1 ሄሳፌ ጉዬ ሄ ቢታኔይ ታና ኣርሼ ኬሳ ባጋ ጼሊዛ ፔንጌኮ ኤሂዴስ። 2 ታኒ ኢስራኤሌ ጾሳ ቦንቾይ ኣርሼ ኬሳ ባጋፌ ዪዛይሳ ቤያዲስ። ኢዛ ዩሳ ጬንጉርሳይ ዳሮ ኪጻ ሃꬃ ጉንꬃ ማላ፤ ቃሴ ቢታይካ ኢዛ ቦንቾን ፖኢዴስ። [a] 3 ታኒ ቤኢዳ ኣጁታይ ካሴ ጎዳይ ዬሩሳላሜ ካታማ ꬋይሳናስ ዪዳ ዎዴ ቤኢዳ ኣጁታ ሚሳቴስ፤ ቃሴ ኮቦሬ ሻፋ ማታን ታኒ ቤኢዳ ኣጁታካ ሚሳቴስ። ሄሳ ቤያዳ ታኒ ሲንꬃ ጉꬅ ጉፋናዲስ። 4 ጎዳ ቦንቾይ ኣርሼ ኬሳ ጼሊዛ ፔንጌራ ጾሳ ኬꬃ ጊዶ ጌሊዴስ። 5 ሄ ዎዴ ጎዳ ኣያናይ ታና ፑዴ ዴንꬂዲ ጊዶ ዳባባ ጌልꬂዴስ፤ ሄኮ ጎዳ ቦንቾይ ጾሳ ኬꬃ ኩሚዴስ።

6 ሄሳን ሄ ቢታኔይ ታ ሚሌን ኤቂ ዲሺን ኢሶይ ጾሳ ኬꬃ ጊዶፌ ታስ ሃሳይሺን ታ ሲያዲስ። 7 ኢዚ «ሃይሶ ኣሳ ናዉ፥ ሃይሲ ታ ኣልጋ ሶሆኔ ታ ቶሆይ ዬꬊዛ ሶሆ። ታኒ ኢስራኤሌ ኣሳ ጊዶን ሜርናስ ዳና። ሃይሳፌ ጉዬ ኢስራኤሌ ኣስ ጊዲን፥ ኢስታ ካዎቴꬃ ጊዲን፥ ሃራ ጾሳታስ ጎይኒዲ ዎይኮ ሼምፖይ ባይንዳ ባንታ ካዎታ ሃዉልቴ ጎይኖን ታ ጌሻ ሱንꬃ ቱኒሴቴና። 8 ዋኒዲ ጊኮ፥ ኢሲ ጎዳ ጻላላይ ታናኔ ኢስታኔ ሻኪን፥ ባንታ ፔንጌ ታይሳ ሚሌን፥ ባንታ ፔንጌ ሚꬃካ ታይሳ ሚሌን ዎꬂዳ። ሂስቲዲ ባንታ ሼኔሲዛ ኦሶን ታ ጌሻ ሱንꬃ ቱኒሲዳ። ሄሳ ጊሻስ ታኒ ታ ሃንቆን ኢስታ ꬋይሳዲስ። 9 ሃኢ ሲሚ ሃራ ጾሳታስ ጎይኒዛይሳ ኣጌቶ፤ ባንታ ካዎታ ሃዉልቴካ ታ ኣቻፌ ዲጌቶ። ሂስቲኮ ታኒ ኢስታ ጊዶን ሜርናስ ዳና።»

10 «ሃይሶ ኣሳ ናዉ፥ ታኒ ኔና ቤሲዳ ጾሳ ኬꬃ ኢስራኤሌ ኣሳስ ዮታ፤ ኢስቲ ባንቲ ኦꬂዳ ናጋራን ዬላታና ማላ፥ ኢዛ ሜꬋዛኔ ኢዚ ኬጼቲዳ ማራ ኢስታስ ዮታ። 11 ኢስቲ ባንቲ ኦꬂዳይሳን ዬላቲዛይታ ጊዲኮ፥ ጾሳ ኬꬃ ሜꬋ፥ ኢዚ ኬጼቲዳ ማራ፥ ኬዚዛ ሶሆታ፥ ጌሊዛ ሶሆታኔ ኢዛ ኩሜꬃ ሚስሌ ኢስታስ ቆንጪሳ። ሄሳንካ ቃሴ ኢዛ ዎጋ ኡባኔ ኢዛ ማራ ኡባ ኢስታ ኤሪሳ። ቃሴ ሄ ኬꬃይ ዋኒ ኬጼቲዳኮ፥ ኢስቲ ዎጋ ኡባ ናጋናሲኔ ፖላናስ ዳንዳያና ማላ ኔኒ ኢስቲ ጼሊሺን ጻፋ። 12 ጾሳ ኬꬃ ዎጋይ ሃይሳ፡ ጾሳ ኬꬃይ ኬጼቲዳ ዴሬ ሁኤይኔ ኢዛ ዩሾን ዲዛ ሄራይ ኡባይ ኡባፌ ኣꬊዳ ጌሻ ጊዳና። ኤ፥ ጾሳ ኬꬃ ዎጋይ ሃይሳ።

