ሳሎፔ ጋርሳ ባጋራ

ኦሴቲዛይሳስ

ኡባስ ዎዴይ ዴስ።

ዎዴይ ዴስ፤

ሃይቃናስካ ዎዴይ ዴስ፤

ቶካናስ ዎዴይ ዴስ፤

ሾዳናስካ ዎዴይ ዴስ።

ኣሻናስካ ዎዴይ ዴስ፤

ላላናስ ዎዴይ ዴስ፤

ጊምባናስካ ዎዴይ ዴስ።

ሚጫናስካ ዎዴይ ዴስ።

ካዮታናስ ዎዴይ ዴስ፤

ቃሴ ኡፋዬቲሼ ጉፓናስካ

ዎዴይ ዴስ።

ሹች ሺሻናስካ ዎዴይ ዴስ።

ኢዲሜታናስ ዎዴይ ዴስ፤

ሻኬታናስካ ዎዴይ ዴስ።

ኣጋናሲካ ዎዴይ ዴስ።

ሺሺ ኦይካናስ ዎዴይ ዴስ፤

ኬሲ ኦላናስካ ዎዴይ ዴስ።

ሲካናስካ ዎዴይ ዴስ።

ጮኡ ጋናስ ዎዴይ ዴስ፤

ሃሳያናስካ ዎዴይ ዴስ።

ኢጻናስካ ዎዴይ ዴስ።

ኦላስ ዎዴይ ዴስ፤

ሳሮን ዳናስካ ዎዴይ ዴስ።

9 ሂስቲን ኦሳንቻይ ባ ዳፌቲ ዳቡርዳይሳፌ ኣይ ዎꬌ ዴማኔ? 10 ታኒ ቃሴ ኣሳ ናይቲ ዳቡርዲ ኦꬃና ማላ ጾሲ ኢሚዳ ቶሆይ ኬሂ ዴጾ ጊዲዳይሳ ቤኣዲስ። 11 ኡባ ሚሽ ኢዛ ዎዴን ዎዴን ሎኤꬂዲ ኦꬂዴስ። ጾሲ ኣሳ ዎዚናን ሜርናቴꬅ ዎꬂዴስ፤ ጊዲኮካ ጾሲ ኦꬂዳይሳ ኡባ ኮይሮፔ ዉርሴꬅ ጋካናስ ኣሲ ኡባ ኤራናስ ዳንዳዬና። 12 ሄሳ ጊሻስ ኣሲ ባ ዴኦ ላይꬃን ሎኦ ኦሶ ኦꬂዛይሳፌኔ ኡፋይሲዛዝ ኦꬂዛዛፔ ኣꬊዛ ሃራ ሚሺ ባይንዳይሳ ታኒ ኤራዲስ። 13 ቃሴ ኣሳስ ኢዛስ ኢዛ ዳቡራስ ዋጋ ጊዲዛይ ሚዲኔ ኡዪዲ ባና ኡፋይሲዛይሳ፤ ሄሲካ ኢዛስ ጾሳፌ ኢሜቲዳ ኢሞታ።

14 ጾሳይ ኦꬂዳይሲ ኡባይ ሜርናስ ዴኣናይሳ ታ ኤራይስ፤ ኢዚ ኦꬂዳይሳ ቦላ ጉጃናስ ዎይኮ ኢዛፔ ጉꬃናስ ዳንዳዬቴና። ጾሲ ሄሳ ኦꬂዳይ ኣሳይ ኢዛ ቦንቻና ማላሳ።

ሃይሳፌ ካሴካ ዲዛይሳ፤

ሲንꬃፌ ሃናናይሲ

ቤኒካ ዲዛይሳ፤

ጾሲ ካሴ ኣꬊዳይሳ

ዛሪ ኮዬስ።

ሃራ ሚሽ ቤኣዲስ፤

ፒርዳ ሶሆን

ማካላቴꬂ ዴስ፤

ሱሬ ፒርዳ ሶሆን ጌኔይ ዴስ።

«ኡባ ዮኦሲኔ ኦሶስ

ዎዴይ ዲዛ ጊሻስ

ጾሲ ጺሎዛኔ ዎርዳንቻዛ

ፒርዳስ ሺሻና»

ጋዳ ቆፓዲስ።

18 ቃሴ ታኒ ታ ዎዚናን፥ «ኣሲ ሜሄ ማላ ጊዲዳይሳ ኢስቲ ኤራና ማላ ጾሲ ፓጬስ። 19 ኣሳ ቃዳይካ ሜሄይሳ ማላ፤ ናምኣ ቃዳይካ ኢሲኖ፤ ኢሶይ ሃይቂዛ ማላ ሃንኮይሲካ ሃይቄስ፤ ናምኣስካ ኢሲ ቆሞ ፔኖይ ዴስ፤ ሄሳ ጊሻስ ኢዚ ሜሄፔ ዱማቴና፤ ሄሲካ ሃዳ። 20 ናምኣይካ ኢሲ ሶሆ ቤቴስ፤ ናምኣይካ ቢታፌ ሜꬌቲዳ ጊሻስ ቢታን ሲሜቴስ። 21 ሂስቲን ኣሳ ሼምፖይ ፑዴ ሳሎ ኬዚዛይሳ፥ ሜሄታ ሼምፖይካ ዱጌ ቢታን ጌሊዛይሳ ኦኔ ኤሪዛይ?» ጋዳ ቆፓዲስ።

22 ሄሳ ጊሻስ ኣሲ ባ ኦꬂዳ ኦሶን ኡፋይሳፌ ሃራ ኣꬊዛ ሚሺ ባይንዳይሳ ታ ቤኣዲስ፤ ሄሲካ ኣሳስ ኢሜቲዳ ቃዳ፤ ኢዚ ሃይቂዳፔ ጉዬ ኦሴቲዳ ኦሶታ ኢዛ ዛሪ ኤሂዲ ቤሳናይ ኦኔ?

<- ኤራንቻታ ማጻፋ 2ኤራንቻታ ማጻፋ 4 ->