ ናጋራ ዉርሳናሲኔ ባሶ ኣሳ ናጋራ ዉርሳናስ ያርሾ ሹኮ። 12 ቃሴ ጎዳ ሲንꬃን ዲዛ ያርሾ ያርሺዛሶፔ ኤጻኔ ጩዋሲዛ ሚሻ [d] ኩሜꬃ ቦንቆኔ ሊቂ ጋጬቲዳ ናምኡ ዞሌ ሳዊዛ ኤጻኔ ኤኪዲ ማጋላሻ ጊዶን ዲዛ ኬሂ ዱማ ጊዲዳ ኪፊሌ ኤሆ። 13 ኤጻኔዛ ሄን ጎዳ ሲንꬃን ታማን ዬጎ፤ ኢዚ ኢዛ ቤኢዲ ሃይቆንታ ማላ ኤጻኔዛ ጩዋይ ታቦታ ካሚዛይሳ ኡባ ጌንꬆ። 14 ኮርማዛ ሱꬃፌ ጉꬃራ ኤኪዲ ኢዛን ባ ቢራꬌ ጌልꬂ ጌልꬂዲ ታቦታ ካማዛ ቦላ ሲንꬃ ባጋራ ኣራጮ፤ ሄሳꬆካ ኢዛፔ ጉꬃራ ጫቆ ቃላ ታቦታ ሲንꬃን ላፑንቶ ዉጾ።

15 «ሄሳፌ ጉዬ ሃንኮ ዴሬዛ ናጋራ ጊሻስ ሹኬቲዛ ዴይሻ ሹኮ፤ ኢዛ ሱꬃ ኬሂ ዱማ ጌቴቲዛ ኪፊሌዛ ጌልꬂዲ ካሴ ኮርማዛ ሱꬃ ኦꬆይሳꬆ ኣቶ ጊዛሶ ታቦታ ካማዛ ቦላኒኔ ኢዛስ ሲንꬃ ባጋራ ላፑንቶ ዉጾ። [e] 16 ሄሳꬆካ ኦꬂዲ ኬሂ ዱማ ጊዲዳ ኪፊሌዛ ኢስራኤሌ ናይታ ቱናቴꬃፌኔ ኢስታ ናጋራ ኡባፌ ጌሻናስ ጌሾ ዎጋ ፖሎ፤ ካሴ ኢስቲ ቱና ሚሽ ኦꬂሺን ኢስታ ጊዶን ዲዛ ጋይቶቴꬃ ዱንካኔዛካ ሄሳꬆ ጌሾ። 17 ጌሾ ዎጋ ፖላናስ ኣሮኔይ ኬሂ ዱማ ጌቴቲዛ ኪፊሌዛ ጌሊዲ ባ ናጋራ ጊሻስ፥ ባሶ ኣሳ ናጋራ ጊሻሲኔ ኢስራኤሌ ዴሬ ናጋራ ጊሻስ ያርሾ ሺሺ ማሪሲዲ ኬዛና ጋካናስ ኣይ ኣሲካ ጋይቶቴꬃ ዱንካኔዛ ጊዶን ዶፖ። 18 ሄሳፌ ካሊዲ ኢዚ ጎዳ ሲንꬃን ያርሾ ያርሺዛሶ ኬዚዲ ጌሾ፤ ኮርማ ሱꬃፌኔ ዴይሻ ሱꬃፌ ጉꬃራ ኤኪዲ ያርሾ ያርሺዛሶዛን ዩዪ ኣꬋናስ ዲዛ ꬌሞታ ቲዮ። 19 ቃሴ ኢስራኤሌ ናይታ ቱናቴꬃፌ ያርሾ ያርሺዛሶዛ ጌሻናሲኔ ዱማሳናስ ሱꬃፌ ጉꬃራ ኤኪዲ ባ ቢራꬌ ጼራን ያርሾ ያርሺዛሶዛ ቦላ ላፑንቶ ዉጾ።

20 «ኣሮኔይ ኬሂ ዱማ ጌቴቲዛሶ፥ ጋይቶቴꬃ ዱንካኔኔ ያርሾ ያርሺዛሶዛ ጌሾ ዎጋ ፖሊዳፔ ጉዬ ሹኬቶንታ ኣቲዳ ባቃ ዴይሻ ኤኪዲ ጎዳስ ሺሾ። 21 ባ ኩሼ ናምኣታ ዴይሻ ሁኤ ቦላ ዎꬂዲ ዴሬዛ ናጋራ፥ ኢታቴꬃኔ ማካላቴꬃ ኡባ ፓጾ፤ ዴይሻዛ ሁኤ ቦላ ዩሺ ፒቲሼ ዴራ ናጋራ ኢዛ ቦላ ዎꬆ፤ ሄሳፌ ጉዬ ካሴ ዴይሻዛ ኤፋናስ ጊጌቲ ኡቲዳዴ ቦላ ዱጌ ባዞ ዬዴቶ። 22 ሄሲካ ዴይሻይ ኣሳ ኡባ ናጋራ ኡባ ቶኪዲ ኣይ ኣሲካ ባይንዳሶ ዱጌ ባዞ ሃሲ ዬዶ።

