53
1 ዴሬዚ፥ «ኑኒ ዮቲዳይሳ
ኦኔ ኣማኒዳይ?
ጎዳ ቄሴይ ኦናስ ቆንጪዴ?[a]
2 ኢዚ ኢዛ ሲንꬃን ጫሬቻ ማላ፥
ሜላ ቢታፌ ሞኪዛ
ጻጶ ማላ ሞኪዴስ፤
ኑ ኢዛ ጼላናስ ሺጫቴꬂ
ዎይኮ ቴማይ ዴና፤
ኑ ኢዛ ዶሳናስ
ኢዛ ማላይ ሎኤና።
3 ኢዚ ኣሳን ካꬌቲዳዴኔ
ኢጼቲዳዴ፤
ኢዚ ሃርጌፌኔ ሜቶፔ
ሻኬቲ ኤሮንታ ኣሳ፤
ኢዚ ኣሲ ኢዛ ቤኣናፔ
ባ ኣይፌሶ ሃራሶ ዛሪዛ ኣሳ ማላ
ካꬌቲዳዴ ጊዲዴስ፤
ኑኒካ ኢዛ ቦንቺቤኮ።
4 «ቱሙካ ኢዚ ኑ ሃርጌ
ባስ ኤኪዴስ፤
ቃሴ ኑ ሳኮካ ኢዚ ቶኪዴስ።
ኑኒ ጊዲኮ ኢዛ ጋኪዳ ሜቶይ፥
ዴሼቴꬃይኔ ዋዬይ
ጾሳፌ ኢዛስ ኢሜቲዳዛ
ጊዲ ቆፒዶስ። [b]
5 ጊዶ ኣቲን ኢዚ
ኑ ሞሮ ጊሻስ ጫዴቲዴስ፤
ኑ ቆሆ ጊሻስ ሊቂዴስ፤
ኢዛ ቦላ ዎꬊዳ ቂጻቴይ
ኑስ ሳሮ ኤሂዴስ፤
ኢዛ ማዱንꬃን ኑ ፓጺዶስ። [c]
6 ኑኒ ኡባይ ዶርሳ ማላ
ቶይላቲ ꬋይዶስ፤
ኑኒ ኢሶይ ኢሶይ ኑ ኦጌ ቢዶስ፤
ጎዳይ ኑ ኡባ ቆሆ
ኢዛ ቦላ ዎꬂዴስ።[d]
7 «ኢዚ ኡንኤቲዴሲኔ ዋዬቲዴስ፤
ጊዶ ኣቲን ዶናካ ፖጊቤና።
ዶርሳ ላቃ ማላ
ሹኬታናስ ላጌቲዴስ፤
ባ ኢስኬ ቃንጺዛይታ ሲንꬃን
ጮኡ ጊዛ ዶርሳ ማላ
ኢዚ ዶናካ ጶቂቤና። [e]
8 ኢዛ ሜቶꬆኒኔ ፒርዳን ኤፊዳ፤
ኢዚ ታ ዴራ ሞሮ ጊሻስ
ዴሼቲዲ፥ ፓጻይ ዲዛ ቢታፌ
ዲጌቲዳይሳ ኢዛ ዜሬꬃፌ
ኣኬኪዳይ ኦኔ?[f]
9 ኢዚ ኣይኮ ጌኔ ሃሳዮንታ፥
ኣይ ሞሮካ ኦꬆንታ፥
ኢዛ ሃይቆይ ኢታታራ
ኢሲፌ ቆዴቲዴስ፤
ጊዶ ኣቲን ኢዚ ዱሬታ
ዱፎን ሞጌቲዴስ። [g]
10 «ኢዛ ሊቄꬂኔ ዋዬዚ
ጎዳ ሼኔ ጊዲዴስ፤
ጎዳይ ኢዛ ሼምፖ
ናጋራ ያርሾ ኦꬂኮካ
ኢዚ ባ ዜሬꬃ ቤኣና፤
ጎዳ ሼኔይ
ኢዛ ኩሼን ፖሌታና።
11 ኢዛ ሼምፖይ ዋዬቲዳፔ ጉዬ
ኢዚ ዴኦ ፖኦ
ቤኣናኔ ኡፋዬታና።
ታ ጺሎ ኣይሌዚ ባ ኤራቴꬃን
ዳሮታ ጺሊሳና፤
ኢስታ ሞሮካ ቶካና።
12 ሄሳ ጊሻስ ኢዛ ጋኪዛ ጊሻ
ጊታ ኣሳታ ጊሻራ ኢሲፌ ሂስታና፤
ዲኢ ኤሂዳይሳ ዎልቃማታራ
ኢዚ ኢሲፌ ጊሼታና፤
ኢዚ ባ ሼምፖ
ሃይቆስ ኣꬂ ኢሚዲ፥
ኢታ ኦꬂዛይታራ
ኢሲፌ ቆዴቲዳ ጊሻስ፥
ዳሮታ ናጋራ ቶኪዴስ፤
ቆሂዳይታ ጊሻስ