4 ታኒ ናቡካዳናጾሬይ ታ ኬꬃን ታስ ኢንጄን ታ ካዎቴꬃንካ ኢሻሎን ዳይስ። 5 ጊዶ ኣቲን ጋላሳታፔ ኢሲ ጋላስ ታኒ ታ ሂꬃን ኢቻ ዳሼ ዳሮ ዳጋንꬂዛ ኣጉሞኔ ኣጁታ ቤያዲስ። 6 ሄሳ ጊሻስ ሄ ኣጉሞዛ ቢርሼꬅ ታስ ዮታና ማላ ባቢሎኔን ዲዛ ኤራንቻቲ ዉሪ ታኮ ያና ማላ ኣዛዛዲስ። 7 ቢቲዛይቲ፥ ማሮቲ፥ ሳጋቲ፥ ጾሊንቴ ታይቢዛ ኤራንቻቲኔ ሙሬኒዛይቲ ኡባይ ታኮ ዪን ታ ኢስታስ ታ ኣጉሞዛ ዮታዲስ ሺን ኢስቲ ኣጉሞዛ ቢርሻና ዳንዳይቤቴና። 8 ሄሳፌ ጉዬ ታ ጾሳ ሱንꬃን ቢልጻሶሬ ጌቴቲ ጼይጌቲዛይሲኔ ጌሻ ጾሳታ ኣያናይ ኢዛን ዲዛ ዳኔሊ ጌሊዲ ታ ሲንꬃን ኤቂን ታ ኣጉሞዛ ኢዛስ ዮታዲስ።
9 ታኒካ፥ «ኤራንቻታስ ሃላቃ ጊዲዳ ቢልጻሶሬ! ጌሻ ጾሳታ ኣያናይ ኔናን ዲዛይሳኔ ጹራ ዮኦይ ዉሪካ ኔፔ ጌሞንታይሳ ታ ኤራይስ፤ ሄሳ ጊሻስ ታኒ ቤኢዳ ኣጉሞዛ ኔ ታስ ቢርሻ።
10 «ታኒ ታ ሂꬃን ኢቻ ዳሼ ኢሲ ዎጋ ጊታ ሚꬂ ዳይሲ ቢታ ቦላ ኤቂዳይሳ ኣጁታን ቤያዲስ። 11 ሄሲ ሄ ሚꬃዚ ኬሂ ዲጪዴስ፤ ሚኒዴስ፤ ኢዛ ጼራይካ ሳሎ ጋኪዴስ፤ ሳኣ ጋጻ ጋካናስ ቤቲዴስ። 12 ኢዛ ሃይꬃይ ጪሊላ፤ ኢዛ ኣይፌይ ዴሬ ኡባስ ጊዳና ጋካናስ ዳሪዴስ፤ ኢዛ ኩዋይ ዶኣታስ ሼምፒዛሶ ጊዲዴስ፤ ሳሎ ካፎቲካ ኢዛ ሃጋታ ቦላ ባ ኬꬃ ኬጺዲ ኢዛን ዴቴስ፤ ሼምፖራ ዲዛ ሜꬌቴꬃቲ ዉሪካ ሄ ሚꬃዛ ኣይፌ ሜቴስ።
13 «ታኒ ታ ሂꬃን ኢቻ ዳሼ ኣጁታን ኢሲ ጌሻ ኪታንቻይ ሳሎፔ ዱጌ ዎꬊሺን ቤኣዲስ። 14 ኢዚካ ባ ቃላ ꬎቁ ሂስቲዲ፥ ‹ሃይሳ ሚꬃዛ ቃንጺቴ፤ ኢዛ ሃጋታ ኡባ ጉሪቴ፤ ኢዛ ሃይꬃ ኡባ ዩዲቴ፤ ኢዛ ኣይፌዛ ላሊቴ፤ ኢዛ ኩዋ ጋርሳን ዲዛ ዶኣቲኔ ኢዛ ሃጋታ ቦላ ዲዛ ካፎቲ ባቃቴቶ። 15 ጊዶ ኣቲን ኢዛ ዱሩማዛኔ ጻጶዛ ቢራታፔኔ ጻርቂማላፔ ኦሴቲዳ ሳንሳላታን ዩሺ ቃቺዲ ሄን ዴምባን ማታ ጊዶን ቢታ ጋርሳን ኣጋጊቴ፤
