1 ኣሲ ቢታ ቦላ ዳሪዳ ዎዴ ኣሳስ ማጫ ናይቲ ዬሌቲዳ፤ [a] 2 «ጾሳ ናይታ» ጌቴቲዛ ሜꬌቴꬃቲ ኣሳ ማጫ ናይቲ ሜꬎ ሎኦ ጊዲዳይሳ ቤኢዲ ኢስታፌ ባ ዶሪዳይታ ማቾ ኤኪዳ። [b] 3 ጎዳይ፥ «ኣሲ ሃይቂዛዛ፤ ኢዛ ላይꬃይካ 120 ላይꬃፌ ዳሬና፤ ሄሳ ጊሻስ ታ ኣያናይ ኣሳ ና ቦላ ሜርናስ ዴና» ጊዴስ። 4 ሄ ዎዴኔ ሄሳፌ ጉዬ ጾሳ ናይቲ ኣሳ ማጫ ናይታ ማቾ ኤኪን ናይቲ ዬሌቲዳ ዎዴ ዎጋ ዎልቃማ ኣሳቲ ቢታ ቦላን ዴቴስ። ኢስቲካ ቤኒ ዎዴ ኦላስ ሚኖኔ ኤሬቲዳ ኣሳ። [c]

5 ጎዳይ ሄ ዎዴ ቢታ ቦላን ዲዛ ኣሳ ኢታቴꬂ ዳሪዳይሳኔ ኢስቲ ባ ዎዚናን ቆፒዛይሲ ዉሪ ኡባ ዎዴካ ኢታ ጻላላ ጊዲዳይሳ ቤኢዴስ፤ [d] 6 ጎዳይ ኣስ ሃ ቢታ ቦላን ሜꬊዳ ጊሻስ ሞꬌቲዴስ፤ ባ ዎዚናን ኬሂ ሴሌቲዴስ። 7 ሄሳ ጊሻስ ጎዳይ፥ «ታኒ ሜꬊዳ ኣሳ ሃ ቢታ ቦላፌ ኡባ ꬋይሳና፤ ኣሳ፥ ሜሄ፥ ዶኣ፥ ቢታራ ጎሼቲዛ ሜꬌቴꬃታኔ ካፎታ ꬋይሳና፤ ኣይስ ጊኮ ታኒ ኢስታ ሜꬊዳ ጊሻስ ሚሼታዲስ» ጊዴስ። 8 ጊዶ ኣቲን ኖሄይ ጎዳ ሲንꬃን ሳቤቲዴስ።

9 ኖሄይ ሃኒዳይሲ ሃይሳፌ ካሊዲ ጻፌቲዴስ። ኖሄይ ጺሎ ኣሳ፤ ኢዚ ባ ዎዴን ዲዛ ኣሳ ጊዶን ሱሬ ኣሳ፤ ኖሄይ ጾሳራ ጊጋ ዱስ ዴኢዴስ። [e] 10 ኖሄይ ሴሜ፥ ካሜኔ ያፌቴ ጌቴቲዛ ሄꬑ ኣቱማ ናይታ ዬሊዴስ።

11 ሄ ዎዴ ቢታ ቦላ ዲዛ ኣሲ ዉሪ ጾሳ ሲንꬃን ቱኒዴስ፤ ቢታይ ዉሪ ማካላን ኩሚዴስ። 12 ጾሲ ዱጌ ቢታ ጼሊሺን ቢታ ቦላ ዲዛ ኣሳይ ዉሪ ቱኒዳይሳ ቤኢዴስ።

13 ሄሳ ጊሻስ ጾሲ ኖሄ፥ «ታኒ ኣሳ ኡባ ꬋይሳና ጋይስ፤ ኣሳ ጋሶን ቢታይ ማካላን ኩሚዳ ጊሻስ ታኒ ቱማፔ ኣሳኔ ቢታ ቦላ ዲዛዝ ኡባ ꬋይሳና። 14 ሄሳ ጊሻስ ሚኖ ሚꬃፌ ኔስ ማርካቤ ኬጻ፤ ሄ ማርካቤዛ ጊዶን ኪፊሌ ኦꬃ፤ ሂስታዳ ሶ ባጋራኔ ካሬ ባጋራ ሺዳን ሜሻ። 15 ማርካቤዛ ኬጻሼ ኢዛ ኣዱሳቴꬂ 300 ዋꬋ፥ ጎምፓይ 50 ዋꬋ፥ ፑዴ ꬎቃቴꬂ 133 ዋꬋ ሂስታ ኦꬃ። 16 ማርካቤዛስ ካራ ሜꬋ፤ ካራፔኔ ጎዳፔ ጊዶን ኢሲ ዋꬋ ጊዲዛሶ ዶያ ኣጋ፤ ፔንጌዛ ማርካቤዛስ ሚሌራ ኬሳ፤ ማርካቤዛ ሄꬑ ፖቄ ኬሳ ኬጻ።

17 «ታኒ ሳሎፔ ጋርሳን ሼምፖራ ዲዛ ሜꬌቴꬃ ኡባ ꬋይሳናስ ሃ ቢታ ቦላን ꬋይሳ ሃꬅ ዬዲኮ ቢታን ዲዛይሲ ዉሪ ꬋያና። 18 ጊዶ ኣቲን ታኒ ኔናራ ጫቄታና። ኔኒ፥ ኔ ማቺያ፥ ኔ ናይቲኔ ኔ ናይታ ማቼቲ ኔናራ ማርካቤዛን ጌላንዴታ። 19 ኢስቲ ኔናራ ፓጻ ዳና ማላ ሼምፖራ ዲዛ ሜꬌቴꬃ ኡባፌ ቆሞን ቆሞን ኣዴኔ ማጫ ናምኡ ናምኡ ሂስታዳ ማርካቤዛ ጊዶ ጌልꬃ። 20 ዱማ ዱማ ቆሞ ካፎታፔ፥ ዱማ ዱማ ቆሞ ሜሄታፔኔ ቢታራ ጎሼቲዛ ዱማ ዱማ ቆሞ ሜꬌቴꬃታፔ ኡባፌ ናምኡ ናምኡ ጊዲዲ ሼምፖራ ፓጻ ኣታና ማላ ኔኮ ያና። 21 ቃሴ ኔኒኔ ኔናራ ዲዛይቲ ማና ማላ ዱማ ዱማ ቆሞ ካꬅ ኤፋዳ ማርካቤዛ ጊዶ ጌልꬃ» ጊ ኣዛዚዴስ።

22 ኖሄይ ኡባካ ጾሲ ኣዛዚዳ ማላ ኦꬂዴስ።[f]

<- ሜꬌቴꬃ 5ሜꬌቴꬃ 7 ->