23 «ኣሮኔይካ ጋይቶቴꬃ ዱንካና ጊዶ ጌሎ፤ ጌዴ ኬሂ ዱማ ጌቴቲዛ ኪፊሌዛ ጌላናፔ ካሴቲዲ ኢዚ ካሴ ማይኢዳ ቄሴቴꬃ ማይኦዛ ሄን ቃሪ ዎꬆ።[f] 24 ባ ቦላ ሄን ጌሻሶሆን ሜጬቲዲ ባ ካሴ ማይኢዛ ማይኦ፤ ሄፔ ኬዚዲ ባ ናጋራ ዉርሳናሲኔ ዴራ ናጋራ ዉርሳናስ ጹጌቲዛ ያርሾ ሺሾ። 25 ናጋራ ዉርሳናስ ሺቂዳ ሜሄዛ ሞꬌ ያርሾ ያርሺዛሶዛ ቦላ ጹጎ።

26 «ባዞ ዬዴቲዛ ዴይሻ ዱጌ ባዞ ላጊ ኤፊዳዴይ ጉዬ ኣሳይ ዲዛሶ ሲሚ ጌላናፔ ካሴቲዲ ባ ማይኦ ሜጮ፤ ባ ቦላካ ሜጬቶ፤ ሄሳፌ ጉዬ ኣሳይ ዲዛሶ ጌሎ። 27 ናጋራ ጊሻስ ያርሼታና ሺቂዳይታኔ ናጋራ ጌሻናስ ኢስታ ሱꬂ ኬሂ ዱማ ኪፊሌ ጌቴቲዛሶ ጌሊዳ ኮርማዛኔ ዴይሻዛ ኣሾይ፥ ጋልባዚኔ ቶጬይ ኣቶንታ ኣሲ ዲዛሶፔ ጌዴ ሃራሶ ቢዲ ጹጌቶ። 28 ሄሳ ኡባ ጹጊዛዴይ ጹጊዲ ኣሲ ዲዛሶ ሲሚ ጌላናፔ ካሴቲዲ ባ ማይኦ ሃꬃን ሜጮ፤ ባ ቦላካ ሜጬቶ።

29 «ሃይሳፌ ካሊዲ ኢንቴስ ኢሜቲዛ ዎጋታ ሃይሳፌ ጉዬ ያና ላይꬃታን ኡባን ላሜቶንታ ኤቂ ዲዛ ዎጋ ሂስቲዲ ናጊቴ፤ ላይꬃፌ ላፑንꬃ ኣጊናይ ጌሊዳ ታማንꬆ ጋላስ ኢስራኤሌ ዴሬ ኣሳይኔ ኢስታ ጋርሳን ዲዛ ሃራ ዴሬ ኣሳይ ጾማ ጾማናስ ቤሴስ፤ ሄ ጋላስ ኣይ ኦሶይካ ኦሴቶፎ። [g] 30 ሄ ጋላስ ኢንቴ ናጋራይ ኪቻና ማላኔ ኢንቴ ጌያና ማላ ጌሾ ዎጋይ ፖሌቲዛ ጊሻስ ኢንቴ ጎዳ ሲንꬃን ኢንቴ ናጋራ ኡባፌ ጌዪዳይታ ጊዳና። 31 ሄ ጋላሳይ ጾማ ጋላሲኔ ሼምፖ ሼምፒዛ ሳምባታ ጋላስ ጊዶ፤ ሄሲካ ሜርና ዎጋ ጊዶ፤ 32 ባ ኣዋ ሶሆን ቄሴታ ሃላቃ ጊዳናስ ቲዬቲዳኔ ሹሜቲዳ ቄሴይ ናጋራ ኡባ ዎጋ ፖላናስ ባ ቄሴቴꬃ ማይኦዛ ማይኢዲ ፖሎ። 33 ኢዚካ ኬሂ ዱማ ኪፊሌዛ፥ ያርሾ ያርሺዛሶዛ፥ ጋይቶቴꬃ ዱንካኔዛ፤ ቄሴታኔ ኢስራኤሌ ኣሳ ኡባ ናጋራ ዉርሶ። 34 ኢስራኤሌ ኣሳ ናጋራ ኡባ ዎጋ ኢንቴ ላይꬃን ላይꬃን ኢሲቶ ፖላና ማላ ሄሲ ኢንቴስ ሜርናስ ላሜቶንታ ዎጋ ጊዶ።»

ሄሳꬆ ጎዳይ ኢዛ ኣዛዚዳ ማላ ሙሴይ ኦꬂዴስ።

<- ሌዌታ 15ሌዌታ 17 ->