17 « ‹ሃ ፒርዳ ቃሾይ ጌሻ ኪታንቻታ ባጋራ ቆንጪ ዮቴቲዴስ፤ ሄሲካ ኡባፌ ꬎቃ ጾሳስ ሳኣ ካዎታ ቦላ ኢዛስ ጎዳቴꬂ ዲዛይሳኔ ካዎቴꬃታካ ባ ዶሲዳዴስ ኢሚዛይሳ፥ ኣሳፔ ካꬌቲዳይታ ኢስታ ቦላ ኢዚ ሹሚዛይሳ፥ ሜꬌታ ኡባይ ኤራና ማላሳ› ጊዴስ።
18 «ታኒ ካዎ ናቡካዳናጾሬይ ቤኢዳ ኣጉሞይ ሃይሳ፤ ቢልጻሶሬ! ኔኒ ታስ ኣጉሞዛ ቢርሻ፤ ታ ካዎቴꬃን ዲዛ ኤራንቻቲ ቢርሼꬃ ታስ ዮታናስ ዳንዳይቤቴና፤ ኔ ጊዲኮ ጌሻ ጾሳታ ኣያናይ ኔናን ዲዛ ጊሻስ ታስ ቢርሼꬃ ዮታና ዳንዳያሳ» ጊዴስ።
22 «ካዎ! ሄ ሚꬃይ ኔና፤ ኔ ጊታቴꬃይ ዲጪዲ ሳሎ ጋኪዴስ፤ ኔ ካዎቴꬃይካ ቢታ ጋጻ ጋኪዴስ።
23 «ካዎዞ! ኔ ቤኢዳ ጌሻ ኪታንቻይ ሳሎፔ ዎꬊዲ፥ ‹ኢንቴ ሚꬃዛ ቃንጺ ꬋይሲቴ፤ ኣቲዳ ዱሩማዛኔ ጻጶዛ ቢራታፔኔ ጻርቂማላፔ ኦሴቲዳ ሳንሳላታን ዩሺ ቃቺዲ ዴምባን ማታ ጊዶን ቢታ ጋርሳን ኣጋጊቴ፤ ሄን ሳሎ ኬንቾን ሙሶ፤ ላፑን ላይꬂ ኢዚ ዶኣታራ ዴኦ› ጊዛይሳ ሲያዳሳ።
24 «ካዎ! ሄኮ ቢርሼꬃይ ሃይሳ፤ ኡባፌ ꬎቃ ጾሳይ ታ ጎዳ ካዎዛ ቦላ ፖሌታና ማላ ኬሲዳ ኣዋጃይ ሃይሳፌ ካሊዛይሳ። 25 ኔኒ ኔ ዴሬዛፔ ሻኬታዳ ጎዴታና፤ ኔስ ዱሳሶይካ ዎራ ዶኣታራ ጊዳና፤ ላፑን ላይꬂ ፖሌታና ጋካናስ ኔኒ ሜሄ ማላ ማታ ማና፤ ኔኒ ኬንቾን ሙሳና፤ ሄሲ ዉሪ ኔና ጋካናይ ኡባፌ ꬎቃ ጾሳይ ካዎታ ኡባ ቦላ ኢዛስ ጎዳቴꬂ ዲዛይሳኔ ኢዚ ካዎቴꬃ ዉርሲካ ባ ዶሲዳዴስ ኢሚዛይሳ ኔ ሻካ ኤራና ጋካናሳ። 