22 ሶሎሞኔስ ሃች ሃች ቁማስ 50 ኮንታሌ ሙሩታ ꬊሌ፥ 100 ኮንታሌ ꬊሌ፥ 23 ꬊኬቲዳ 10 ቦራታ፥ ዬዳ ሚዛ 20 ቦራታኔ 100 ዶርሳታ፥ ኢስታ ቦላካ ጮፎሾታ፥ ጋራታ፥ ጌኔሳታኔ ሎኦ ካፎታ ኮሼስ።

24 ሶሎሞኔይ ኤፊራጺሴ ሻፋፔ ኣርሼይ ዉሊዛ ባጋራ ዲዛ ካዎቴꬃታ ኡባ ቲፊሳ ካታማፔ ዶሚዲ ጋዛ ካታማ ጋካናስ ሃሪዴስ፤ ባ ዩሾን ዲዛ ኡባ ዴሬታራካ ሳሮን ዴኢዴስ። 25 ሶሎሞኔይ ዴኢዳ ላይꬅ ኡባን ዳኔፔ ቢዲ ቤርሳቤሄ ጋካናስ ዩሁዳ ኣሳይኔ ኢስራኤሌ ኣሳይ ኡባይ ባ ዎይኔ ቱራ ኩዋኒኔ ባ ኤꬃ ኩዋን ዎፓን ኡቲዳ።

26 ሶሎሞኔስ ፓራ-ጋሬታ ጎቺዛ 40,000 ፓራቲኔ 12,000 ቶጋ ኣሳቲ ዴቴስ። [c] 27 ሄ ዞኔታ ኣይሲዛይቲ ባና ጋኪዳ ኣጊናን ታራን ታራን ካዎ ሶሎሞኔሲኔ ኢዛ ማዳፌ ማናስ ዪዳ ኣሳስ ኡባስ ኣይኮካ ፓጪሶንታ ሺሼቴስ። 28 ቃሴካ ጋሬ ጎቺዛ ፓራቲኔ ሃንኮ ፓራቲ ባንጋኔ ሃርቆ ኤሂዲ ዎꬂዛሶን ዎꬄቴስ።

29 ጾሳይ ሶሎሞኔስ ኣꬎ ኤራቴꬅ፥ ኬሂ ጊታ ኣኬካኔ ዛዋይ ባይንዳ ኤራቴꬅ ኢሚዴስ። 30 ሶሎሞኔስ ዲዛ ኣꬎ ኤራቴꬃይ ኣርሼይ ሞኪዛ ባጋራ ዲዛይታ ኣꬎ ኤራቴꬃፌኔ ጊብጼታስ ዲዛ ኣꬎ ኤራቴꬃ ኡባፌካ ኣꬌꬃ። 31 ኢዚ ኣሳ ኡባፌ ኣꬎ ኤራንቻ፤ ቃሴ ኢዚ ኤዚራሄ ኣስ ኤታኔፔ፥ ማሆላ ናይታፔ ሄማኔፔ፥ ካልኮሌፔኔ ዳሪዳፔካ ኣꬎ ኤራንቻ፤ ኢዛ ጎባቴꬂ ኢዛ ዩሾን ዲዛ ካዎቴꬅ ኡባን ሲዬቲዴስ። [d] 32 ኢዚ 3,000 ሌሚሶታ ሃሳይዴስ፤ ቃሴካ 1,005 ዬꬃታ ዬጺዴስ። [e] 33 ሶሎሞኔይ ሊባኖሴ ዚጋፔ ቢዲ ኬꬃ ጊምቤ ቦላ ሞኪዛ ሂሶጴ ሚꬅ ጋካናስ ዲዛ ዶዛታ ጊሻስ ዮቲዴስ፤ ሄሳꬆካ ሜሄታ፥ ዶኣታ፥ ካፎታ፥ ሳኣራ ጎሼቲዛ ሜꬌቴꬃታ ጊሻሲኔ ሞሌታ ጊሻስ ታማርሲዴስ። 34 ኢዛ ኣꬎ ኤራቴꬃ ሲዪዳ ሳኣ ካዎታ ኡባፌ ኪቴቲዳይቲ ኢዛ ኣꬎ ኤራቴꬃ ሲያናስ ዪዳ።