13 «ያርሺዛሶይ ካሴ ጾሳ ኬꬃ ዋꬊዛይሳንካ፥ ኢሲ ዋꬋ ቦላ ኦይዱ ቢራꬌታ ጉጂዳ፥ ኣዱሳ ዋꬋን ዋꬌቲዴስ። ያርሺዛሶዛ ባሳ ዩሾን ኢሲ ዋꬋ ዚቂዛይሳኔ ኢሲ ዋꬋ ኣኪዛ ኦላይ ዴስ፤ ሄ ኦላስ ካሬ ባጋ ዶና ዩሾይ ኢሲ ታꬋኮ ኣኬስ። ያርሺዛሶዛ ꬎቃቴꬃይ ሃይሳ ማላ፡ [b] 14 ባሳፔ ቢዲ ኮይሮ ዩሾ ጋካናስ ናምኡ ዋꬋ፤ ናምኣንꬆ ዩሾይ ኢሲ ዋꬋ ሶኮ ሺቂ ዶሚዲ ኦይዱ ዋꬋ ꬎቄስ፤ ቃሴካ ኢሲ ዋꬋ ጊዶ ሺቂዲ፥ 15 ያርሾይ ጹጌቲዛ ጮጬይ ዲዛ ሄꬓንꬆ ዩሾይ ኦይዱ ዋꬋ ꬎቄስ። ኢዚ ኦይዱ ዞዜ ጊዲዲ፥ ኦይዱ ጉላንካ ኢሲ ኢሲ ካጬይ ዴስ። 16 ያርሾ ጹጊዛ ጮጬይ ኦይዱ ዞዜ ጊዲዲ፥ ኣዱሳቴꬃይ ታማኔ ናምኡ ዋꬋ፥ ኣሆቴꬃይካ ታማኔ ናምኡ ዋꬋ። 17 ሄሳꬆካ ናምኣንꬆ ኬቻይ ኦይዱ ባጋራ ጊና ጊዲዲ ኣዱሳቴꬃይ 14 ዋꬋ፥ ኣሆቴꬃይካ 14 ዋꬋ። ኢዛስ ባጋ ዋꬋ ዞዜይኔ ዩዪ ኣꬋናስ ኢሲ ዋꬋ ኦላይ ዴስ፤ ያርሺዛሶዛ ꬌካቲ ኣርሼይ ሞኪዛሶ ባጋ ጊናን ዴቴስ» ጊዴስ።

18 ቃሴካ ኢዚ ታና፥ «ሃይሶ ኣሳ ናዉ፥ ኡባ ሃሪዛ ጎዳይ፥ ‹ያርሺዛሶ ዎጋይ ሃይሳ። ጹጊዛ ያርሾ ያርሻናሲኔ ሱꬃ ኣራጫናስ፥ ያርሺዛሶ ጊምቢዲ ፖሊዛ ጋላስ፥ 19 ታኮ ሺቂዲ፥ ታስ ኦꬂዛ ሳዶቄ ዛሬፔ ዬሌቲዳ ሌዌ ዛሬ ቄሴታስ ናጋራ ያርሾ ኦꬃዳ ኢሲ ዎፋኖ ኢማ። ታኒ ኡባ ሃሪዛ ጎዳይ ሃይሳ ዮታይስ። 20 ኔኒ ሄ ሱꬃፌ ኤካዳ፥ ኦይዱ ካጬታ፥ ናምኣንꬆ ዩሾ ኦይዱ ዞዜዛኔ ሄ ዩሾስ ጋጻ ቲያ። ሄሳ ማላ ኦꬃዳ ያርሺዛሶዛ ቱናቴꬃፌ ጌሻ። 21 ቃሴ ናጋራ ያርሾስ ኢሜቲዳ ሄ ዎፋና ኤካዳ፥ ጾሳ ኬꬃ ጊዲዲ፥ ጌሻ ሶሆፔ ካሬ ባጋራ ኢዛስ ኣዛዜቲዳ ሶሆን ጹጋ።

22 « ‹ዎንቴꬃ ጋላስ ቦሬይ ባይንዳ ዲዛ ኢሲ ዴይሻ ኦርጌ ኤካዳ ናጋራ ያርሾስ ያርሻ። ካሴ ዎፋኖዛ ሱꬃን ጌሺዳ ማላ፥ ሄ ዴይሻ ኦርጌዛ ሱꬃን ያርሺዛሶ ጌሻ። 23 ሂስታዳ ቦሬይ ባይንዳ ዲዛ ኢሲ ዎፋኖኔ ቦሬይ ባይንዳ ዲዛ ኢሲ ꬋርሾ ኤካዳ፥ 24 ናምኣካ ጎዳ ሲንꬅ ሺሻ። ሂስቲዳፔ ጉዬ ቄሴቲ ኢስታ ቦላ ማጺኔ ዬጊዲ ጎዳስ ጹጌቲዛ ያርሾ ሂስቲ ያርሼቶ።

25 « ‹ላፑን ጋላስ ኩሜꬅ፥ ሃች ሃች ኢሲ ዴይሻ ኦርጌ ናጋራ ያርሾስ፥ ቃሴ ኢዛ ቦላ ቦሬይ ባይንዳ ዎፋኖኔ ኢሲ ꬋርሾ ሺሻ። 26 ቄሴቲ ላፑን ጋላስ ኩሜꬅ ያርሺዛሶዛ ቱናቴꬃፌ ጌሼቶ። ሂስቲዲ ጎዳስ ኢዛ ዱማሴቶ። 27 ሃ ጋላሳቲ ዉሪዛ ዎዴ፥ ኦስፑንꬃ ጋላሳፌ ዶሚዲ፥ ቄሴቲ ኢንቴ ጹጌቲዛ ያርሾኔ ኢንቴ ኢሲፌቴꬃ ያርሾ ያርሺዛሶ ቦላን ያርሼቶ። ሄ ዎዴ ታኒ ኢንቴናን ኡፋዬታና። ታኒ ኡባ ሃሪዛ ጎዳይ ሃይሳ ዮታይስ› ጌስ» ጊዴስ። [c]

<- ሂዚቄላ ቲንቢቴ 42ሂዚቄላ ቲንቢቴ 44 ->