26 ዱሩማዚ ጻጶዛራ ሄን ጋዴ ጊዶን ኣታና ማላ ኢዚ ኣዛዚዳይ ጾሳስ ኣላሜ ቦላ ኩሜꬃ ማታይ ዲዛይሳ ኔ ኤራዳ ኔኒ ሲማ ኔ ካዎቴꬃን ኡታናይሳ ቤሴስ። 27 ሄሳ ጊሻስ ካዎ! ታኒ ታ ባጋራ ኔና ዞሪዛይሳ ሲያ፤ ኔኒ ናጋራ ኦሶ ኣጋ፤ ሱሬ ኦሶ ኡባ ዎዴ ኦꬃ፤ ኔ ኢታ ኦሶ ኣጋዳ ቆሄቲዛይታስ ቃꬌታ፤ ሄሳꬆ ኔ ኦꬂኮ ኔ ሳሮን ዱሳ ላይꬃይ ኣዱቆንታ ኣጌና» ጊዴስ።
31 ኢዚ ቡሮ ሃሳያ ባ ዶናፔ ኬሲ ዉርሶንታ ዲሺን ሳሎፔ፥ «ካዎ ናቡካዳናጾሬ! ኔ ቦላ ፒርዴቲዳ ፒርዳይ ሃይሳፌ ካሊዛይሳ። ሄኮ ኔ ካዎቴꬃይ ኔፔ ኤኬቲዴስ። 32 ኔኒ ዴሬዛ ጋርሳፌ ጎዴታና፤ ኔስ ዱሳሶይ ዎራ ዶኣታራ ጊዳና፤ ላፑን ላይꬂ ኩማና ጋካናስ ኔኒ ሜሄ ማላ ማታ ማና፤ ሄሲካ ሃናናይ ኡባፌ ꬎቃ ጾሳይ ካዎታ ኡባ ቦላ ኢዛስ ጎዳቴꬂ ዲዛይሳኔ ካዎቴꬂ ዉርሲካ ኢዚ ባ ዶሲዳዴስ ኢሚዛይሳ ኔ ሻካ ኤራና ጋካናሳ» ጊዛ ቃላይ ዪዴስ።
33 ሄ ቃላይ ሄራካ ካዎ ናቡካዳናጾሬ ቦላ ፖሌቲዴስ፤ ሄሳ ጊሻስ ኢዚ ዴሬዛ ጋርሳፌ ጎዴቲዴስ፤ ሜሄ ማላ ማታ ሚዴስ፤ ሳሎፔ ዎꬊዛ ኬንቾን ኢዚ ሙሲዴስ፤ ኢዛ ቢናናይካ ጎሌ ካፎ ባሌ ማላ ዲጪዴስ፤ ኢዛ ጹጉንꬂካ ካፎ ጹጉንꬃ ማላ ጊዲዴስ።
36 «ታ ዎዚና ካሃይ ታኮ ሲሚን ሄራካ ታ ካዎቴꬃስ ቦንቾይ፥ ኣዮቴꬂኔ ቴማይ ሲሚዴስ፤ ካሴ ታና ዞሪዛይቲኔ ታ ሹሜቲ ታና ኡፋይሳን ሞኪ ኤኪዳ፤ ካሴ ታኒ ካዎቴꬃ ኣራታን ሲማ ኡታዲስ፤ ካሴይሳፌ ቦላራ ኣꬎ ቦንቼታዲስ።
37 «ሄኮ ቤኢቴ! ታኒ ናቡካዳናጾሬይ ሳሎ ካዎስ ጋላታ፥ ቦንቾኔ ሳባ ሺሻይስ፤ ኢዛ ኦሶ ኡባይ ሊኬ፤ ኢዛ ኦጌይካ ሱሬ፤ ኦቶራንቻታ ኢዚ ካዉሻናስ ዳንዳዬስ» ጊዴስ።
<- ዳኔላ ቲንቢቴ 3ዳኔላ ቲንቢቴ 5 ->