ኬሳ 31

ባስሊኤሌኔ ኤልያቤ

(ኬሳ 35፡30—36፡1)

1 ቃሴካ ጎዳይ ሙሴስ ሂዝጊዴስ፥ 2 «ቤያ፤ ታኒ ዩሁዳ ዜሬꬅ ጊዲዳ ሁሬስ ናዛ ና፥ ኡሬይ ና፥ ባስሊኤሌ ዶራዲስ። 3 ኢዛ ታኒ ታ ኣያናን፤ ሂላቴꬃን፥ ኣኬካኒኔ ኦሶ ኡባ ኦꬂዛ ኤራቴꬃን ኩንꬃዲስ። 4 ሄሲካ ኢዚ ቆፒ ቆፒዲ ሂላቴꬃን፥ ዎርቃፌ፥ ቢራፔኔ ጻርቂማላፔ ዱማ ዱማ ሚሽ ኦꬃናሳ። 5 ሄሳꬆካ ኣልኦ ሹች ማሲ ማሲዲ ጊጊሳናስ፥ ሚꬅ ማሳናሲኔ ሄይታንታ ኡባ ኦꬃናሳ።

6 «ሄሳ ቦላካ ቃሴ ኢዛ ማዳና ማላ፥ ዳኔ ዜሬꬅ ጊዲዳ ኣሂሳሜኬ ና ኤላቤ ዶራዲስ። ታኒ ኔና ኣዛዚዳይሳ ኡባ ኢስቲ ኦꬃና ማላ፥ ኩሼ ሂላቴꬅ ኤሪዛይታ ኡባስ ኤራቴꬅ ኢማዲስ። 7 ኢስቲ ኦꬃናይሲ ጾሳ ዱንካኔ፥ ጫቆ ቃላይ ኢዛን ዲዛ ታቦታኔ ታቦታዛ ቦላ ዎꬂዛ ኣቶቴꬃ ካማ፥ ጾሳ ዱንካኔዛ ኦꬃናስ ጎኤቲዛ ሚሻታ ኡባ፥ 8 ጻራጴዛኔ ኢዛ ሚሻታ፥ ዋላካይ ባይንዳ ዎርቃፌ ኦሴቲዳ ጾምፔ ኢዛ ቦላ ዎꬂዛ ሚሽ ኡባራ፥ ኤጻኔ ጩዋሲ ያርሺዛሶዛ፥ 9 ጹጌቲዛ ያርሾ ያርሺዛሶዛኔ ኢዛ ሚሻታ ኡባራ፥ ሜጬቲዛ ኬሬኔ ኬራ ኢዛ ቦላ ዎꬂዛ ሚሻራ፥ 10 ዳዴቲ ኦሴቲዳ ጫርቃታ፥ ቄሴ ኣሮኔይ ማይኢዛ ዱማ ማይኦ፥ ኢዛ ኣቱማ ናይቲ ቄሴቴꬃ ኦሶ ኦꬂሼ ማይኣና ማይኦ፥ 11 ቃሴ ቲዬቲዛ ዛይቴኔ ጌሻ ሶዛስ ሳዎ ቱኑ ጊዛ ኤጻኔ። ኢስቲ ሃይሳ ኡባ ታኒ ኔና ኣዛዚዳ ማላ ኦꬃና» ጊዴስ።

ሳምባታ

12 ሄሳፌ ጉዬ ጎዳይ ሙሴ፥ 13 «ኔኒ ኢስራኤሌ ኣሳስ፥ ‹ታ ሳምባታ ሎኤꬂ ናጊቴ። ሄሲ ታኒ ጎዳይ ኢንቴና ታስ ዱማ ሂስታዳ ዶሪዳይሳ ቤሲዛዝ ጊዲዲ ያና ዬሌታ ኡባስ ታፔኔ ኢንቴፌ ጊዶን ማላታ ጊዳና። 14 ኢንቴስ ሄ ጋላሳይ ዱማ ጊዲዳ ጊሻስ ሳምባታ ናጊቴ። ኢዛ ቱኒሲዛ ኣሲ ሙሌ ሃይቃናስ ቤሴስ፤ ሄ ጋላሳን ኦሶ ኦꬂዛይ ኦኒካ ባ ኣሳ ጋርሳፌ ꬋዮ። 15 ኡሱፑን ጋላሳታን ኢንቴ ኦሶ ኦꬂቴ፤ ጊዶ ኣቲን ላፑንꬃ ጋላሳይ ታስ ጎዳስ ዱማቲዳ ሼምፖ ሳምባታ፤ ሄ ጋላሳን ኦꬂዛዴይ ኦኒካ ሙሌራ ሃይቃናስ ቤሴስ። [a] 16 ኢስራኤሌ ኣሳይ ሄ ሳምባታ ጋላሳ ና ናስ ሜርናስ ማላታ ሂስቲዲ ናጎ። 17 ታኒ ኡሱፑን ጋላሳታን ሳሎኔ ሳኣ ሜꬋዳ ላፑንꬃ ጋላሳን ኦሶ ኣጋዳ ሼምፒዳ ጊሻስ፥ ታሲኔ ኢስራኤሌ ናይታስ ጊዶን ሃይሲ ሜርናስ ጫቆ ጊዳና› ጋ» ጊዴስ። [b]

18 ጎዳይ ሙሴራ ሲና ዙማ ቦላ ሃሳይዛይሳ ዉርሲዳ ማላ ኢዚ ባ ቢራꬌን ጻፊዳ ታሙ ኣዛዞታ ኦይኪዳ ናምኡ ማሴቲዳ ሹቻታ ሙሴስ ኢሚዴስ።

<- ኬሳ 30 ኬሳ 32 ->