ሄሳ ማላ ኣሲ ሼምፖራ ፓጻ ዳኔ? ሙሌካ ዴና! ኢዚ ሃይታ ሃራሲዛ ሚሻታ ኦꬂዳ ጊሻስ ኢዚ ቱሙካ ሃይቃና፤ ባ ሱꬃን ባርካ ኦይሼታና፤ ቱሙካ ሃይቃና።

14 «ሃ ኢታ ኣዴዛ ናዚ ጋኪዲ ና ዬሊኮ ኢዛ ናዚ ካሴ ኣዋይ ኦꬂዳ ናጋራ ኡባ ቤኢዲ ኢዛꬆ ኦꬆንታ ኣጊኮ፥

ኢዚ ሼምፖራ ፓጻ ዳና ኣቲን ባ ኣዋ ናጋራን ሃይቄና። 18 ጊዶ ኣቲን ኢዛ ኣዋይ ኣሳ ማታ ናቂዳ ጊሻስ፥ ባ ኢሻፔ ዎልቃራ ቦንቂ ኤኪዳ ጊሻስ፥ ዴራ ጊዶን ቤሶንታ ሚሽ ኦꬂዳ ጊሻስ ኢዚ ባ ናጋራን ሃይቃና።

19 «ኢንቴ ጊዲኮ፥ ‹ናይ ባ ኣዋ ናጋራን ኣይስ ቃጻዬቴኔ?› ጌታ። ናዚ ሱሬኔ ቱማ ኦꬂዳ ጊሻስ፥ ታ ማራካ ሚንꬂ ናጊዳ ጊሻስ ኢዚ ሼምፖራ ፓጻ ዳና። 20 ሃይቃናስ ቤሲዛይ ናጋራ ኦꬂዳ ሼምፖ። ናይ ባና ዬሊዳይታ ናጋራን ቃጻዬቴና፤ ሄሳ ማላንካ ዬሊዳይቲ ባ ናይታ ናጋራን ቃጻዬቴቴና። ጺሎይ ባ ጺሎቴꬃ ኣይፌ ማና፤ ናጋራንቻይካ ባ ናጋራ ጋቴ ኤካና። [b]

21 «ጊዶ ኣቲን ናጋራንቻይ ባ ኦꬂዳ ናጋራ ኡባፌ ሲሚዲ ታ ማራ ኡባ ናጊኮ፥ ሱሬኔ ቱማ ጊዲዳ ኦሶ ኦꬂኮ ኢዚ ሙሌካ ሼምፖራ ፓጻ ዳናፔ ኣቲን ሃይቄና። 22 ኢዛ ቆሆይ ኡባይ ቆዴቴና። ኢዚ ጺሎቴꬃ ኦጌን ቢዳ ጊሻስ ሼምፖራ ፓጻ ዳና። 23 ቱማፔ ናጋራንቻ ሃይቆን ታ ኡፋዬታዚና? ጌስ ኡባ ሃሪዛ ጎዳይ። ሄሳፌ ቦላራ ኢዚ ባ ቢዛ ኢታ ኦጌፔ ሲሚዲ ሼምፖራ ፓጻ ዲኮ ታና ኡፋይሴኔ?

24 «ጊዶ ኣቲን ጺሎ ኣሲ ባ ጺሎቴꬃፌ ሲሚዲ ናጋራ ኦꬂኮ፥ ናጋራንቻይ ኦꬂዛ ቱና ሚሽ ኦꬂኮ ቱማፔ ኢዛዴይ ሼምፖራ ፓጻ ዳኔ? ኣካይ፤ ኢዚ ኦꬂዳ ጺሎቴꬃፌ ኢሶይካ ኢዛስ ቆዴቴና፤ ኢዚ ኣማኔቶንታ ኢጺዳ ጋሶኒኔ ኢዚ ኦꬂዳ ናጋራ ኡባ ጋሶን ኢዚ ሃይቃና።

25 «ኢንቴ ጊዲኮ፥ ‹ጎዳ ኦጌይ ሱሬ ጊዴና› ጌታ። ኢንቴኖ ኢስራኤሌ ኣሳቶ! ሃኢ ሲዪቴ! ታ ኦጌይ ሱሬ ጊዴኔ? ጌላይ ኢንቴ ኦጌ ጊዴኔ? 26 ጺሎ ኣሲ ባ ጺሎቴꬃፌ ሲሚዲ ናጋራ ኦꬂዛ ዎዴ ባ ናጋራ ጋሶን ሃይቃና፤ ባ ኦꬂዳ ቆሆ ጋሶን ኢዚ ሼምፖራ ፓጻ ዴና። 27 ናጋራንቻይ ጊዲኮ ባ ኢታ ኦሶፔ ሲሚዲ ኣማኔቴꬃን ዲኮ ኢዚ ባ ሼምፖ ኣሻና። 28 ኢዚ ባ ኦꬂዳ ቆሆ ኡባ ዩሺ ኣኬኪዲ፥ ባ ኦꬂዳ ኢታቴꬃ ኦሶ ኡባፌ ሲሚዳ ጊሻስ ኢዚ ሼምፖራ ፓጻ ዳና ኣቲን ሃይቄና። 29 ኢስራኤሌ ኣሳይ ጊዲኮ፥ ‹ጎዳ ኦጌይ ሱሬ ጊዴና› ጊዳ። ኢንቴኖ ኢስራኤሌ ኣሳቶ! ታ ኦጌይ ሱሬ ጊዴኔ? ጌላይ ኢንቴ ኦጌ ጊዴኔ?

30 «ሄሳ ጊሻስ ኢንቴኖ ኢስራኤሌ ኣሳቶ! ሄሳ ጊሻስ ኢንቴ ኦሶ ኦሶ ማላ ታ ኢንቴ ቦላ ፒርዳና፤ ሃኢ ማሮቴꬃን ጌሊቴ፤ ኢንቴ ናጋራን ꬋዮንታ ማላ ኢንቴ ናጋራ ኡባፌ ሲሚቴ። 31 ኢንቴ ታ ቦላ ኦꬂዳ ቆሆ ኡባ ዎራ ኦሊቴ፤ ኢንቴስ ኦራꬃ ዎዚናይኔ ኦራꬃ ኣያናይ ዴኦ፤ ኢንቴኖ ኢስራኤሌ ኣሳቶ ኣይስ ሃይቄቲ? 32 ኦኒካ ሃይቃናይሳ ታ ኮይኬ ጌስ ኡባ ሃሪዛ ጎዳይ፤ ታኮ ሃ ሲሚዲ ሼምፖራ ፓጻ ዲቴ» ጊዴስ።

<- ሂዚቄላ ቲንቢቴ 17ሂዚቄላ ቲንቢቴ 19 ->